Венеция кинофестивалі 2021: жеңімпаздар мен жүлдегерлер

Одри Диван марапаттау кезінде

78-ші Венеция халықаралық кинофестивалінің жұмысы аяқталды. 1-11 қыркүйек аралығында өткен кино мейрамында француз режиссері Одри Диванның «Оқиға» / «L’événement» драмасы «Алтын арыстанды» жеңіп алды, ал итальян мэтрі Паоло Соррентиноның «Құдайдың қолы» / «È stata la mano di Dio» картинасымен қазылар гран-приіне ие болды.

Фестивалді екі рет «Оскар» алған испан режиссері Педро Альмодовардың «Параллель аналар» / «Madres paralelas» фильмі ашып берді. Ал 4 «Оскардың» иегері Пон Чжун Хо негізгі конкурстың қазылар алқасын басқарды.

Жаңазеландия режиссері Джейн Кэмпион «Иттің күші» / «The Power of the Dog» жұмысы үшін «Күміс арыстан» алды. Вольпи кубогы жүлдесінде Пенелопа Крус («Параллель аналар» / «Madres paralelas») үздік актриса, Джон Арсилья («Жұмыста: Жоғалған 8» / «On the Job: The Missing 8») үздік актер атанды. Үздік сценарийші ретінде «Жоғалған қыз» / «The Lost Daughter» картинасын әкелген Мэгги Джилленхол марапатталды.

Қазылардың арнайы сыйлығы итальян фильммейкері Микеланджело Фраммартиноға, Марчелло Мастроянни атындағы сыйлық «Құдайдың қолы» / «È stata la mano di Dio» фильмінде ойнаған Филиппо Скоттиға берілді.

«Көкжиек» бағдарламасының негізгі конкурсында Литвадан келген Лауринас Барейшаның «Пірәдәр» / «Piligrimai» фильмі үздік шықты.

Құрметті «Алтын арыстан» сыйлығымен актерлер Роберто Бениньи мен Джейми Ли Кёртис марапатталды.

Нео оралды: жаңа «Матрицаның» трейлері шықты

Warner Bros. студиясы «The Matrix Resurrections» («Матрица: Тірілу») фантастикалық боевигінің алғашқы трейлерін жариялады. Бұл сол кезде ағайынды болған Вачовскилердің «Матрица» трилогиясының жалғасы. Жобаға жынысын ауыстырғаннан кейін Лана Вачовски деген атпен белгілі, бұрынғы Лоуренс Вачовски бір өзі режиссер болды.

Видеороликте Киану Ривздің кейіпкері көрсетіледі: ол заманауи әлемде өмір сүреді және әлдебір ұмытқан естеліктерін еске түсіруге тырысады. Ол психотерапевпен кездесіп жүреді және үнемі көк таблетка қабылдайды.

Төртінші бөлім 2021 жылы желтоқсанда жарық көреді. Картина бір мезгілде прокатқа да, HBO Max платформасына да шығады деп мәлімделді. Сюжетте Нео мен Тринити қайта көрсетіледі, сондай-ақ жаңа кейіпкерлер де пайда болады. Соның бірі – түпнұсқа трилогияда Морфеусті ойнаған Лоуренс Фишборнның орнына Яхья Абдул-Матин II келді.

«Ақтастағы Ахико»: өмірін қазақ жерінде өткізген жапон тұтқыны туралы фильм

Алматы облысында Екінші дүниежүзілік соғыста тұтқынға түскен жапон туралы картина түсіріліп жатыр. «Ақтастағы Ахико» деп аталатын жобаның өндірісімен Ш. Айманов атындағы «Қазақфильм» киностудиясы айналысады.

Сюжеті өмірден алынған кең ауқымды тарихи фильмде Екінші дүниежүзілік соғыстан кейін тұтқынға түскен жапон курсанты Ахико Тэцуроның өмір жолы мен тағдыры баяндалады. Фильмнің қоюшы режиссері – Елдар Қапаров. Тең режиссер әрі тең продюсер Сано Синдзю (Жапония). Басты рөлдерде Сырым Қашқабаев (Қазақстан) және Эйсаку Огасавара (Жапония) ойнайды.

– Ахико Тэцуро туралы фильмді түсіру  идеясы осыдан бірнеше жыл бұрын пайда болды. Оның қилы тағдырын естіп білген соң, онымен танысып, кейінгі өмірі туралы білгім келді. Сол мақсатпен 2007 жылы Қарағанды облысы Ақтас ауылына барып, Ахико Тэцуромен таныстым. Ол туралы деректі фильмді де түсірдік. Ол өз тағдыры туралы егжей-тегжей баяндап берді. Осылайша көркем фильмнің сценарийі дүниеге келді, – деді фильмнің продюсері әрі тең режиссері Әлия Уәлжанова.

Айта кетсек, «Ақтастағы Ахико» көркем фильмі 2019 жылдың басында өндіріске жіберілген болатын. Кинотуындының продюсері Әлия Уәлжанованың айтуына қарағанда сол жылы қыркүйек айында фильмнің кейбір сахналары Қапшағай қаласының маңында тұрғызылған «Карафуто» декорациясында жүргізілген, кейін пандемияға байланысты фильмнің түсірілімдері уақытша тоқтатылған екен. Өндіріс қазір қайта жанданды.

Фильм премьерасы 2022 жылдың соңына таман жоспарланған.

AÝT Central Asia 2021: үздік деректі фильмдер анықталды

Елімізде алғаш рет AÝT Central Asia 2021 Орталық Азиядағы деректі жобалар питчингі өтті.  AYT Central Asia 2021 – бұл Qara Film Festival аясында деректі кино жанрының жас авторларын қолдау және Орта Азиядағы деректі жобалар қауымдастығын кеңейту мақсатында өткізілген алғашқы питчинг.

Онлайн форматта өткен шараға Германия, Чехия, Ресей, Литва, Дания, Өзбекстан, Қырғызстан, Қазақстан, Португалия, Тәжікстан және Түркіменстан сияқты елдердің киноиндустрия мамандары қатысты.

Жеңімпаз жобаларға ынталандыру жүлделері берілді.

Сонымен, Сүйінбике Сулейменованың «MÄTIL» жобасы DOK Leipzig халықаралық кинофестивалінің өкілі Ульрике Шмидттің назарына ілігіп, жобаның авторы биыл Германияда өтетін DOK Leipzig жиынына қатысуға аккредитация алды, сондай-ақ халықаралық ко-продукция өндіруге бағытталған еуропадағы DOK Co-Pro ірі кинонарығына бақылаушы есебінде қатысу мүмкіндігіне ие болды.

«Артдокфест» халықаралық деректі кинофестивалінің президенті, режиссер-документалист Виталий Манский «Өзен қандай түс көреді» жобасын (реж: Кристина Михайлова, прод: Дана Сабитова) үздік деп таныды, сондай-ақ, Диана Жилкенованың «Жертөле» деп аталатын туындысына ерекше баға берді. Бұл жеңімпаз жобалар биылғы жылдың 9-12 қыркүйегінде өтетін Artdocfest/Riga питчингіне қатысуға мүмкіндік алды, сондай-ақ, биыл желтоқсан айында Мәскеуде өтетін «Артдокфест» фестиваліне сапар (тревел-грант) шегеді.

Ал Internews өкілдері Алевтина Мадьярова мен Манана Асламазян «Балдай тәтті дүмбіл» фильміне  1000 доллар көлемінде ақшалай сыйлық берді (реж: Айжан Қасымбек, прод: Диана Ашимова).

Алматыда Федор Бондарчуктің жетекшілігімен фильм түсіріліп жатыр

Ресей режиссері, актер және продюсер Федор Бондарчуктың жетекшілік етуімен Алматыда «Скоро кончится лето» картинасы түсіріліп жатыр.

Қазақстан-Ресей бірігіп түсіретін картина 1990 жылдардағы Қазақстан жастарының өмірі көрсетіледі. Сюжетте алғашқы махаббат, көшедегі текетірес тақырыбы қозғалып, Виктор Цой, «Аквариум» секілді сол кезеңнің музыкасы, қазақ поп-музыкасының алғашқы хиттары сөз болады.

Басты кейіпкер – Берта деген сұлудың жүрегін гипноздың көмегімен жаулап алмақ болған Баха есімді бозбала. Көп ұлттан құралған қала ауласының өмірі көрсетіледі: кейіпкерлердің бозбала шағының соңғы жазы, Виктор Цойдың соңғы жазы және КСРО күйреудің алдындағы соңғы жаз.

Федор Бондарчук – жобаның көркемдік жетекшісі. Қазақстандық тараптан Еркежан Мақсұт продюсер болады. Негізгі актерлік құрамға бұрын-соңғы көрінбеген жаңа таланттар алынған. Ал белгілі актерлерден Ержан Нұрымбет, Алтынай Нөгербек, Ержан Түсіпов пен Ербол Семқұлов бар. Фильмді Яна Скопина деген дебютант қыз түсіреді. Сценарийді де өзі жазған. Яна қазір Ресейде тұрса да, балалық шағы Алматыда өткен.

Түсірілім 15 маусымда басталып, 7 тамызға дейін жалғасады. Прокаты 2022 жылға жоспарланған.

Сатыбалды Нарымбетовтың фильмдерін қайдан көруге болады

Қазақ киносының мэтрі, белгілі режиссер, сценарийші, жазушы Сатыбалды Нарымбетов дүниеден озды. Оның он шақты режиссерлік жұмысы бар, сценарийші ретінде де қазақ киносына еңбегі сіңді.

Біз қайраткердің артында мұра болып қалған кинокартиналардың интернетте көруге қолжетімдісін осы жерге жинап, топтама ретінде ұсынамыз.

Күзгі бұралаң жол / Осенние извилистые дороги (1983)

Сатыбалды Нарымбетов Г.Н. Данелия атындағы сценарийшілер мен режиссерлердің жоғарғы курсын тәмамдап, соған диплом жұмысы ретінде түсірген қысқаметраж жұмысы. Картинаға Сайын Мұратбековтың аттас әңгімесі арқау болған. Басты рөлдерде Құдайберген Сұлтанбаев пен Тұңғышбай Жаманқұлов.

Ауылдан келген күйеу бала / Зять из провинции (1987)

Комедия мафияға қарсы күрескен жас жігіт туралы баяндалады.

Созақтан шыққан Гамлет / Гамлет из Сузака, или Мамайя Кэро (1990)

Бұл драманы режиссер жоғалған ұрпақ туралы дейді. Оның кейіпкері тоқырау заманының өкілі, оның тағдыры тұтас ұрпақтың бет-бейнесі деуге болады.

Фильмді Megogo онлайн-кинотеатрынан тегін көруге болады.

Көзімнің қарасы / Жизнеописание юного аккордеониста (1994)

Сюжет желісі қарапайым кеншілер кентінде өрбиді. Мұнда аккордеонда ойнай алатын баланың өмірі суреттеледі. Оның әкесі жапондық әскери тұтқындарды үйіне қонаққа шақырғаны үшін 2 жылға түрмеге қамалады.

Фильм халықаралық дәрежеде біраз жетістікке жетті. Атап айтқанда: «Киношок» кинофестивалінде «Адамгершілік және мейірімділік үшін» сыйлығы, Францияның Анже қаласындағы халықаралық кинофестивалде қазылар дипломы, Латвиядағы «Арсенал» ХКФ Гран-при жүлдесі, Француз киноөнер академиясының сыйлығы, ҚР Мемлекеттік сыйлығы.

Омпа (1998)

Ескілеу ұшақ сатып алып, тасымалмен айналысатын екі достың хикаясы. Дәуір – Саратов қазағы, ал Александр – Қостанай орысы. Екі ұшқыштың өмірі қызыққа толы, басты кейіпкерлер де ешқашан мойымайтын жандар.

Басты рөлдерде Досхан Жолжақсынов пен Александр Панкратов-Черный ойнайды.

Қыз жылаған / Молитва Лейлы / Ләйләнің зары (2002)

Роза Мұқанованың “Мәңгілік бала бейне” шығармасының желісімен түсірілген драма Семей полигонының қасіреті көрсетіледі. Фильмді Megogo онлайн-кинотеатрынан тегін көруге болады.

Дала экспресі / Степной экспресс (2005)

Пушкиннің «Станционный смотритель» повесі бойынша түсірілген картинада сюжет біздің заманға ауыстырылған, ал оқиғасы қазақ даласында және Францияда өтеді.

Фильмді Megogo онлайн-кинотеатрынан тегін көруге болады.

Мұстафа Шоқай (2008)

Байопик ХХ ғасырдың алғашқы тоқсанында саяси қызмет атқарған Мұстафа Шоқайдың өмірін суреттейді. Фильмде елінің азаттығын аңсаған азаматтың саяси жолы, Түркістан, Кавказ, Түркия, Франция елдеріндегі эмигранттық тағдыры, айдауға түскен кезде көрген қиыншылықтары көрініс табады. Тарихи тұлғаны Азиз Бейшеналиев ойнайды.

Бұл фильмді де Megogo платформасынан көрсеңіз болады. Ақы алынбайды.

Сонымен қатар Сатыбалды Нарымбетов белгілі режиссер Қанымбек Қасымбековтың «Шоқ пен Шер» картинасының сценариін жазды. 1972 жылғы картинаны да Youtube видеохостингінен көруге болады.

Pixar студиясының «Лука» мультфильмі қазақша дубляжбен көрсетіледі

Disney/Pixar студиясының «Лука» / «Luca» анимациялық картинасы Қазақстан кинотеатрларына қазақша дубляжбен шығады.

Мультфильм «Болашақ» корпоративтік қорының және «Меломан» компаниясының бастамасымен «Өзіңнен баста» жобасы аясында аударылып отыр. Осыған дейін дубляждалған фильмдерді қоса есептесек бұл 37-жоба.

Сюжетте Лука есімді балақай Италияның Ривьерасындағы теңіз жағалауында орналасқан әдемі қалаға демалуға келеді. Онда ол өзіне уақытты бірге қызықты өткізетін жаңа дос табады. Екеуі бірге түрлі ұмытылмас оқиғаларға тап болады. Барлығы керемет, алайда Луканың жаңа досы – бала кейпіндегі жағалау суларының тереңін мекендейтін теңіз монстры екен…

Мультфильм 17 маусымда прокатқа шығады.

«Оскар 2021» жеңімпаздары

25 сәуірде 93 «Оскар» жүлдесімен марапаттау шарасы өтті. Американың кинематография өнері мен ғылымы академиясы 23 номинация бойынша үздіктерді анықтады.

Фаворит саналған «Көшпенділер елі / Nomadland» алты номинацияның үшеуін жеңіп алды. Ал 10 номинацияға іліккен «Манк / Mank» картинасы екеуін ғана иемденді. 2 «Оскардан» алғандар тізімінде «Әке / The Father», «Иуда және қара мессия / Judas and the Black Messiah», «Металл үні / Sound of Metal», «Ма Рейнидің Қара биі / Ma Rainey’s Black Bottom», «Жан / Soul» фильмдері бар.

Сонымен «Оскар 2021» жеңімпаздарының толық тізімі:

  • Үздік фильм: «Көшпенділер елі / Nomadland»
  • Үздік актер: Энтони Хопкинс  – «Әке / The Father»
  • Үздік актриса: Фрэнсис Макдорманд – «Көшпенділер елі / Nomadland»
  • Екінші пландағы үздік актер: Дэниел Калуя – «Иуда және қара мессия / Judas and the Black Messiah»
  • Екінші пландағы үздік актриса: Юн Ёджон – «Минари / Minari»
  • Үздік анимациялық толықметраж фильм: «Жан / Soul»
  • Үздік операторлық жұмыс:  Эрик Мессершмидт – «Манк / Mank»
  • Үздік костюм дизайны: Энн Рот – «Ма Рейнидің Қара биі / Ma Rainey’s Black Bottom»
  • Үздік режиссерлік жұмыс: Хлоя Чжао – «Көшпенділер елі / Nomadland»
  • Үздік деректі толықметраж фильм: «Менің сегізаяқ ұстазым / My Octopus Teacher» (Пиппа Эрлих, Джеймс Рид, Крейг Фостер)
  • Үздік деректі қысқаметраж фильм: «Колетт / Colette» (Энтони Джаккино, Элис Доярд)
  • Үздік монтаж: Миккель Э. Г. Нильсен – «Металл үні / Sound of Metal»
  • Үздік халықаралық толықметраж фильм: «Жұмысбасты / Druk» (Дания)
  • Үздік бет әрлеу және шаш үлгісі: Матики Анофф, Мия Нил, Ларри М. Черри – «Ма Рейнидің Қара биі / Ma Rainey’s Black Bottom»
  • Үздік музыка: Трент Резнор, Аттикус Росс,  Джо Батист – «Жан / Soul»
  • Үздік ән: «Fight for You» – «Иуда және қара мессия / Judas and the Black Messiah»
  • Үздік қоюшы-суретші: Дональд Грэм Бёрт, Джен Паскаль – «Манк / Mank»
  • Үздік анимациялық қысқаметраж фильм: «Бірдеңе болып жатса – мен сені сүйемін / If Anything Happens I Love You» (Уилл МакКормак и Майкл Говье)
  • Үздік қысқаметраж көркем фильм: «Алыстағы екі бейтаныс / Two Distant Strangers» (Трэвон Фри, Мартин Десмонд Роу)
  • Үздік дыбыс: Николас Беккер, Хайме Бакшт, Мишель Куттоленк, Карлос Кортес, Филип Блад – «Металл үні / Sound of Metal»
  • Үздік визуал эффектілер: Эндрю Джексон, Дэвид Ли, Эндрю Локли, Скотт Фишер – «Теңет / Tenet»
  • Үздік бейімделген сценарий: Кристофер Хэмптон, Флориан Зеллер – «Әке / The Father»
  • Үздік түпнұсқа сценарий: Эмеральд Феннелл – «Болашағы бар қыз / Promising Young Woman»

«Алтын таңқурай 2021»: жылдың нашар фильмдері мен актерлері аталды

алтын таңқурай

алтын таңқурай

Әдеттегідей «Оскар» марапаттау кешінің қарсаңында 2020 жылғы кинематограф саласындағы күмәнді жетістіктер үшін «Алтын таңқурай» антижүлдесінің иегерлері белгілі болды. 41-ші марапаттың иегерлері Razzies YouTube арнасында 2021 жылы 24 сәуірде жарияланды.

Сонымен «Алтын таңқурай 2021» лауреаттары:

Нашар фильм: «Бұлтартпас дәлел» / «Absolute Proof»

Нашар актер: Майк Линделл – «Бұлтартпас дәлел» / «Absolute Proof»

Нашар актриса: Кейт Хадсон – «Мьюзик» / «Music»

Екінші пландағы нашар актер: Руди Джулиани – «Борат 2» / «Borat Subsequent Moviefilm»

Екінші пландағы нашар актриса: Мэдди Зиглер – «Мьюзик» / «Music»

Нашар режиссер: Sia – «Мьюзик» / «Music»

Нашар сценарий: Blanka Lipinska, Tomasz Klimala, Томаш Мандес, Барбара Бяловас – «365 күн / 365 dni»

Нашар приквел, ремейк, жасанды немесе сиквел – «Дулиттл» / «Dolittle»

Нашар экран комбинациясы: Руди Джулиани және оның шалбарының сыдырмасы – «Борат 2» / «Borat Subsequent Moviefilm»

Дереккөз: razzies.com

Ресейліктер қазақ даласында «шаман нуарын» түсіріп жатыр

«Шаман» фильмінің түсірілімінен кадр / facebook.com/123production

Қазақстанда «Шаман» деген сериалдың түсірілімі басталды. Режиссері – ресейлік Рустам Мосафир, ол осыған дейін «Скиф» тарихи боевигін түсірген еді.

Сериал «готика элементтері бар шаман нуары» деп суреттеледі. Басты кейіпкер – шағын елді мекенде тұратын полиция тергеушісі. Александрдың бойында шамандық қасиет бар, бұл оған қиын істерді ашуға көмектеседі. Кейіпкер рухтармен тілдесе алады, тылсым күштердің құрсауына түскен адамдарды құтқарады.

Сериалда этникалық жөн-жоралғылар көп болады, бірақ белгілі бір этностың салтына байланып қалмайды. Сценарийшілер Бромның, Лавкрафттың, Клайв Баркердің, Стивен Кингтің еңбектерінен шабыт алған. Ал түсіру тобы локацияны қазақ даласынан таңдаған кезде Эндрю Ньюэлл Уайеттің картиналарына сүйенген.

Жобаға орыс, бурят, қазақ актерлері қатысады. Өндірісті ресейлік 1-2-3 Production компаниясы жүргізеді.