IX «Бастау» Халықаралық кинофестивалінің жеңімпаздары белгілі болды

4 желтоқсанда Алматыда IX «Бастау» халықаралық студенттік және дебюттік фильмдер кинофестивалінің салтанатты жабылу рәсімі өтті. Фестивальдің қазылар алқасы кино мейрамын қорытындылап, бірнеше номинация бойынша жеңімпаздарды анықтады.

Bastau Debuts байқау бағдарламасында Амин Найфенің «200 метр» картинасы басты жүлдені иеленді. «Үздік фильм»  аталған картина бірнеше елдердің (Палестина, Иордания, Катар, Италия және Швеция) қатысуымен түсірілген және Таяу Шығыстағы отбасының оқиғасын баяндайды. Мұстафа мен оның әйелі Салва екі бөлек ауылда тұрады. Ол ауылдар бір-бірінен 200 метр қашықтықта орналасқанымен, қабырғамен бөлінген. Бірде телефон қоңырауы естіледі, енді отбасы үшін бәріне дайын әкесі қабырғаның арғы жағына өту керек. Ол үшін 200 метр қашықтық 200 шақырымдық одиссеяға айналады…

Юрий Быков бастаған халықаралық қазылар алқасы бұл фильмге сонымен қатар «Үздік режиссура» сыйлығын табыстады. Сонымен бірге бұл конкурстық бағдарламада «Үздік актер» сыйлығын «Белый кит» фильміндегі Дайнюс Гавенонис (Ресей), «Үздік актриса» марапатын «Кто спит в серебристо-сером» фильмінде ойнаған актриса Инин Ма (Қытай) жеңіп алды. «Қазылар алқасының арнайы жүлдесі» қазақстандық Әлішер Жәдігеровтың «Отау» картинасына бұйырды.

Фестивальдің ең үздік қысқаметражды фильмі болып Тәжікстаннан келген режиссер Манзарали Шералидің «Обуза» картинасы атанды. Ресейлік Татьяна Федоровскаяның төрағалығымен өткен Bastau Shorts бағдарламасының қазылар алқасы келесі номинациялар бойынша жеңімпаздарды анықтады:

«Үздік қысқаметражды анимациялық фильм» – Шокир Холиковтың (Өзбекстан) «Қыз бен бұлт» фильмі.

«Қазылар алқасының арнайы жүлдесі» – қазақстандық режиссер Нұрбол Ерболұлының  «Түйме» картинасы.

«Ерекше атап өту» номинациясы – ресейлік Андрей Натоцинның «Катя» фильмі.

«Ерекше атап өту» номинациясы – Беларусь режиссері Юрий Семашконың «Когда я был генерал» картинасы.

Деректі фильмдер секциясында «Үздік толықметражды деректі фильм» номинациясында Украинадан келген Андрей Лисецкийдің «Иван жері» атты жұмысы жеңіске жетті. Украиналық Мария Шевченконың «Родимое пятно» картинасы «Үздік қысқа метражды деректі фильм» номинациясын ұтып алды. Ал қазылар алқасының арнайы жүлдесі қазақстандық режиссер Тілек Ырысбектің «Жұмагүлдің әлемі» картинасына бұйырды.

Халықаралық студенттік қазылар алқасы өзбекстандық режиссер Шерзод Назаровтың «Жібек жолында» картинасына фестивальдің «Үздік қысқаметражды фильмі» марапатын тапсырды. Сондай-ақ, студенттік қазылар алқасының арнайы сыйлығын режиссер Эльза Гаудждің (Латвия) «Локдаун» фильмі жеңіп алды. Ал қазақстандық режиссерлер Ділшат Рахматуллиннің «Бесік жыры» және Айдана Бауыржанқызының «Әке, ән айтып берейік бе?» жұмыстары қазылар алқасы тарапынан ерекше атап өтілді.

Атап өтсек, биыл кинофестиваль қатысушылары мен қонақтары бес күн ішінде әлемнің отыздан астам елінен 80 фильмді тамашалады.

Жыл сайынғы осы кино мерекесін ҚР Мәдениет және спорт министрлігінің, Алматы қаласы әкімдігінің, Т. Жүргенов атындағы Қазақ ұлттық өнер академиясының, Тұран Университетінің, Әль-Фараби атындағы Қазақ Ұлттық Универститетінің, Ұлттық киноны қолдау мемлекеттік орталығының және Ш. Айманов атындағы «Қазақфильм» киностудиясының қолдауымен «Tanaris Production» және A Team кинокомпаниялары ұйымдастырды.

Студенттер киносына арналған «Бастау» кинофестивалі IX рет өтеді

2021 жылғы 30 қараша мен 4 желтоқсан аралығында Алматыда IX халықаралық «Бастау» студенттік және дебюттік фильмдер кинофестивалі өтеді.

Фестивальдің негізгі мақсаты – Еуропа мен Азияның жас кинематографистері арасында ынтымақтастық орнату, олардың жұмыстарын қолдау және ілгерілету, түрлі жанрдағы кинофильмдерді жасауға деген қызығушылықты арттыру.

«Бастаудың» конкурстық бағдарламасы 3 бөлімнен тұрады: толықметраж фильмдер байқауы – Bastau DEBUTS, қысқаметраж фильмдер байқауы – Bastau SHORTS және деректі фильмдер байқауы – Bastau DOCS.

BASTAU DEBUTS байқауына 10 фильм қатысады:

  1. «Астероид» режиссер Мехди Хосейнванд Аалипур, Иран.
  2. «Соседи» режиссер Мано Халил, Швейцария.
  3. «Бара бара» режиссер Гаурав Мадан, Үндістан.
  4. «200 метров» режиссер Амин Найфех Палестина, Иордания, Катар, Италия, Швеция.
  5. «Потанцуй со мной» режиссер Никандр Федоров, Якутия.
  6. «Кто спит в серебристо-сером» режиссер Ляо Зихао, Қытай.
  7. «Белый кит» режиссер Татьяна Федоровская, Ресей.
  8. «Haildriver» режиссер Музамер Рахман, Малайзия.
  9. «Супернова» режиссер Бартош Крухлик, Польша.
  10. «Отау» режиссер Әлішер Жәдігеров, Қазақстан

BASTAU SHORTS қысқаметраж фильмдер байқауына 25 көркем және 16 анимациялық фильм қатысады. Bastau DOCS халықаралық деректі кино байқауында 7 толықметрлі және 10 қысқаметраж фильмдер ұсынылған.

Фестиваль Дәурен Қамшыбаевтың байқаудан тыс көрсетілетін дебюттік картинасы – «Зере» фильмінің ұлттық премьерасымен ашылады. Бұған дейін бұл фильм тек Бразилиядағы São Paulo International Film Festival халықаралық кинофестиваліне қатысқан. Картинада басты рөлдерде танымал жұлдыздар Берік Айтжанов, Мұрат Бисенбин, Адина Бажан және Ольга Ландина ойнайды.

Сондай-ақ, конкурстан тыс Айжан Қасымбектің «От» картинасы көрсетіледі. Фильмнің әлемдік премьерасы жақында ғана Пусандағы (Оңтүстік Корея) халықаралық кинофестивальде өтті. Сонымен қатар, биыл фильм Германиядағы Film Festival Cottbus және Сингапурдағы Singapore International Film Festival кинофестивальдеріне қатысты. Ал басты рөлді сомдаған Төлепберген Байсақалов Сочидегі X Russian British Sochi international film festival & Awards 2021 кинофестивалінде және Лос-Анджелестегі Asian World Film Festival кинофестивалінде екі бірдей марапатты жеңіп алды.

Сонымен қатар, байқаудан тыс Әділхан Ержановтың «Оңбағандар» атты жаңа фильмі және Александр Каменскийдің «Еуразия патшайымдары» деректі лентасы көрсетіледі.

Фестивальдің жеке секциялары – BASTAU FOCUS-та Ауғанстаннан 3 фильм ұсынылған. Олар режиссер Рамин Расулидің «Прошлой ночью собаки не спали» (Inter religions Award МКФ Фаджр 2021 «Үздік фильмі») картинасы, Граназ Муссавидің «Когда воют гранаты» (APSA-да «Үздің жастар фильмі» номинациясы) және Навида Махмудидің «Утонуть в святой воде» (Пусан ХКФ 2020 «ОКНО В АЗИАТСКОЕ КИНО» бағдарламасында Ким Джи Сок жүлдесін жеңген) фильмдері.

AROUND THE WORLD секциясында ірі халықаралық кинофестивальдердің жүлдегерлері – Сергей Лозницаның «Бабий яр. Контекст» деректі фильмі, Виктор Косаковскийдің «Гундасы» және Татьяна Федоровскаяның «Мамины шпильки» фильмдері көрсетіледі.

BASTAU CENTRAL ASIA-да Орталық Азияның 5 жаңа фильмі ұсынылды. Қырғызстаннан екі картина – Эмиль Атагелдиевтің «Озеро» фильмі және Дастан Жапарулу мен Бақыт Мұқулдың «Эденге жолы», Өзбекстаннан 2 фильм – Рашид Маликовтың «Неволясы» және Мансур Абдухаликовтың «Теңіз» атты фильмі және Тәжікстаннан Руми Шоазимовтың «Провинциальные мечтатели» атты жұмысы көрсетіледі.

Фестивальді ҚР Мәдениет және спорт министрлігінің, Алматы қаласы әкімдігінің, Т.Жүргенов атындағы Қазақ ұлттық өнер академиясының, Тұран Университетінің, Ұлттық киноны қолдау мемлекеттік орталығының және Ш.Айманов атындағы «Қазақфильм» киностудиясының қолдауымен «Tanaris Production» кинокомпаниясы ұйымдастырады.

Ашылу салтанаты 30 қараша күні Абай атындағы Қазақ ұлттық опера және балет театрында өтеді. Фестивальдің негізгі алаңы – Chaplin Cinemas кинотеатрлар желісі.

«Бастау» IX Халықаралық студенттік және дебюттік фильмдер кинофестивалінің кестесін –  https://bastauiff.com/  сайтынан көре аласыздар.

Ахмет Байтұрсынов туралы фильмнің түсірілімі басталды

Алматыда «Соңғы үкім» фильмінің түсірілімі басталды. Фильм қазақтың көрнекті ағартушысы, қоғам қайраткері және саяси публицист Ахмет Байтұрсыновтың 150 жылдығына арналған.

Түсірілім тобын Ерлан Нұрмұхамбетов пен Ерген Тоқмурзин басқарады. Нұрмұхамбетов «Жаңғақ тал» фильмі үшін Пусан халықаралық кинофестивалі (Оңтүстік Корея) «Жаңа ағымдар» секциясының гран-при иегері. Режиссердің «Уақыт жолдары» деген соңғы картинасы биыл Францияда прокатқа шықты. Оның серіктесі Ерген Тоқмурзин көптеген деректі фильмдердің қоюшы режиссері болған.

Картинаның сюжеті Ахмет Байтұрсыновтың өмірінің барлық кезеңін қамтиды. Басты рөлде – Қазақстанның еңбек сіңірген қайраткері Азамат Сатыбалды. Сондай-ақ картинаға Назгүл Қарабалина, Александр Багрянцев және Ерлан Кәрібаев түседі.

Түсірілімнің негізгі локациялары – Алматы қаласында және Шығыс Қазақстан облысында. Қоюшы оператор – Марс Омаров. Бас продюсер – Дастан Атығаев. Сценарий авторы – Ғалым Доскен.

Жаңа жылға дейін авторлар 14 ауысымды түсіруді жоспарлап отыр. Фильмнің негізгі бөлігі келесі жылы түсіріледі.

Картина ҚР Мәдениет және спорт министрлігінің тапсырысы бойынша Ұлттық киноны қолдау мемлекеттік орталығының қолдауымен шығарылуда. Өндірісімен «Folklore media» компаниясы айналысады.

Әділхан Ержановтың «Сары мысық» фильмі Қазақстанның атынан «Оскарға» ұсынылды

Режиссер Әділхан Ержановтың «Сары мысық» фильмі Қазақстан атынан «Оскар» жүлдесінің «Шетелдік үздік фильм» номинациясына ұсынылды. Кинотуындыны Short Brothers (Қазақстан), Ш. Айманов атындағы «Қазақфильм» киностудиясы және Arizona Productions (Франция) қомпанияларының қатысуымен Zerde Films (Қазақстан) компаниясы түсірді. 

Фильмді Бонни мен Клайд хикаясының қазақстандық интерпретациясы деуге болады. Кермек есімді жас жігіт түрмеде жазасын өтеп, қылмыстық топ иемденіп, өзінің қатал заңдарын орнатқан туған қаласына оралады. Жігіттің ғашығы Ева, қылмыскерлердің ықпалынан теріс жолға түскен, Кермек өзі де қылмысқа белшесінен батады. Бірақ ол сүйген қызымен бірге еркіндікке қол жеткізіп, кинотеатр салу туралы арманын тастамайды. Ол қалай да арманына қол жеткізуге бел байлайды…

«Сары мысық» – Әділхан Ержановтың тоғызыншы толықметражды көркем фильмі. Түсірілім жұмыстары былтыр Алматы облысында өтті. Фильмнің Бас продюсерлері: Әсел Сәдуақасова, Қанат Битеміров және Ербол Тойбаев.

Фильмнің әлемдік түсаукесері 77-ші Халықаралық Венеция кинофестивалі шеңберінде өтті. Сондай-ақ кинотуынды Ресейдің «Ника» жүлдесінің номинациясына және Asian Film Awards жүлдесінің «Үздік режиссер», «Үздік оператор» және «Үздік суретші» үш бірдей номинациясына ұсынылған болатын. 

Осы уақыт аралығында аталған фильм Қытайда өткен «Жібек жолы» халықаралық кинофестивалінде «Ерекше сценарий» жүлдесімен, Батумиде және Стокгольмде өткен Hope International Film Festival фестивалінде «Үздік режиссер» жүлдесімен, «Мәскеулік тұсаукесер» кинофестивалінде киносыншылардың жүлдесімен, Verona International Film Festival және Brugge International Film Festival кинофестивалдерінде «Үздік көркем фильм» жүлдесімен марапатталған болатын. 

Фильмнің сценарий авторлары Әділхан Ержанов пен Инна Смаилова. Продюсерлік міндетті режиссердің тұрақты әріптестері Серік Әбішев пен Ольга Хлащева атқарды. Картинаның ко-продюсері француз маманы Гийом де Сиель. Фильмнің операторы осыған дейін Әділхан Ержановтың «Үкілі кәмшат» және «Атбайдың шайқасы» фильмдерін таспалаған – Еркінбек Пітірәлиев. Қоюшы суретші – Ермек Өтегенов, музыкасын Алим Заиров және Иван Синцов жазды. Фильмге Азамат Нығманов, Камилла Нұғыманова, Санжар Мади және т.б. түсті. 

«Оскар» жүлдесінің салтанатты марапаттау рәсімі Лос-Анджелесте 2022 жылы 27 наурызда өтеді.

Жамбыл туралы кинофильмнің түсірілімі басталды

Алматыда «Жамбыл. Жаңа дәуір» фильмінің түсірілімі басталды. Картина ҚР Мәдениет және спорт министрлігінің тапсырысы бойынша Ұлттық киноны қолдау мемлекеттік орталығының қолдауымен шығады. Бұл туралы Ұлттық киноны қолдау мемлекеттік орталығы хабарлайды.

Фильм ақын, жыршы Жамбыл Жабаевтың туғанына 175 жыл толуына орайластырылған. Түсірілім тобын режиссер Жандос Құсайынов басқарады. Ол осыған дейін «Әли» және «Шабдалы» көркем фильмдерін, сондай-ақ «Жақсы адам», «Көке» сериалдарын түсірген.

Сюжетте ақынның кеңестік идеологияға қарсы шығуы сөз болады. Фильмде Жамбылдың өміріне әсер еткен айтулы оқиғалар қамтылады: ақындар слеті, ақын өлеңдерінің газет-журналдарда  жариялануы, Иосиф Гильманның Мәскеуден келуі, Жабаевтың Ораз Жандосовпен, Бауыржан Момышұлымен және дәуірдің басқа да көрнекті қайраткерлерімен кездесуі көрсетіледі.

Басты рөлде Қазақстанның Халық әртісі Досжан Жанботаев ойнайды. Сондай-ақ түсірілімге ҚР Халық әртісі Досхан Жолжақсынов, ҚР еңбек сіңірген әртістері Ерік Жолжақсынов пен Бекболат Тілеухан, Қазақстанның еңбек сіңірген қайраткері Нұркен Өтеулов, актерлер Асан Мәжит, Қажымұқан Қалымбет және Ержан Нұрымбет қатысады.

Негізгі локациялар – Алматы және Алматы облысы. Қоюшы операторы – Еркінбек Птыралиев («Бой Атбая», «Желтая кошка»). Биылғы түсірілім 32 ауысымға созылады. Фильмнің негізгі және ауқымды көріністері келесі жылы түсіріледі.

Картинаны түсірумен «Мәдениет және шығармашылық бастамаларды қолдау» Қоғамдық Қоры айналысуда. Авторлар аты аңызға айналған Жамбыл Жабаевтың өмірі мен шығармашылығы туралы бірегей фильм қазақстандықтарға ғана емес, шетелдік көрермендерге де қызықты болады деген үмітте.

Естеріңізге сала кетейік, бұл Жамбыл туралы алғашқы көркем фильм емес. 1952 жылы режиссер Ефим Дзиган «Қазақфильм» студиясында басты рөлді Шәкен Кенжетайұлы Айманов сомдаған «Жамбыл» картинасын түсірген.  1996 жылы «Қазақфильм» киностудиясы «Жамбылдың жастық шағы» фильмін ұсынды. Қанымбек (Кано) Қасымбеков түсірген картинада басты кейіпкерді Мұхамеджан Тазабеков сомдады.

Қазақстан мен Өзбекстан бірігіп Қожанасыр туралы мультфильм түсіреді

Қазақстан және Өзбекстан аниматорлары бірігіп Орталық Азия халықтарының фольклорында кездесетін танымал кейіпкер Ходжа Насреддин, немесе Қожанасыр туралы анимациялық картина жасамақшы. Жобаны ресейлік Тимур Бекмамбетов басқаратын «Базелевс» кинокомпаниясы іске асырады.

1 қазанда Ташкенттегі «Жібек жолының інжу-маржаны» халықаралық кинофестивалі аясында «Ш. Айманов атындағы «Қазақфильм» АҚ, «Базелевс» компаниясы мен Өзбекстан ұлттық кинематография агенттігі арасында келісімге қол қойылды. Аталған іс-шара Ресей мен Орталық Азия елдерінің бірлескен өндірісіне арналған басқосу барысында өтті.

Келісім құжатына «Қазақфильм» киностудиясының вице-президенті Айдархан Әділбаев, «Базелевс» компаниясының бас продюсері Тимур Бекмамбетов және Өзбекстан Республикасы Кинематография агенттігінің бас директоры Фирдавс Абдухаликов қол қойды.

Келісім бойынша, Тимур Бекмамбетовтің жаңа анимациялық жобасы аңызға айналған Шығыс кейіпкері Қожанасырдың шытырман оқиғалары Қазақстан мен Өзбекстанда өтеді. Сондай-ақ, Тимур Бекмамбетовтың «Базелевс» кинокомпаниясы «Қазақфильм» киностудиясымен және Өзбекстан Ұлттық кинематография агенттігімен бірлесіп Қазақстан мен Өзбекстанда анимация мектептерін ашады.

Орта Азия елдерінде Қожанасырды қатты құрметтейді әрі жақсы көреді және оның туған жері осында деп есептеледі. Біз KION-мен бірге ертегілер мен тәмсілдердің сүйікті кейіпкерінің шытырман оқиғалары туралы анимациялық фильмді оның отаны Шығыс пен Орталық Азияда түсіретінімізге қуаныштымыз. Сонымен қатар бұл жобада бізге жергілікті суретшілер анимация жасауға көмектеседі, – деп, пікірін білдірді Тимур Бекмамбетов.

Анимациялық картина жылдың басында Мәскеуде тұсауы кесілген Бекмамбетовтың қуыршақтар қойылымының сюжетінің желісімен түсіріледі.

Мұқағали Мақатаев туралы картина қазанда шығады

Болат Қалымбетовтың «Мұқағали» байопигі 21 қазанда прокатқа шығады. Фильмнің өндірісімен «Қазақфильм» киностудиясы айналысты.

Көркем картинаға М. Мақатаевтың өмірінің соңғы жылдары арқау болған. Сюжетте Қазақ КСР Жазушылар Одағы кезекті жиналыста ақынның тағдырын шешкен сәті көрсетіледі.

Басты рөлдерде Асланбек Жанбалаев, Толғанай Бейсембаева, Азиза Рысбаева, Бақытжан Қажымұқан, Раушан Мажитова, Бауыржан Қаптағай ойнайды.

Режиссердің айтуынша бұл фильмнің идеясы 15 жыл көкейінде жүрген. Туындының түсірілімі 2019 жылы басталып, 2020 жылы аяқталды. Түсірілім жұмыстары Өскемен, Алматы және Санкт-Петербург қалаларында өтті.

VI Baiqonyr International Short Film Festival жеңімпаздарын жариялады

VI Baiqonyr International Short Film Festival 12 қыркүйекте өз мәресіне жетті. Фестивальдің басты жүлдесін режиссер Асель Аушакимованың «Товарищ полицейский» фильмі алды.

Сонымен қатар, полицияның имидждік акциясы туралы репортаж түсіруге тиіс мемлекеттік арнаның журналисі туралы бұл фильм «Үздік оператор» номинациясында (Сардар Баймолдин) да жеңіске жетті.

Халықаралық байқаудың Гран-при жүлдесі Армениядан келген «Новогодний поросенок» картинасына бұйырды. Сондай-ақ, бұл фильм үздік ер адам рөлі номинациясын жеңіп алды.

Жеңімпаздардың толық тізімі келесідей:

Ұлттық конкурс:

«Үздік фильм» — «Товарищ полицейский» – Асель Аушакимова, Жанна Утарбаева
«Үздік режиссер» — «Түйме» – Нұрбол Ерболұлы
«Үздік сценарий» — «Граната» – Далер Мурзагалиев, Талгатбек Абишев
«Үздік оператор» — «Товарищ полицейский» – Сардар Баймолдин
«Үздік актер» — «Граната» – Марат Абайдильда
«Үздік монтаж» – «Көше ақыны» – Гүлжан Серікбай
«Үздік деректі фильм» – «Микеланджело из Тараза» – Рүстем Дастанұлы
«Үздік анимациялық фильм» – «Не выходя из комнаты» – Амина Тазиатова

Халықаралық конкурс:

Гран-при – «Новогодний поросенок» – продюсер Карина Симонян (реж. Александр Багдасарян) – Армения
«Үздік режиссура» — «Простите, что опоздали» – Лука Берадзе – Грузия
«Үздік оператор» — «Парамнезия» – Александр Кузнецов – Ресей – Әзірбайжан – Қазақстан
«Үздік сценарий» — «Мечта» – Чингиз уулу Самудин, Қырғызстан
«Үздік әйел рөлі» — «Простите, что опоздали» – Като Калотазишвили
– Грузия
«Үздік ер адам рөлі» — «Новогодний поросенок» – Aрег Геворгян, Армения
«Арнайы жүлде» — «Вторжение» – Данте Рустав, Өзбекстан

Биыл халықаралық қазылар алқасын Ресейден келген киносыншы, МТКФ Ресей Халықаралық кинофестивалінің қысқа метр байқауының іріктеушісі – Андрей Щиголев басқарды. Онымен бірге ұлттық конкурстың жеңімпаздарын ФИПРЕССИ және НЕТПАК мүшесі Гүлбара Толомушева (Қырғызстан), киносыншы Адиля Хайбуллина (Татарстан), продюсер Дина Жұмабек, дыбыс режиссері Денис Коноплев, қоюшы оператор Едіге Несіпбеков, жас режиссерлер Кристина Михайлова және Иван Ардашов таңдады.

Ал халықаралық байқаудың жеңімпаздарын «Қазақфильм» АҚ вице-президенті Айдархан Әділбаев (қазылар алқасының төрағасы) бастаған қазылар алқасы анықтады. Оның құрамына кинотанушы, киносыншы Инна Смаилова, продюсер Серік Әбішев және актриса Қарлығаш Мұхамеджанова кірді.

Baiqonyr ISFF – биыл алтыншы рет өткен Қазақстандағы алғашқы халықаралық қысқаметражды фильмдер кинофестивалі. BISFF фестиваль қатысушыларының шығармашылық «шарықтауы» және қазақстандық кинода жаңа есімдердің ашылуы үшін бастапқы алаңға айналды.

Биыл фестивальге 180 жұмыс ұсынылды, оның ішінде 23 фильм ұлттық байқаудың қатысушылары болды, ал халықаралық байқаудың қатысушылары құрамына ТМД елдерінен 13 фильм кірді.

Фестиваль Алматыда, Kinopark 11 IMAX Esentai кинотеатрында, 8-12 қыркүйек аралығында, ТМД мемлекеттерінің гуманитарлық ынтымақтастығы мемлекетаралық қорының қолдауымен, елдегі эпидемиологиялық жағдайға байланысты жабық форматта өтті.

Фархат Шәріповтың «18 килогерц» фильмі Қазанда үздік шықты

«18 кГц» фильмінің ұжымы фестивалге қатысқан жоқ. Марапатты олардың атынан киносыншы Гүлнәр Әбікеева алды. Фото: kazan-mfmk.com

Режиссер Фархат Шәріпов түсірген «18 килогерц» фильмі Қазан қаласында өткен ХVII Халықаралық мұсылман киносы фестивалінде үздік толықметражды көркем фильм аталымында бас жүлде – Гран-приді жеңіп алды. Сондай-ақ кинотуынды «Үздік операторлық жұмыс» жүлдесімен (Александр Плотников) марапатталды.

«18 килогерц» – бұл 90-шы жылдардың соңындағы жасөспрімдердің өмірінен сыр шертетін фильм. Зара Есенаманның «Хардкор» кітабының желісі бойынша түсірілген фильм биыл ақпан айында қазақстандық прокатқа шыққан болатын.

Естеріңізге сала кетсек, 2020 жылы «18 килогерц» көркем фильмі қазақ киносының тарихында алғаш рет 36-шы Варшава халықаралық кинофестивалінің бас жүлдесін жеңіп алған болатын. Кейін бұл туынды Германияның Котбус қаласында өткен 30-шы Халықаралық кинофестивальде үздік деп  танылды.

Қазіргі кезде режиссер Фархат Шәріпов «Ұлттық киноны қолдау мемлекеттік орталығы» КЕАҚ қолдауымен «Хардкор» деген кезекті фильмін түсіріп жатыр. Жаңа туынды бүгінгі күнгі нашақорлық дерті туралы баяндайды. Режиссер осы тақырып төңірегіндегі үш жұмысын трилогия ретінде ұсынбақшы. «Хардкор» – «18 килогерц» бастап берген топтаманың екінші фильмі болады.

Венеция кинофестивалі 2021: жеңімпаздар мен жүлдегерлер

Одри Диван марапаттау кезінде

78-ші Венеция халықаралық кинофестивалінің жұмысы аяқталды. 1-11 қыркүйек аралығында өткен кино мейрамында француз режиссері Одри Диванның «Оқиға» / «L’événement» драмасы «Алтын арыстанды» жеңіп алды, ал итальян мэтрі Паоло Соррентиноның «Құдайдың қолы» / «È stata la mano di Dio» картинасымен қазылар гран-приіне ие болды.

Фестивалді екі рет «Оскар» алған испан режиссері Педро Альмодовардың «Параллель аналар» / «Madres paralelas» фильмі ашып берді. Ал 4 «Оскардың» иегері Пон Чжун Хо негізгі конкурстың қазылар алқасын басқарды.

Жаңазеландия режиссері Джейн Кэмпион «Иттің күші» / «The Power of the Dog» жұмысы үшін «Күміс арыстан» алды. Вольпи кубогы жүлдесінде Пенелопа Крус («Параллель аналар» / «Madres paralelas») үздік актриса, Джон Арсилья («Жұмыста: Жоғалған 8» / «On the Job: The Missing 8») үздік актер атанды. Үздік сценарийші ретінде «Жоғалған қыз» / «The Lost Daughter» картинасын әкелген Мэгги Джилленхол марапатталды.

Қазылардың арнайы сыйлығы итальян фильммейкері Микеланджело Фраммартиноға, Марчелло Мастроянни атындағы сыйлық «Құдайдың қолы» / «È stata la mano di Dio» фильмінде ойнаған Филиппо Скоттиға берілді.

«Көкжиек» бағдарламасының негізгі конкурсында Литвадан келген Лауринас Барейшаның «Пірәдәр» / «Piligrimai» фильмі үздік шықты.

Құрметті «Алтын арыстан» сыйлығымен актерлер Роберто Бениньи мен Джейми Ли Кёртис марапатталды.