24 желтоқсан: корей киллері, сөйлейтін кенгуру, Крудстар отбасы

24 желтоқсанда Қазақстан прокатына Корей режиссері Хон Вон-чханның экшн-триллері, Лин Шэй мен Тобин Белл түскен америкалық хоррор, сөйлейтін кенгуру туралы неміс комедиясы, өрт сөндірушілер жайында ресейлік драма, DreamWorks студиясының «Крудстар» анимациялық картинасының жалғасы шықты.

Жамандықтың беті аулақ / Избави нас от лукавого / Daman akeseo guhasoseo [18+]

Корей режиссері Хон Вон-чханның экшн-триллері Ин-нам есімді кейіпкер туралы. Ол бұрын Оңтүстік Кореяның арнайы қызметінде жансыз болған, енді тапсырыспен кісі өлтіреді. Соңғы тапсырмасын орындап Панамаға кетуді ойлайды. Соңғы миссиясы – якудза басшысын өлтіру. Бір күні бұрынғы ғашығын өлтіріп кеткенін біледі. Ал кішкентай қызын әлдекімдер алып кеткен. Ин-нам баланы іздеуге шығады. Осы кезде якудза басшысының інісі кек қайтармақ болып соңына түседі.

Қоңырау / Проклятие Лауры: Завещание / The Call [18+]

Америкалық хоррордың оқиғасы 1987 жылы өрбиді. Мыстан атанып кеткен кемпірдің үйінің маңында Лаура есімді қыз жоғалып кетті деген аңыз бар. Бірде күні бір топ жас ұл-қыз әлгі кемпірдің үйіне барады. Ертесіне қария қайтыс болады да, жастарға 100 мың долларды мұра қылып қалдырады. Алайда оны алудың шарты бар: олар мыстанның телефонына қоңырау шалу керек. Осыдан кейін тозақтың порталы ашылады. Кейіпкерлер аман қалу үшін бұрын жоғалып кеткен Лаураның қарғысының құпиясын ашу керек.

Фильмнің актерлік құрамында Лин Шэй, Тобин Белл сияқты ардагерлер бар.

Кенгурудің хикаясы / Осторожно, Кенгуру! / Die Känguru-Chroniken [16+]

Герман комедиясынан анимацияланған кенгурудің басынан өткен қызықты оқиғаларды көресіз. Басты кейіпкер – Марк деген музыкант. Бір күні оның есігін сөйлей алатын Кенгуру қағады. Осы күннен бастап ол Марктің өміріне етене араласып, қызық пен ыңғайсыз оқиғаларға толы күндер басталады.

Өрт / Огонь [6+]

Константин Хабенский ойнаған Ресей драмасы. Фильмнің басты кейіпкерлері – өрт сөндірушілер мен құтқарушылар. Өзгелер үшін ерлік деп саналған нәрсе оларға – жай ғана жұмыс. Олар қиын жағдайға тап болған адамдарды құтқарады, өлімнен арашалайды, тілсіз жаумен күреседі.

Крудстар: Жаңа дәуір / Семейка Крудс: Новоселье / The Croods: A New Age [6+]

Бұл DreamWorks студиясының 2013 жылғы мультфильмінің жалғасы. Бұл жолы көне дәуірдің адамдарынан құралған отбасы жаңа баспана іздеуге шығады. Олар алғаш рет өзге отбасымен бетпе-бет келеді: Беттермандардың жағдайы жақсы, өмір салты бұларға қарағанда дамып кеткен деуге болады. Бұл ақыры текетіреске алып келеді.

Бұларға қоса прокатқа ресейлік «Полное погружение» анимациялық картинасы мен «Реальные пацаны против зомби» фантастикалық комедиясы шықты.

2020 жылғы желтоқсанның сериалдары: 2 бөлік

Желтоқсанда шығатын сериалдар басқа айлармен салыстырғанда көп емес. Оның үстіне телевизиялық сериалдар үлесі де аз. Премьералардың басым бөлігі стриминг сервистерге тиесілі болып отыр. Атап айтқанда елсіз аралға тап қыздар туралы драма, қызғаныш пен бәсекеге толы балет әлеміне арналған триллер, Стивен Кингтің культ романының желісімен түсірілген хоррор, дат фэнтези-триллері бар.

Жабайылар / Дикарки / The Wilds

Amazon Prime Video сервисі ұсынған драма әуе апатынан кейін елсіз аралған тап болған бір топ қыз туралы баяндайды. Бұнда ешкім тұрмайды, көмекке келер де ешкім жоқ. Қыздарға аралда өліп қалу қаупі төніп тұр, оның үстіне бір-бірін де танымайды. Әрқайсысының өз өткені, өз мәселесі бар. Бір-бірімен сыр бөлісуге де, бірігіп қауіпке қарсу тұруға да дайын емес. Сол себепті арадағы шиеленіс өрши түседі.

Премьерасы: 12 желтоқсан.

Майда әдемі бұйымдар / Хрупкие создания / Tiny Pretty Things

Netflix платформасының драмасында басты оқиға Чикагоның элиталы балет мектебінде өрбиді. Бұл жерде оқыс оқиға болып, бір оқушы қыз шатырдан құлап өледі. Оқу орнының басшылығы жағдайдың себебіне көз жұма қарайды. Осы мектепке талантты биші Невея шақырту алады. Қыз өтірікке, астыртын ойын мен қатал бәсекелестікке толы ортаға тап болады.

Премьерасы: 14 желтоқсан.

Қарсылық / Противостояние / The Stand

Стивен Кингтің культ романының желісімен түсірілген хоррор элементтері бар фантастикалық мини-сериал. Сюжеті постапокалипсис әлемде өрбиді. Жер халқы қатерлі вирустан қырылып қалады. Аман қалған америкалықтар екі қарсы топқа бөлініп кетеді. Біреуін мейірімді Абагейл ана басқарады. Ол Інжіл өсиеттері арқылы жаңа қоғам құруға тырысады. Екінші топты билікшіл, қатыгез Рэндалл Флэгг басқарады, оның мақсаты – қатал тоталитар қоғам құру.

Актерлік құрамд Джеймс Марсден, Эмбер Херд, Вупи Голдберг, Александр Скарсгард, Мэрилин Мэнсон, Эзра Миллер секілді жұлдыздар бар.

Премьерасы: 17 желтоқсан.

Эль Сид / El Cid

Amazon Prime Video сервисінің тарихи драмасы испан патшаларының текетіреске толы өмірінен сыр шертеді. Эль Сид есімді жас дворян Санчо әміршіге адал қызмет етеді. Ол әкесінен мұра болып қалған қылышпен шебер шайқаса алады. Санчоның бауырымен текетіресінде жеңіске жетуіне Эль Сид көмектеседі. Осылайша патша сарайынан жақсы лауазымға үмітті еді. Бірақ қан мен қайғыға әкелер астыртын ойынның ортасына тап болады.

Премьерасы: 18 желтоқсан.

Бриджертон / Bridgerton

Netflix стриминг сервисінің драмасы америкалық жазушы Джулия Куиннің тарихи махаббат романдар сериясын негізге алған. Оқиғасы ХІХ ғасырдың басында Лондонда өрбиді. Сериал байлық, сатқындық, нәпсіқұмарлық сияқты Регенттік кезеңнің зиялы қауым өкілдеріне тән болған қасиеттерді сөз етеді. Желісі қуатты да ықпалд Бриджертон отбасының көзімен беріледі.

Премьерасы: 25 желтоқсан.

Теңелу / Равноденствие / Equinox

Netflix ұсынған дат фэнтези-триллері. Сюжеті Астрид деген әйелдің төңірегінде өрбиді. Ол 1999 жылы мектеп автобусының жоғалғанына куә болған еді. Оның ішінде сіңлісі Ида да болды. Бұл оқиға қыздың санасына қаяу түсіріп, бүкіл өміріне әсер етеді. Жиырма жыл өткен соң Астрид радиода жұмыс істейді. Бір күні эфирге әлдекім хабарласып, сол жоғалған автобуста болғанын, ішіндегі балаларға не болғанын да білетінін айтады.

Премьерасы: 30 желтоқсан.

Кезекті маусыммен шыққан сериалдар:

14 желтоқсан:
– Пенниуорт / Pennyworth; драма, фэнтези, боевик, қылмыстық (АҚШ): 2 маусым;

17 желтоқсан:
– Пространство / The Expanse; фантастика, детектив (АҚШ): 5 маусым.

Соңы.

10 желтоқсан: Мутанттардың соңғы тұяғы және ішіп кеткен Мадс Миккельсен

Бүгін тарих қойнауына кеткен 20th Century Fox студиясының соңғы кинокомиксі кешігіп болса да прокатқа шықты. Сондай-ақ кинотеатрлардан Роберт Де Ниро, Морган Фриман, Томми Ли Джонс үштігі бас қосқан экшн-комедияны, Мадс Миккельсен ойнаған драманы, Дайан Лэйн мен Кевин Костнер түскен триллерді көруге болады.

Жаңа мутанттар / Новые мутанты / The New Mutants [16+]

Бұл 20th Century Fox студиясының (қазір бұл студия Disney құрамына енді) «Икс адамдар» киносериясына кіретін ақырғы кинокомиксы. Фильмде құпия мекемеге тап болған жасөспірімдер туралы баяндалады.

Әлдебір тылсым да күшті құйын жүріп өткеннен кейін Дэниель Мунстар аурухана төсегінде есін жияды. Бұл мекемеде одан бөлек тағы төрт жасөспірім болады. Оларға түрлі сынақ жүргізіліп, ерекше қабілетін бақылауда ұстауды үйретеді. Бұл мекеннен өз еркіңмен шыға алмайсың, ал қамаудағы балаларға шындықтан айырмасы жоқ елестер көріне бастайды.

Фильмге Блю Хант, Алиси Брага, Мэйси Уильямс, Аня Тейлор-Джой, Чарли Хитон, Генри Зага түсті.

Кері қайтатын жол / Афера по-голливудски / The Comeback Trail [16+]

Роберт Де Ниро, Морган Фриман, Томми Ли Джонс секілді Голливуд ардагерлерінің басын қосқан экшн-комедия. Сюжетте Макс Барбер есімді әккі кинопродюсер мафия боссына қарыз болып қалады. Тез арада ақша табудың бір ғана амалы бар – кино жұлдызы өліп қалса ірі көлемде сақтандыру ақысын алуға болады. Ол үшін түсірілімге жарылыс көріністері мен қауіпті трюктерді көбірек қосу керек.

Жұмысбасты / Еще по одной / Druk [18+]

Дат кинематографшысы Томас Винтербергтің картинасы қызық эксперимент өткізген төрт мұғалімнің хикаясын баяндайды. Тарих профессоры, психолог, экономист мен дене тәрбиесі мұғалімі барға барып, адам қанына алкоголь жетпегендіктен жұмыс қабілеті төмендейді деген теорияны тексеріп көрмек болады. Көп кешікпей бұл эксперимент шектен шығып кетеді.

Фильмде басты рөлдердің бірін Мадс Миккельсен ойнайды.

Оған еркіндік бер / Кровные узы / Let Him Go [18+]

Дайан Лэйн мен Кевин Костнер ойнаған қылмыстық драма ерлі-зайыпты туралы. Бұрынғы шериф Джордж бен жары Маргарет ранчода бір қалыпты өмір кешуде. Ұлының қазасы отбасындағы ахуалды өзгертеді. Ұлдан қалған немере тағдырдың жазуымен қатыгез отбасыға тап болған. Баланы қайтарып алу үшін ерлі-зайыпты бәріне дайын.

Дайан Лэйн мен Кевин Костнер осыған дейін де Супермен туралы «Болат адам» фильмінде ерлі-зайыптыны ойнаған еді.

Сондай-ақ прокатқа шыққан басқа да фильмдер:
«Дублерша» / «The Stand In» (комедия), басты рөлде: Дрю Бэрримор;
«Глубокое погружение» / «Breaking Surface» (драма, триллер);
«Бараны» / «Rams» (комедия, қызық оқиғалы, драма);
«Скуби-ду» / «Scoob!» (детектив, комедия, мультфильм, қызық оқиғалы, отбасылық);
«Линия горизонта» / «Horizon Line» (триллер);
«Вдова» (үрейлі, триллер);
«Не все дома» / «10 jours sans maman» (комедия).

2020 жылғы желтоқсанның сериалдары: 1 бөлік

Желтоқсанның бастапқы кезеңінде Мексика-Америка әншісі Селена Кинтанилья-Перестің өміріне арналған байопик, Брайан Крэнстон ойнаған судья туралы драма шығады. Басқа да қызықты жобалар туралы төмендегі шолудан оқыңыз.

Ағайынды Харди / Братья Харди / The Hardy Boys

Hulu сервисінде көрсетілетін детектив элементтері бар драма ағайынды екі жасөспірім туралы. Фрэнк пен Джо анасы қайтыс болғаннан кейін әкесімен бірге шағын қалашыққа көшіп келеді. Олар көп кешікпей анасының өліміне себеп болған бір іс туралы біледі. Ағалы-інілі балалар бұл оқиғаның ақ-қарасын өз күшімен анықтамақ болады.

Премьерасы: 4 желтоқсан.

Түнгі Жердің бояуы / Земля ночью в цвете / Earth at Night in Color

Apple TV+ стриминг сервисінің деректі сериалы түнгі әлемге мүлдем жаңа көзқараспен қарауды ұсынады. Түсірушілер бес құрлықтың жануарларының түнгі өмірін көрсету үшін бұрын-соңды қолданылмаған жаңа технологиялардың көмегіне жүгінген. Арнайы жабдық тас қараңғы түнде түрлі жануарлардың не істеп, не қоятынын көруге мүмкіндік береді. Бұның бәрі бізге бұрынғыдай негатив форматта емес, бояуы қанық бейнемен беріледі.

Премьерасы: 4 желтоқсан.

Селена / Selena

Netflix платформасында шығатын музыкалық байопик Мексика-Америка әншісі Селена Кинтанилья-Перестің өмірін баяндайды. 23 жыл өмір сүрген әнші еркектерге ғана тән деп есептелген техано деген музыка бағытының патшайымы атанды. Қысқа ғана карьерасында музыка саласында үлкен белестерді бағындырды. Алайда даңқ жолындағы қыздың жолы қиындыққа толы болды.

Сериалдың өндірісіне әншінің отбасы мүшелері атсалысты. Премьерасы: 4 желтоқсан.

Сіздің мәртебеңіз / Ваша честь / Your Honor

Брайан Крэнстон ойнаған теледрама. Сюжетте құрметті судьяның ұлы жаяу адамды қағып өлтіріп, оқиға орнынан қашып кетеді. Таныстарын, беделін пайдаланып, судья баласын қорғауға тырысады. Нәтижесінде бүкіл отбасы даулы жағдайға тап болады. Өйткені өлген адам жергілікті қылмыс серкесінің ұлы болатын.

«Сіздің мәртебеңіз» – Израилдің 2017 жылғы «Судья» сериалының америкалық ремейкі. Премьерасы: 6 желтоқсан.

Алиса аралық әлемде / Алиса в Пограничье / Imawa no Kuni no Arisu

Жапонияда түсірілген фэнтезиді Netflix сервисі ұсынады. Сериалға Харо Асоның 2010-2016 жылдары жарық көрген аттас мангасы арқау болған.

Басты кейіпкер – бар уақытын видеоойындарға жұмсайтын геймер. Оның өмірі виртуал әлемдерде уайымсыз өтіп жатады. Бір күні басты кейіпкер достарымен бірге Токионың балама нұсқасына тап болады. Оларды қатерлі ойын күтіп тұр.

Премьерасы: 10 желтоқсан.

Кезекті маусыммен шыққан сериалдар:

5 желтоқсан:
– Үлкен ауыз / Большой рот / Big Mouth; мультфльм (АҚШ): 4 маусым
– Жеке детевтив Магнум / Частный детектив Магнум / Magnum P.I.; боевик, қылмыстық, қызық оқиғалы (АҚШ): 3 маусым

7 желтоқсан:
– Ұятсыздар / Бесстыдники / Shameless; драма, комедия (АҚШ): 11 маусым
– Эйфория / Euphoria; драма (АҚШ): 2 маусым

Жалғасы бар…

3 желтоқсан: ұры Лиам Нисон мен албасты Энн Хэтэуэй

3 желтоқсанда шығатын премьералар қатарында Джейн Остин романының экранизациясы, Лиам Нисон ойнаған боевик, Роберт Земекистің мыстандар туралы фэнтезиі, жаңа есірткінің тылсым әсерін көрсететін фантастикалық триллер бар.

Эмма. / Emma. [12+]

Талантты актриса Аня Тейлор-Джойдың есімі қазір ел аузында. Әсіресе Netflix ұсынған «Патшайымның жүрісі» сериалынан кейін оның фанаттары көбейе түскен тәрізді. Енді актрисаны Джейн Остин романының экранизациясынан көреміз.

Мелодраманың оқиғасы ХІХ ғасырда Англияда өрбиді. 21 жасар Эмма Вудхаус – сұлу, ауқатты, ақылды және адамдарда тану қабілетім бар деп есептейді. Ол күйеуге ешқашан тимеймін, әкесін жалғыз қалдырмаймын деп шешеді. Жақын құрбысы тұрмыс құрып кеткеннен кейін жаңа дос табады – Гарриет деген жетім қыз. Осыдан кейін Эммаға жаңа ермек табылады – бар ақыл-айласын пайдаланып жаңа құрбысына жігіт тауып бермек болады.

Адал ұры / Честный вор / Honest Thief [12+]

Экшн киноның жұлдызы Лиам Нисон ойнаған жаңа боевик. Басты кейіпкер – кәсіби банк тонаушы. Бірақ бұл ісін тастап, тәртіпті адамға айналғысы келеді. Бірақ ұрлықпен айналыса жүріп адал болу оңай емес. Оның үстіне соңына сатқын полицейлер түседі.

Актерлік құрамда Джай Кортни, Джеффри Донован, Роберт Патрик секілді танымал актерлер бар.

Мыстандар / Ведьмы / The Witches [12+]

Роберт Земекистің отбасылық фэнтезиі ата-анасынан айырылған баланың басынан кешкен оқиғасын баяндайды. Әжесінің үйіне көшіп келгеннен кейін бұл өлкеде мыстандар өмір сүретінін біледі. Мыстандар балаларды жануарларға айналдырып жібергенді ұнатады. Бала олардан жасырынып, туысы жұмыс істейтін қонақүйде бас сауғалайды. Алайда дәл осы жерде Ең ұлы бас мыстан жасырын жын ойнақ өткізбекші.

Фильмге Октавия Спенсер, Энн Хэтэуэй, Стэнли Туччи, Крис Рок секілді жұлдыздар түсті.

Синхроник / Грань времени / Synchronic [18+]

Фантастикалық драма біртүрлі эффект беретін жаңа есірткінің салдарын баяндайды. Оны пайдаланған адамдар бірінен соң бірі өле бастайды. Жедел жәрдемнің екі дәрігері бұрын-соңды болмаған тылсым оқиғалардың куәсі болады.

Фильмде басты рөлдерді Джейми Дорнан мен Энтони Маки ойнайды.

Бұлардан бөлек бірнеше ресейлік картина, мультфильмдер прокатқа шықты:

  • «На острие» (драма, спорт); Ресей.
  • «Комета Галлея» (комедия, мелодрама); Ресей.
  • «Трое» (мелодрама, драма); Ресей.
  • «Кольская сверхглубокая» (триллер, үрейлі); Ресей.
  • «Изгоняющий дьявола: Инсомния» / «Awoken» (үрейлі); Аустралия.
  • «Повелитель драконов» / «Dragon Rider» (мультфильм); Германия.
  • «Союз зверей: Спасение двуногих» / «Pets United» (мультфильм); Германия, Қытай.

26 қараша: корей зомби-хорроры, Роберт Де Ниро, қара нәсіл Питер Пэн мен Алиса

Түбек / Поезд в Пусан 2: Полуостров / Bando [18+]

Оңтүстік Корея режиссері Ён Сан-хоның 2016 жылғы «Пусанға апаратын пойыз» зомби-хоррорының жалғасы. Сюжеті бірінші фильмнің оқиғасынан кейін төрт жыл өткен соң өрбиді. Кореяны зомбиға айналған адамдар кезіп жүр. Індеттен аман қалғандары қалың қабырғаның ар жағында бас сауғалауға мәжбүр. Осындай жабық аймақтардың біріне Гонконгтан бір жасақ аттанады. Олардың мақсаты – ақша тиелген жүк көлігін табу. Оларды апокалипсис әкелген қатерден бөлек, өзара қырқысқан адамдардың қатігез ойыны күтіп тұр.

Атамен соғыс / Дедушка нелегкого поведения / The War with Grandpa [6+]

Роберт Де Ниро басты рөлде ойнаған отбасылық комедия. Одан бөлек Оакс Фигли, Кристофер Уокен, Ума Турман түсті.

Басты кейіпкер – Эд есімді зейнеткер. Супермаркетте күзетшімен төбелескен соң, полицияның кеңесімен қызының үйіне көшіп келеді. 12 жасар жиені Питер бұл жағдайға қуана қоймайды. Өйткені оның бөлмесін атасына беріп, өзін шатырдың астындағы бөлмеге көшіреді. Әділетсіздікке көнгісі келмеген бала атасына соғыс жариялайды. Бірақ атасы да оңай берілуді білмейтін жан.

Арман мекен / Страна грёз / Dreamland [18+]

Финн Коул мен Марго Робби түскен драманың оқиғасы 1930 жылдары өрбиді. 17 жасар Юджин банк тонаған әйелді қолға түсірмек болады. Оның басына ақшалай сыйлық тағайындалған. Юджин әйелді ұстап, сыйды алса отбасы фермасын борыштан құтқармақ.

Қаш / Взаперти / Run [16+]

Сара Полсон ойнаған триллер. Фильмде ана мен қыздың қарым-қатынасы суреттеледі. Хлоя – арбаға таңызған мүгедек, үнемі дәрі ішеді, үйде оқып, ешкіммен араласпайды. Диана – қызын толықтай бақылап, ерекше күтіммен тәрбиелеп отырған ана. Хлоя өскен сайын бұл жерде әлдебір құпия барын сезеді.

Сандырақ / Дичь / Freaky [18+]

Винс Вонның қатысуымен түсірілген комедия элементтері бар триллер. Басты кейіпкер – түсініксіз жағдайдан кейін жаны маньяктың тәнімен ауысып кеткен бойжеткен. Ол 24 сағаттың ішінде бәрін қалпына келтіруі керек, әйтпесе жағдай ушығып кетеді.

Питер Пэн и Алиса в стране чудес / Come Away [6+]

Екі ертегінің кейіпкерлері тоғысатын жаңа фэнтези. Алиса Ғажайыптар еліне, Питер Пэн Жоқландияға аттанбас бұрын олар ағалы-қарындасты болған екен. Екеуінің қиялдай білу қабілеті ата-анасынан қалған. Отбасы қандай қиын жағдайға ұрынбасын, армандауды ешқашан доғарған емес.

Фильмді «Батыл жүрек» режиссері, «Оскарлы» Бренда Чепмен түсірді. Актерлік құрамда Анджелина Джоли, Дэвид Ойелоуо, Гугу Мбата-Роу, Майкл Кейн секілді жұлдыздар бар.

Бұлардан бөлек прокатқа ресейлік «Подольские курсанты» әскери драмасы мен «Глубже!» комедиясы, мексикалық «Академия монстров» және «Кот под прикрытием» қытай-француз мультфильмдері шықты.

P.S. Шолудағы премьералардан бөлек 23 қарашада прокатқа 2 отандық картина шықты: Нияз Әбдіғапардың «Туча» боевигі және Әсел Аушакимованың «Welcome to the USA» драмасы.

2020 жылғы қарашаның сериалдары: 3 бөлік

Қарашаның сериалдарына арналған шолудың соңғы бөлігіне Marvel киноғаламына арналған деректі сериал, Гималайға барған монхинялар туралы драма, Кейли Куоко ойнаған мистикалық комедия еніп отыр.

Земля-616 / Marvel’s 616

Деректі сериал-антология Marvel компаниясын мәдени феномен ретінде зерттейді. Әр бөлім – осы ауқымды ғаламның дамуына үлес қосқан адамдар туралы жеке әңгіме. Сериал әлемге әйгілі суретшілер туралы, комикс индустриясындағы алғашқы әйелдер туралы, Marvel-дің ұмыт болған кейіпкерлері туралы, фанаттар мен косплей туралы, Marvel Comics баспасымен байланысты басқа да жайттар туралы баяндайды.

Сериалдың атауы – Marvel’s 616 ғаламына сілтейді. Яғни комикстарда Marvel’s 616 деп комикстардың негізгі оқиғалары өрбитін әлемді атайды. 7 эпизодтан тұратын жоба Disney+ сервисіне 21 қарашада шығады.

Қара нарцисс / Черный нарцисс / Black Narcissus

Румер Годден деген жазушының аттас романының желісімен түсірілген мини-сериал. Осы шығарма негізінде 1947 жылы толықметраж фильм шыққан екен.

Сюжетте бірнеше католик монахиня Гималайда орналасқан алыс елді мекенге аттанады. Олардың мақсаты – сол жерде мектеп тұрғызу. Миссионерлерді жергілікті халық жылы қабылдай қоймайды, оның үстіне өз арасында келіспеушілікке ұрынады.

Драманың премьерасы 23 қарашада.

Қоңыраудың арқасында аман қалғандар / Спасенные звонком / Saved by the Bell

Peacock стриминг платформасының комедиясы 1990 жылдары көрсетілген ситкомды жалғастырады. Түпнұсқа сериалдың басты кейіпкері Зак Моррис ержетіп, Калифорнияның губернаторы болады. Оның бастамасымен көптеген даулы шешімдер қабылданады: жұмысшылар санатына арналған мектептер жабылып, оқушылар элитаға арналған беделді мектептерге орналастырылады. Экспериментке кезінде Моррис білім алған, қазір ұлы Мэк оқып жатқан Бэйсайд мектебі де қатысады.

Премьерасы: 25 қараша.

Бортсерік / Стюардесса / The Flight Attendant

HBO Max-тың мистикалық триллерінде басты рөлде «Үлкен жарылыс теориясының» жұлдызы Кейли Куоко ойнайды. Сюжетте ұшақта бортсерік болып істейтін Кэсси деген қыз туралы баяндалады. Бір күні сауық кешінен кейін таңертең өліктің жанында оянады. Қыз кеше не болғанын есіне түсіре алмайды, сол себепті оқиғалар ретін анықтауға кіріседі.

Премьерасы: 26 қараша.

Соңы.

19 қараша премьералары: Лиам Нисон мен Омар Си және хоррорлар

Осы аптаның премьералар қатарында үрейлі фильмдер көп. Олардан бөлек Лиам Нисон ойнаған комедия мен Омир Си түскен отбасылық фэнтези бар.

Италияда жасалған / Сделано в Италии / Made in Italy [12+]

Актерлігімен белгілі британдық Джеймс Д’Арсидің режиссерлік жұмысы. Басты рөлде – Лиам Нисон.

Сюжеті Лондонда тұратын Роберт деген суретшінің төңірегінде өрбиді. Ұлы Джекпен бірге қайтыс болған әйелінен мұраға қалған ескі үйді сатпаққа Тосканаға келеді. Екеуі үйге кішігірім жөндеу жүргізіп, кері қайтпақшы. Алайда Италияда ұзағырақ қалуға мәжбүр болады. Осы күндері әке мен бала әлдеқашан суып үлгерген қарым-қатынасты жақсартуға тырысады.

Ұмыт болған ханзада / Папина дочка / Le prince oublié [12+]

Омар Си ойнаған француздың отбасылық комедиясы әке мен кішкентай қыздың оқиғасын баяндайды. Джиби қызына күн сайын жатар алдында ертегі айтып беретін. Екеуі кішкентай перизаттар мен алып айдаһарлар тұратын сиқырлы әлемді ойлап тапқан еді. Бұл ертегіде әкесі кішкентай ханшайымын кез келген қауіптен құтқаратын. Бір күні олардың ертегі әлемінде жаңа ханзада пайда болады. Ол – Софияның сыныбындағы бала. Енді Джибидің алдында ертегіде ғана емес, шын өмірде де қызы үшін қаһарман болып қалу міндеті тұр.

Фильмді түсірген – атақты француз режиссері Мишель Хазанавичус. Ол «Артист» картинасы үшін «Оскар» алған болатын.

Антебеллум / Antebellum [12+]

Джордан Пилдің «Аулақ» хоррорын еске түсіретін картина. Сюжетте атақты жазушы, қара нәсіл әйелдердің құқығы үшін күресуші белсенді Вероника Хенли құлдыққа тап болады. Енді ол оңтүстіктегі плантацияда жұмыс істейтін, құқығы жоқ күң. Өзі секілді бейшаралармен бірге күн сайын мақта теріп, ақ қожайындардың мазағына төзуге мәжбүр. Бұл жерден қашып құтылу мүмкін емес секілді.

Маласанья 32 / Заклятье. Дом 32 / Malasaña 32 [16+]

Испан хоррорындағы оқиға 1976 жылы Мадридте болады. Бір отбасы фермасын сатып, Маласанья көшесі, 32 үй мекен-жайындағы пәтерге көшеді. Астанадан пәтерлі болу қуанышы ұзаққа бармайды. Жаңа үйде қорқынышты әлдене тұратыны белгілі болады. Көп кешікпей отбасындағы сәби жоғалып кетеді.

Дуагерлік: Мұра / Колдовство: Новый ритуал / The Craft: Legacy [16+]

1996 жылғы «The Craft» фильмінің жалғасы. Дуагерлікпен айналысатын үш бойжеткен жаңа сыныптасын қатарға қосып, төртеуі жаңа күшке ие болады. Алайда ерекше күшті алып жүру де оңай емес. Фэнтези элементтері бар хоррорды актриса Зои Листер Джонс түсірді, бұл оның екінші режиссерлік жұмысы.

Брамс: Бала 2 / Кукла 2: Брамс / Brahms: The Boy II [16+]

2016 жылғы «Бала» үрейлі триллерінің сиквелі. Бұл жолы оқиға 9 жасар Джудтың төңірегінде өрбиді. Тонаушылардың әрекетінен кейін сөйлесуден қалған бала ата-анасымен бірге жаңа жерге көшіп келеді. Хилширдегі ескі үйге келген соң бала үлкен қуыршақ тауып алады. Джудтың осыдан кейін тілі шығып, Брамс деп атаған қуыршақпен сөйлесе бастайды. Ата-ана бұл достықтың жақсылыққа апармайтынын әлі сезбеген еді.

Бұлардан бөлек «Непосредственно Каха» комедиясы мен «Гномы в деле!» неміс мультфильмі бар.

2020 жылғы қарашаның сериалдары: 2 бөлік

Қарашаның сериалдарына арналған шолуымыздың екінші бөлігінде Еуропаны азат еткен қарапайым америкалықтар туралы тарихи драма, адамдарды жоюға келген бөгде планеталық жайында фантастикалық комедия, қара нәсіл проблемаларына арналған британ драмасы бар.

Дэш пен Лили / Дэш и Лили / Dash & Lily

Netflix-те жарық көретін романтикалық комедия Лили деген арманшыл қыз туралы. Сүйікті кітап дүкенінің сөресіне қызыл қойын кітабын тастап кетеді. Оны тапқан Дэш ішіне жазба қалдырады. Сөйтіп қызыл кітапшаның ішіне бір-біріне хат жазып, түрлі тапсырмалар қалдырған екеудің арасында романтикалық оқиғалар басталады. Рождество мен романтика – екі кейіпкерді комфорт аймағынан шығып, өмірге жаңаша қарауға итермелейді.

8 бөлімнен тұратын сериал 10 қарашада шығады.

Азат етуші / Освободитель / The Liberator

Анимациялық тарихи драманы Netflix ұсынады. Сюжеті 1943 жылы Сицилияда өрбиді. Осында жіберілген отряд Американың байырғы тұрғындарынан, мексикалықтар мен ковбойлардан құралған еді. Өз жерінде бұл сарбаздар әлеуметтік және нәсілдік бөлінудің кесірінен тіпті бір барда бас қоса алмас еді. Бірақ майданда олар иық тіресе шайқасып, нацистерден Еуропаны азат ету жолында күш біріктіреді.

Премьерасы: 11 қараша.

Тұрғылықты келімсек / Пришелец-постоялец / Resident Alien

Фантастикалық комедия бөгде планетадан келген гуманоидтың Жердегі оқиғаларын баяндайды. Өліп қалған доктор Гарри Вендершпиглдің денесін иемденіп, ол біздің планетаның тұрғындарын зерттейді. Түпкі мақсаты – адамдарды жою. Адамдарды таныған сайын ол өзінің зұлым миссиясының дұрыстығына күмәндана бастайды.

Телесериалдың премьерасы 12 қарашаға жоспарланған.

Лиззи Магуайр / Lizzie McGuire

2001-2004 жылдары шыққан аттас сериалдың жалғасы. Хилари Дафф өз рөліне қайтып оралады. Жаңа эпизодтарда 30 жастағы басты кейіпкердің өмірі баяндалады. Лиззи Нью-Йоркқа көшіп келіп, сән декораторының көмекшісі болып жұмысқа тұрады. Ол үлкен қаладағы өмірге бейімделуге тырысады.

Жоба Disney+ сервисінде 12 қарашадан бастап көрсетіледі.

Кішкентай балта / Голос перемен / Small Axe

«Құлдықтағы 12 жыл» фильмі үшін «Оскар» алған Стив МакКуин жасаған мини-сериал. Бұл британ драмасы қара нәсіл өкілдерінің проблемасын қозғайды. Сюжеті Лондонда өтіп, 1960 пен 1990 жылдар аралығын қамтиды. Оқиғалар өмірден алынған.

Премьерасы бастапқыда 25 қыркүйек деп айтылған еді. Алайда кейінге шегеріліп, 15 қарашаға белгіленіп отыр.

 

Үлкен аспан / Большое небо / The Big Sky

ABC арнасының драмасы жеке детектив пен бұрынғы полицейдің бірлесіп жоғалып кеткен апалы-сіңлілі қыздарды іздеу оқиғасын көрсетеді. Оларды трасса бойында жүк көлігінің жүргізушісі ұстап алып кеткен. Тергеу барысында бұрын да осы аймақта қыздар ұрланғаны белгілі болады. Екі тергеушінің мақсаты – кезекті қайғылы оқиға болмай тұрып маньякты тез арада табу.

Премьерасы: 17 қараша.

Кезекті маусыммен шыққан сериалдар:

12 қараша:
– Чикаго полициясы / Полиция Чикаго / Chicago P.D. – 8 маусым
– Чикаго дәрігерлері / Медики Чикаго / Chicago Med – 6 маусым
– Чикаго өрт сөндірушілері / Чикаго в огне / Chicago Fire – 9 маусым

13 қараша:
– Заң мен тәртіп: Арнайы жәбірленушілер бөлімшесі / Закон и порядок. Специальный корпус / Law & Order: Special Victims Unit – 22 маусым
– 19 станция / Пожарная часть 19 / Station 19 – 4 маусым
– Грей анатомиясы / Анатомия страсти / Grey’s Anatomy – 17 маусым
– Бірмүйіз / Единорог / The Unicorn – 2 маусым

14 қараша:
– Қара тізім / Черный список / The Blacklist – 8 маусым

16 қараша:
– Тәж / Корона / The Crown – 4 маусым

17 қараша:
– Боб Абишоланы сүйеді / Боб любит Абишолу / Bob Hearts Abishola – 2 маусым
– Көрші / Соседство / The Neighborhood – 3 маусым
– Бәрі түрегелсін / Всем встать / All Rise – 2 маусым

18 қараша:
– Әскери-теңіз қылмыстық тергеу қызметі / Морская полиция: Спецотдел / NCIS: Naval Criminal Investigative Service – 18 маусым

19 қараша:
– Өмір үшін / За жизнь / For Life – 2 маусым

20 қараша:
– Миллион майда-шүйде / Миллион мелочей / A Million Little Things

Жалғасы бар…

2020 жылғы қарашаның сериалдары: 1 бөлік

Қарашаның алғашқы онкүндігінде «Бала Шелдон», «Жақсы дәрігер» секілді танымал жобалардың кезекті маусымымен қатар Чак Лоридің жаңа ситкомы, апай мен оқушының романы туралы драма ұсынылады. Осы және басқа да жаңа сериалдар туралы төмендегі шолуымызден оқыңыз.

Анимашки / Animaniacs

1990 жылдары көрсетілген мультсериалдың жаңарған нұсқасы. Сериал Якко, Вакко және Дот Уорнер деген анимациялық кейіпкерлер туралы. Олар Warner Bros. студиясында ойлап табылған еді, бірақ кейіпкерлер туралы ұзақ жылдар бойы ешкім білген жоқ. Күндердің күнінде олар қапастан құтылып, әлемге өздерін паш етеді.

Жобаның продюсерлер құрамында Стивен Спилберг бар. Премьерасы 4 қарашада (Hulu).

Үшінші оң қан тобы / Третья положительная / B Positive

«Үлкен жарылыс теориясы» сериалын жасаған Чак Лорридің жетекшілігімен шығатын жаңа ситком. Басты кейіпкер Дрю – жақында ажырасқан жалғыз басты әке. Ол бүйрегі істен шыға бастағанын, тез арада оны ауыстыру керек екенін біледі. Күтпеген жерден ескі танысы Джинамен қайта кездеседі. Ол Дрюге донор болуға келіседі. Осыдан кейін еркектің өмірі түбегейлі өзгереді.

Премьерасы: 5 қараша.

8 Ай базасы / Лунная база 8 / Moonbase 8

Ғарыш тақырыбындағы Showtime арнасының комедиясы. Сериалдың басты кейіпкерлері – кәсібилігімен, ақылымен және шапшаңдығымен мақтана алмайтын үш астронавт. Олар NASA шөлде тұрғызған Ай базасының прототипінде өмір сүріп жатыр. Кейіпкерлердің арманы – ғарышқа аттанып, Жер серігін зерттеу. Өзара бәсекеге түскен олар, өзін мейілінше жақсы қырынан көрсетуге тырысады. Әйтсе де күлкілі, ыңғайсыз жағдайларға көп ұрынады.

Премьерасы: 8 қараша.

Индустрия / Industry

HBO-ның драмасында қаржы мектептері мен институттарының түлектері туралы айтылады. 2008 жылғы қаржы дағдарысынан кейінгі күрделі кезең еді. Жастар Лондонның ірі инвестициялық банкіне қызметке тұру үшін өзара бәсекеге түседі. Достық пен серіктестіктің, махаббат пен жаулықтың шекарасы тез шайылады, көп кешікпей жас қаржыгерлер корпорация мәдениетіне бой үйретеді. Бұл жерде секс, есірткі мен эго мәміле мен дивидендтің кепілі.

Премьерасы бастапқыда 11 қазанға белгіленген болатын, шығу датасы өзгеріп, енді 10 қарашаға белгіленген.

Мұғалім / Учительница / A Teacher

Мини-сериал форматындағы драма Ханна Фиделдің 2013 жылғы көркем фильмінің желісімен жасалған. Сюжеті оқушысымен роман құрған мұғалім туралы баяндайды. Ханна Фиделдің өзі бұл жобаға продюсер, сценарийші және режиссер ретінде қатысты. Басты рөлде Кейт Мара мен Ник Робинсон ойнайды.

Премьерасы: 10 қараша.

Кезекті маусыммен шыққан сериалдар:

3 қараша:
– Жақсы дәрігер / Хороший доктор / The Good Doctor; драма (АҚШ): 4 маусым

6 қараша:
– Ана / Мамаша / Mom; комедия (АҚШ): 8 маусым
– Бала Шелдон / Детство Шелдона / Young Sheldon; комедия (АҚШ): 4 маусым

9 қараша:
– NCIS: Лос-Анджелес / Морская полиция: Лос-Анджелес / NCIS: Los Angeles; драма, қылмыстық, триллер, детектив (АҚШ): 12 маусым
– Түнек бастауы / Темные начала / His Dark Materials; драма, фэнтези (АҚШ, Ұлыбритания): 2 маусым

Жалғасы бар…