Онлайн: «Ва-Банк» және «My love is Aisulu»

Назарларыңызға екі отандық комедияны ұсынамыз. Екі фильм Youtube видеохостингіне ресми релиз болып шықты.

«Ва-Банк» [12+]

Құралай Анарбекова жетекшілік еткен тағы бір отандық комедия. Фильмді Әлішер Өтев түсірді. Ол «Брат или брак» фильміне сценарий жазып, екінші бөліміне режиссер болған еді.

Марат 10 жылдан бері істеп келе жатқан банктің директоры болғысы келеді. Құрылтайшы бұл орынға өзінің күйеу баласын қояды. Ал Маратты кассир қызметіне төмендетеді. Көп кешікпей ол ипотекасын төлей алмай, өзі істейтін банкке пәтерді қайтарады. Марат банктен кек алу үшін оны тонамақ болады. Айналасына өзі секілді жәбір көрген клиенттерді жинайды.

«My love is Aisulu» [6+]

Нұрлан Қоянбаев пен Әсел Сағатова ойнайтын романтикалық комедия.

Сюжетте сценарийшілер байқауында кезекті рет ұтылып қалған жасық Санжар туралы баяндалады. Үйіне қайтып келе жатып Айсұлу есімді қызбен танысады. Бойжеткеннің көңілінен шықпақ болып Америкада фильм түсіремін деп өтірік айтады. Бір күні Айсұлудан АҚШ-қа ұшып келемін деген хабар алады. Қыздан кешіріп сұрап, шынын айту үшін Санжар да енді Америкаға аттанауы керек.

2020 жылғы сәуірдің сериалдары: 4 бөлік

Сәуірде шығатын сериалдарға арналған шолудың төртінші әрі соңғы бөлігі. Топтамада корей, жапон, британ, қытай жобалары бар. Бастапқы үш сериалды Netflix шығарады.

Патша: Мәңгілік әміршісі / Король: Правитель вечности / The King: The Eternal Monarch

Оңтүстік Кореяда түсірілген фэнтези мелодрама екі параллель ғалам туралы. Біреуі Кореяға ұқсайды, технологиясы дамып, өмір ағыны дамудың жылдам қарқынымен келеді. Екіншісі – монарх басқаратын империя. Зұлым күштер ашқан, екі ғалам арасындағы порталды Корей императоры Ли Гон жабуға тырысады.

Премьерасы: 17 сәуір.

Түнгі уағыз / Полуночное Евангелие / The Midnight Gospel

Америкалық анимациялық комедияда ғарышқа сапар шеккен подкастшы туралы айтылады. Ол мультиғалам симуляторының көмегімен түрлі әлем тұрғындарымен сұхбат жүргізеді.

Ересектерге арналған мультсериалға комик Дункан Трасселдің подкасты арқау болған. Премьерасы: 21 сәуір.

Сауыт киген елес: SAC_2045 / Призрак в доспехах: Синдром одиночки 2045 / Ghost in the Shell SAC_2045

Жапон аниме-сериалының оқиғасы 2045 жылы өрбиді. Жаһандық дефолттың кесірінен жасанды интеллект жылдам дамып, көп кешікпей адамзат машиналармен соғысуға мәжбүр болады. Қоғамдық қауіпсіздік министрлігінің 9 бөлімінің бұрынғы киборг-полицейлері қарапайым жалданбалы жауынгерлерге айналған. АҚШ-тың батыс жағалауымен сапар шегіп келе жатып, олар киборгтардан жылдам, күшті және төзімді постадамдар түріндегі жаңа қатермен бетпе-бет келеді.

Премьерасы: 23 сәуір.

Лондон бандалары / Банды Лондона / Gangs of London

Ұлыбританияда түсірілген қылмыстық драманың оқиғасы Лондонда өрбиді. Қалада түрлі халықаралық қылмыстық топтар арасында соғыс басталады. Осындай бір ұйымның басшысын өлтіріп кеткеннен кейін жағдай ушыға түседі. Осыдан бастап кек алуды және босаған орынға таласуды көздеген топтардың арасында қанды қырғын басталады.

Премьерасы: 23 сәуір.

Джейкобты қорғау / Защищая Джейкоба / Defending Jacob

Уильям Лэндейдің 2012 жылғы аттас романы бойынша түсірілген мини-сериал. Басты рөлде Крис Эванс ойнайды.

Сюжетте округ прокурорының көмекшісі Энди Барбер туралы баяндалады. Ол бір жасөспірімнің өлімін тергейді. Бұл істің басты күдіктісі – Эндидің 14 жасар ұлы Джейкоб. Әке баласын бар күшімен ақтап алуға тырысады, бірақ айғақтың бәрі Эндиді нұсқайды.

Премьерасы: 25 сәуір.

Қарапайым адамдар / Нормальные люди / Normal People

Hulu сервисіне арналып түсірілген британ драмасы.

Мектепте Коннел есімді ұл Мэриэнн есімді қызбен кездескен еді. Бірақ бала бұл қарым-қатынас туралы ешкімге айтпады. Өйткені өзі мектептің ең танымал баласы, жергілікті футбол командасының жұлдызы болса, ал қыз, керісінше – ұялшақ оқу озаты еді. Оның үстіне Коннеллдің анасы Мэриэннің анасына тазалықшы болып жұмыс істеген еді. Мектеп бітірер алдында ғашықтар ажырасады. Бірақ екеуі бір колледжге түседі. Бұл жолы Мэриэннің соңына түскен жігіттерде есеп жоқ еді. Ал Коннелл жергілікті қауымдастыққа сіңісе алмай, қиналып жүреді.

Премьерасы: 26 сәуір.

Арзанқол ертегі: Періштелер қаласы / Страшные сказки: Город ангелов / Penny Dreadful: City of Angels

Үрейлі драманың оқиғасы 1938 жылы Лос-Анджелесте өрбиді. Қалада болған оқиға Санта Муэрте культімен және Жын ізбасарларымен байланысты болады. Шынайы оқиғалар фонында аңызбен байланысты бөтен әлемдік тылсым жағдайлар орын алады.

Премьерасы: 27 сәуір.

Мен ешқашан / Я никогда / Never Have I Ever

Оқушы қыздар туралы америкалық комедия. Басты кейіпкер – үнді қызы, өз ортасында танымал болғысы келетін жасөспірім. Алайда мінезіне бола ісі алға баспай, қиын жағдайларға ұрына береді.

Сериал Netflix сервисіне 28 сәуірде шығады.

404 код / Ошибка 404 / Code 404

Британ комедиясының сюжеті Джон Мэйор және Рой Карвер деген екі детектив төңірегінде өрбиді. Олар арнайы тергеу бөлімінің үздік мамандары. Бір күні олардың астыртын операциясы іске аспай, Мэйорға оқ тиіп, қаза табады. Оның бөлімі осындай бағалы қызметкерден айырылғысы келмейді. Сол себептен оны тірілтуге арналған экспериментке келіседі. Мэйордың денесіне оның санасының цифрлық көшірмесі енгізіледі. Бірақ технология әлі де шикілеу, сондықтан Мэйордың бойынан қателіктер байқалады.

Премьерасы: 29 сәуір.

Құрбан кім / Игра в жертву / Shui shi bei hai zhe

Тайванда түсірілген триллер. Жан түршіктірер бірнеше кісі өлімі болады. Құрбандардың денесі қатты зақымданғаны соншалықты, олардың кім екенін анықтау мүмкін емес. Полиция маньякты іздеуге шығады. Аспергер синдромы бар сотмед сарапшысы осы оқиғаларға қызының қатысы бар екенін біліп, бұл істі өзі тергемек болады.

Премьерасы: 30 сәуір.

Кезекті маусыммен шыққан сериалдар:

24 сәуір:
– «Өмірден кейін» / «После жизни» / «After Life»; драма, комедия (Ұлыбритания): 2 маусым;
– «Сүңгуір қайық» / «Подводная лодка» / «Das Boot»; драма, әскери (Германия): 2 маусым.

Соңы.

2020 жылғы сәуірдің сериалдары: 3 бөлік

Сәуірде шығатын сериалдарға арналған шолудың үшінші бөлігі. Бұнда Дэйн ДеХаан, Донал Глисон, Кейт Бланшетт, Анна Кендрик секілді жұлдыздар түскен жаңа жобалар туралы айтамыз.

Бейтаныс / Незнакомец / The Stranger

Голливудтың жас таланты Дэйн ДеХаан ойнаған триллер. Quibi мобилдік сервисіне арналып жасалған сериалдың сюжеті Клэр есімді көлік жүргізуші қыз төңірегінде өрбиді. Бір күні жолшыбай Карауэй деген жігітті ала кетеді. Танысып үлгермей жатып жігіт кісі өлтіргенін мойындайды. Социопат жүргізуші қыздан қызық оқиға айтып беруін талап етеді. Егер әңгімесі ұнамаса оны да өлтірмекші.

Премьерасы: 14 сәуір

Қаш / Беги / Run

«Еваны өлтіру» («Killing Eve») сериалының авторы жазған тағы бір триллер-мелодрама. Донал Глисонның қатысуымен түсірілген сериалда Руби есімді қыздың өмірі баяндалады. Оның өмірі бір сарынды, көңілсіз еді. Бір күні бұрынғы бойфренді Биллиден қызық ұсыныс алады. Гуруға айналған Билли оған өмір салтын толығымен өзгертіп, саяхатқа аттануды ұсынады.

Премьерасы: 14 сәуір

Сыртқы қайраң / Внешние отмели / Outer Banks

Моторлы қайықпен серуендеп жүрген бір топ жас суға батқан кемені көреді. Оның ішінен алтын қазына жасырылған картаны табады. 400 миллион долларлық қазынаны табу үшін достар АҚШ-тың шығыс жағалауын бойлай сапарға аттанады.

Сыртқы қайраң – Вирджиния-Бичтен бастап Солтүстік Каролина тұсына дейін созылып жатқан 320 шақырымдық жіңішке бөгетті аралдар тізбегі.

Премьера: 16 сәуір

Миссис Америка / Mrs. America

Кейт Бланшетт ойнайтын тарихи драма Америка заңына әйелдер теңдігі туралы өзгерту енгізбек болған белсенділер мен консервативтік партия өкілі Филлис Шлэфли арасындағы қайшылықты суреттейді. Екі тараптың текетіресі маңызды өзгерістерге әкелмекші. Оқиға Шлэфлидің көзімен де, екінші толқын феминисшілерінің көзімен де беріледі.

Премьерасы: 16 сәуір

Жындар / Дьяволы / Devils

Итальян триллері Гуидо Мария Брераның аттас бестселлері негізінде жасалған. Доминик Морган – халықаралық инвестициялық банктің бас директоры. Оның лас қулықтарының кесірінен Еуропа экономикасына нұқсан келмекші. Оның қарамағында істейтін Массимо Руджеро бұл құйтырқы тірлік туралы білгеннен кейін екі оттың ортасында қалады.

Қуыршақ / Манекен / Dummy

Басты рөлде Анна Кендрик ойнаған Quibi платформасының комедиясы. Басты кейіпкер – жазушы Кодидің ерекше қабілеті бар. Ол арсыз, қызғаншақ және өзімшіл секс-қуыршақтың дауысын ести алады. Қуыршақ Кодиге жаңа кітап жазуға көмектесемін деп, оны өзімен бірге үйге алып кетуге көндіреді.

Премьерасы: 20 сәуір.

Жаңа маусыммен шыққан сериалдар:

16 сәуір:
– «Қараңғыда біз не істейміз» / «Реальные упыри» / «What We Do in the Shadows»; комедия (АҚШ): 2 маусым

17 сәуір:
– «Қараңғыда» / «В темноте» / «In the Dark»; драма (АҚШ): 2 маусым

18 сәуір:
– «Босх» / «Bosch»; драма, детектив (АҚШ): 6 маусым

20 сәуір:
– «Фарго» / «Fargo»; драма, комедия, қылмыстық (АҚШ): 4 маусым

Жалғасы бар…

Онлайн: «Алғашқылар дәуірі» және «Off-line каникул 2»

Youtube видеохостингіне тегін көрсетілімге шығарылған фильмдер ішінде ашық ғарышқа шыққан тұңғыш ғарышкер Алексей Леоновтың ерлігіне арналған драма, әскери тілші туралы британдық картина, былтыр Германия атынан «Оскарға» ұсынылған триллер және отандық балалар комедиясы бар. Тамашалаймыз!

Алғашқылар дәуірі / Время первых / First Time [6+]

Тимур Бекмамбетов продюсер болған ресейлік тарихи картина. Басты рөлдерде Евгений Миронов пен Константин Хабенский ойнайды.

1960 жылдар. Қырғи-қабат соғыстың кезеңі. Екі супердержава – КСРО мен АҚШ ғарышты бағындыру жолындағы жарыста бір-бірінен озып шығуды көздейді. КСРО ашық ғарышқа адам шығаруды жоспарлайды. Стартқа екі апта қалғанда сынақ кемесі жарылады. Себеп-салдарын анықтауға уақыт жоқ. Қауіп көп болғанына қарамастан, көшбасшылықтан айырылып қалмау үшін билік барын салып жанталасады. Тәжірибелі ұшқыш Павел Беляев пен оның серігі Алексей Леонов адамзатқа әлі белгісіз белесті бағындыруға дайын. Алайда ұшу кезінде қандай жағдайлар күтіп тұрғанын ешкім болжай алмайды. Бұл миссияның барысы әу бастан-ақ дұрыс емес еді…

Рейтинг
Кинопоиск: 7.4; IMDb: 7.3

Жеке соғыс / Частная война / A Private War [18+]

2019 жылы «Алтын глобустың» екі номинациясына үміткер болған британ әскери драмасы. Басты рөлде – Розамунд Пайк.

Фильм соғыс жүріп жатқан жерден хабар тарату үшін ыстық нүктеге аттанған тәжірибелі әскери тілші туралы баяндайды. Сюжетке 2012 жылы Vanity Fair журналында жарияланған «Мэри Колвиннің жеке соғысы» мақаласы арқау болған. Материал британдық Sunday Times газетінде шетелдік тілші болып істеген Мэри Колвин есімді танымал журналисттің қызметіне арналады.

 

Рейтинг
Кинопоиск: 6.1; IMDb: 6.7; Rotten Tomatoes: 87% (7/10)

Авторы жоқ жұмыс / Работа без авторства / Werk ohne Autor [18+]

2018 жылғы осы неміс триллері Венеция кинофестивалінде жүлде алып, «Алтын глобусқа» және «Оскарға» ұсынылды.

Фильм неміс суретшісі Курт Барнерттің өмірін баяндайды. Балалық шағы нацистік, ал жастық шағы коммунистік режимге тұспа-тұс келді. Оның тұлға болып қалыптасуына әпкесі Элизабет көп ықпал еткен еді. 1937 жылы әпкесі «шизофрения» диагнозымен психиатриялық ауруханаға жатқызылады, кейін стерилизация жасалып, өлтіріледі. Соғыстан кейін Курт көркемсурет академиясына түсіп, Элли есімді қызға ғашық болады. Бойжеткен нацистік режим кезінде эвтаназия бағдарламасының белсенді қатысушысы болған профессордың қызы болып шығады.

Рейтинг
Кинопоиск: 7.7; IMDb: 7.7; Rotten Tomatoes: 77% (7.3/10)

Off-line каникул 2 / Каникулы off-line 2 [12+]

2019 жылдың басында шыққан отбасылық комедияның екінші бөлімі. Жобаға Ақан Сатаев продюсер болды.

Бұл жолы басты кейіпкер Қайрат ірі компанияға басшылық қызметке кетеді.«Аулкемп» лагерінде басты жауапты адамдар ретінде өзінің ебедейсіз достары Дастан мен Болатты қалдырады. Олар, өз кезегінде, лагерьді бір-біріне қарсы күресетін екі топқа бөліп жібереді.

 

Рейтинг
Kino.kz: 7.8

2020 жылғы сәуірдің сериалдары: 2 бөлік

Сәуірде шығатын сериалдарына шолуды жалғастырамыз. Материалда Quibi мен Netflix сервистерінің жаңа жобалары, «Кезбе өліктердің» спин-оффы туралы айтамыз.

Көше шамдарының астында / Под уличными фонарями / When the Streetlights Go On

Жаңадан ашылған Quibi платформасы үшін жасалған 4 бөлімді детектив. Оқиғасы 1995 жылы жазда өрбиді. Шағын америкалық қалашықтың тұрғындарын шошытқан екі кісінің өлімі болады. Тергеу барысында олардың достары мен таныстарының жан түршіктірер құпиялары ашылады. Жас қыз бен мұғалімді өлтірген адамды табу қиынға соғады.

Премьерасы: 7 сәуір

Сырашы ағайын / Пивные братья / Brews Brothers

Netflix сервисіне шыққан комедия. Режиссері – «Үлкен жарылыс теориясы» / «The Big Bang Theory» ситкомын жасауға қатысқан Роберт Коэн. Сюжетте бір-бірін жек көретін, бірақ отбасы бизнесі үшін бірге жұмыс істеугі мәжбүр ағайынды Вильгельм мен Адам туралы баяндалады. Олардың XXXtreme деп аталатын пабы бар, жұрт атауына бола үнемі секс-шоппен шатастырады. Екеуі жиі ұрысады, сыра қайнатудың техникасына қатысты дауласады, бір-бірін сынап, тіпті төбелесуге дейін барады. Бірақ екеуі біріксе оларға тең келер ешкім жоқ.

Премьерасы: 10 сәуір

Кезбе өліктер: Тысқары әлем / Ходячие мертвецы: мир за пределами / The Walking Dead: World Beyond

Оқиғасы әйгілі «Кезбе өліктер» зомби-сериалының әлемінде өрбитін жаңа телешоу. Бұның сюжеті негізгі сериалдың оқиғаларынан 10 жыл өткеннен кейін басталады. Басты кейіпкерлер – зомби-апокалипсис кезінде туып-өскен балалардың алғашқы буыны. Олар жақсы қорғалған жерде өмір сүреді. Балалар тұратын қала – зұлмат басталғанға дейінгі әлемді еске түсіреді. Бірақ осындай жақсы өмірге қол жеткізу үшін алдыңғы ұрпақ көп құрбан болды және олардың ерлігін қазіргі буын ұмытқан жоқ. Бір топ жасөспірім нағыз әлемді көру үшін сыртқа шығады.

Премьерасы 13 сәуірге жоспарланған.

Жоғалған жұмақ / Потерянный рай / Paradise Lost

Мистикалық триллерде Йейтс Форсайт есімді отағасы туралы айтылады. Араға жылдар салып ол Калифорниядан Миссисипи штатындағы туған қалашығына оралады. Бірақ оны қонақжайлылық емес, қайтыс болған қарындасымен байланысы бар өткен шақтың құпиясы күтіп тұр.

Премьерасы: 14 сәуір

#РэйшонғаЕркіндік / #СвободуРэйшону / #FreeRayshawn

Quibi сервисінің қолданушыларына арналған қылмыстық драма. Басты рөлдердің бірін Лоренс Фишберн ойнайды. Сюжетте Ирак соғысының ардагері Рэйшон үйіне оралады. Ол есірткіге қатысты іске қатысты деп айыпталады. Кейіпкер жағдайға мойынсынғысы келмей туыстарымен бірге үйге бекініп алып, билікке берілуден бас тартады. Қылмыскерлермен келіссөз жүргізуді тәжірибелі полицей Стивен Пойнси қолға алады.

Премьерасы: 14 сәуір.

Үрейлі 50 штат / 50 штатов страха / 50 States of Fright

Бұл да Quibi мобилдік платформасының жобасы. Антология форматындағы сериал АҚШ-тың түрлі аймақтарында болған қорқынышты оқиғаларды баяндайды. Жобаға белгілі кинематографшы, «Зұлым өліктер» хоррорын түсірген Сэм Рэйми жетекшілік етеді.

Премьерасы: 14 сәуір

Жаңа маусыммен шыққан сериалдар:

10 сәуір:
– «Жақсы күрес» / «Хорошая борьба» / «The Good Fight»; драма (АҚШ): 4 маусым

13 сәуір:
– «Пиарщица» / «Flack»; комедия (Ұлыбритания): 2 маусым
– «Қауіпті» / «Белая ворона» / «Insecure»; комедия (АҚШ): 4 маусым
– «Еваны өлтіру» / «Убивая Еву» / «Killing Eve»; драма, қылмыстық, детектив (АҚШ): 3 маусым

14 сәуір:
– «Америкалық әке!» / «Американский папаша» / «American Dad!»; комедия, мультфильм (АҚШ): 15 маусым

Жалғасы бар…

Онлайн: «Бекзат» және «Коммивояжер»

Айдауда / От звонка до звонка / Starred Up [18+]

Британ режиссері Дэвид Маккензидің қылмыстық драмасы. Басты рөлдерде Бен Мендельсон мен Джек О’Коннелл ойнайды. Фильмде ересектер түрмесіне ауыстырылған тәртібі қиын тентек жасөспірім туралы баяндалады. Бұл жерде ол өз әкесін кездестіреді.

Картина 2013 жылы жарық көрді. Қазақстан кинотеатрларында 2015 жылы қазанда көрсетілді. Фильм сценарийші Джонатан Ассердің өмірінде болған оқиғаға сүйенген. Ол бұрын түрмеде ерікті түрде терапевт болып жұмыс істеген.

 Рейтинг: Кинопоиск: 6.7; IMDb: 7.4; Rotten Tomatoes: 99% (7.8/10) 

Асау жүрек / Это чертово сердце / Dieses bescheuerte Herz [16+]

2017 жылы шыққан неміс драмасы мейірімділік пен қайырымды болуға шақырады. Басты кейіпкер Леннидің жалғыз тірлігі – достарымен бірге сауық-сайран құру. Оның кез келген еркелігін әкесі төлейді. Онымен бір қалада 15 жасар Дэвид тұрады. Ол бар уақытын үйде өткізеді. Дэвидтің жүрегінде ақау бар және дәрігерлердің болжамы көңіл көншітерлік деуге келмейді. Ұлының жалқаулығынан шаршаған Леннидің әкесі оған жұмыс тапсырады. Енді ол Дэвидке қамқор болуы керек. Көп кешікпей екеуі достасады. Ленни балаға өмірді сезінуге, арманының орындалуына көмектеседі, ал Дэвид өз өмірі мен жақындарының өмірі үшін жауапкершілікті сезінуге сеп болады.

 Рейтинг: Кинопоиск: 7.4; IMDb: 7.0 

Саудагер / Коммивояжер / Forushande [18+]

Атақты Иран режиссері Асгар Фархадидің бұл картинасы біраз жүлденің иегері. «Шет тіліндегі үздік фильм» номинациясы бойынша «Оскар» алғанын былай қойсақ, қоржынында Канн кинофестивалінің екі жүлдесі, Азия киноакадемиясының бір марапаты бар.

Сюжеті Эмад және Рана есімді ерлі-зайыпты туралы. Эмад мектепте сабақ береді. Ал кешке жұбайы екеуі Артур Миллердің «Саудагердің өлімі» пьесасы бойынша қойылған спектаклге дайындалады. Олар көшіп келген жаңа үй береке ошағы болуы тиіс еді. Алайда бұл орын қылмыс орнына айналады.

 Рейтинг: Кинопоиск: 6.6; IMDb: 7.8; Rotten Tomatoes: 96% (7.9/10) 

Бекзат [12+]

«Хабар» телеарнасының тапсырысымен түсірілген телефильм. Былтыр қазанда алдымен картинаның кинотеатрға арналған нұсқасы ұсынылды.

Фильм Сидней олимпиадасының чемпионы, марқұм Бекзат Саттархановқа арналады. Фильмде Бекзат Саттарханов өмірінің үш кезеңі қамтылады. Балалық шағы, боз бала кезеңі және өмірінің соңғы сәті.

Басты рөлде Самат Әзімқұлов есімді жас актер ойнайды. Фильмді Мұрат Бидосов түсірді.

 Рейтинг: Kino.kz: 9.1 

Қаламгер

Бұл да «Хабар» телеарнасы үшін түсірілген Мұрат Бидосовтың картинасы. Прокатта былтыр қыркүйекте болды.

Сюжет бойынша Сәтжан есімді жас жазушы Алматыға келеді. Жазушылар Одағына қабылданып, шығармаларымен бірден көзге түседі. Ғылым жолына бет бұрып, «Алаш» тақырыбына диссертация жаза бастаған оған қысым көрсетіле бастайды. Яғни фильмде өткен ғасырдың 1970-80 жылдардағы ақын-жазушылардың басынан кешкен жағдай басты кейіпкер Сәтжан арқылы бейнеленеді. Сәтжан – жиынтық образ. Себебі драматургия заңдылығында кейіпкердің барлығын беру мүмкін емес. Кинокартинада ұлтын ұлықтаған тұлғалардың образы, оған қоса махаббат драмасы осы Сәтжанның бойынан табылады.

 Рейтинг: Kino.kz: 6.8 

2020 жылғы сәуірдің сериалдары

Сәуірдің басында Quibi стриминг-платформасы іске қосылады. Мобилдік құрылғаға арналған сервис бірден бірнеше жобасын көрерменге ұсынғалы отыр. Осы шолуда аталған жаңа сервистің 4 сериалы туралы айтамыз. Одан бөлек Apple TV+, Amazon стримингтерінің де жаңа жобалары бар.

Жарлы / …и в бедности / Broke

Туысқандар қарым-қатынасына арналған комедия. Сюжетте Джеки есімді күйеусіз ананың өмірі баяндалады. Бір күні оған сіңлісі отбасымен бірге көшіп келеді. Олар бар байлығынан айырылып, үйсіз қалған екен. Джеки енді шақырусыз келген туысқандарын да асырауға мәжбүр болады.

Премьерасы: 3 сәуір

Қараңғы түскенше орал / Домой до темноты / Home Before Dark

Жас журналист Хильда Кейт Лисяктың жазбаларына сүйенген детектив. Автор зерттеу жұмыстарын тоғыз жасынан бері жүргізіп, әкесінің көмегімен құрастырады екен.

Apple TV+ сервисіне арналған драма тоғыз жасар Хильданың атынан баяндалады. Ол отбасымен бірге мегаполистен көл жағасындағы шағын қалаға көшіп келеді. Кішкентай қыз әкесі секілді мықты журналист болуды армандайды. Көшіп келгеннен кейін ол жергілікті тұрғындардың әкесіне басқаша қарайтынын байқайды. Көп жыл бұрын осы жерде бір оқиға болған, бұны әкесі де, басқалар да еске алмауға тырысады. Хильда осы оқиғаны зерттеуге кіріседі, ал нәтижесін өз қолымен шығаратын газетке жариялайды.

Премьерасы: 4 сәуір

Күрмек төңірегіндегі аңыздар / Байки из петли / Tales from the Loop

Amazon түсірген фантастикалық сериал ғалам құпияларын зерттеуге арналған машинаның түбінде орналасқан қалашық тұрғындары туралы. «Күрмек» деп аталатын машинаның кесірінен адам сенгісіз құбылыстар болады. Біртүрлі оқиғалар қалашық тұрғындарына да әсер етеді.

Премьерасы: 4 сәуір

Өте қауіпті ойын / Самая опасная игра / Most Dangerous Game

Лиам Хемсворт пен Кристоф Вальц түскен боевик. Сериал 6 сәуірде іске қосылатын Quibi атты жаңа стриминг платформасына шығады.

Сюжет ауыр сырқаттың салдарынан аз ғана өмірі қалған Додж есімді кейіпкер туралы. Отбасына ақша қалдыруды ойлап, ол аса қауіпті ойынға қатысуға келіседі. Ойын басталған соң ереженің өзі ойлағаннан да қатаң екенін біледі.

Премьерасы: 6 сәуір

Қашқын / Беглец / The Fugitive

Сериалдың сюжеті Харрисон Форд пен Томми Ли Джонс ойнаған 1993 жылғы боевикке негізделген. Лос-Анджелес метросында болған жарылысқа Майк есімді машинист кінәлі деп танылады. Сенсацияға құмар БАҚ пен әлеуметтік желілер бұл жалған айыпты өршітіп, халық арасында дүрбелең туғызады. Майк өзінің кінәсіз екенін дәлелдеу және отбасын жазықсыз жаланың салдарынан қорғау үшін қамаудан қашып шығады.

Бұл да жаңадан ашылғалы жатқан Quibi платформасына шығады. Премьерасы: 6 сәуір.

Астаң-кестең / Вверх тормашками / Flipped

Quibi сервисіне арналған комедия. Сюжеті Джэнн және Крикет Мелфи есімді ерлі-зайыпты туралы. Еш жерде жұмыс істемейтін олар бір күні өзін үй жаңарту маманымыз деп жариялап, өз видеоблогын ашады. Бір үйдің қабырғасын бұзып жатқанда наркокартелдің жасырылған ақшасын тауып алады. Ерлі-зайыпты ақшаны телевидениеде өз реалити-шоуын ашуға жұмсап, жұлдыз болуды көздейді. Оларды көп кешікпей наркокартель мүшелері тауып алып, ескі үйді жөндеуге жегеді.

Премьерасы: 7 сәуір

Аман қалу / Выжить / Survive

Алекс Морелдің аттас романына негізделген бұл триллер де Quibi платформасына шығады. Басты рөлде «Тақтар ойыны» жұлдызы Софи Тернер ойнайды.

Басты кейіпкер – ұшағы қалың қар басқан тауға құлағаннан кейін аман қалған Джейн есімді қыз. Одан бөлек тағы бір жолаушы аман қалады. Екеуін ешкім таба алмайды, сол себепті өмір үшін арпалыста және қауіпсіз жерге жету үшін тек өзіне сенім артуға тура келеді.

Премьерасы: 7 сәуір

Кезекті маусыммен шығатын сериалдар:

3 сәуір:
– «Жоспаршыл адам» / «Все схвачено» / «Man with a Plan»; комедия, отбасылық (АҚШ): 4 маусым
– «Сирена» / «Siren»; драма, триллер, мистика (АҚШ): 3 маусым

4 сәуір:
– «Харли Квинн» / «Harley Quinn»; фэнтези, комедия, боевик, қылмыстық, қызық оқиғалы, мультфильм (АҚШ): 2 маусым
– «Болашақтың адамы» / «Человек будущего» / «Future Man»; фантастика, комедия (АҚШ): 3 маусым

5 сәуір:
– «Үйректің хикаялары» / «Утиные истории» / «DuckTales»; комедия, қызық оқиғалы, отбасылық, мультфильм (АҚШ): 3 маусым

Жалғасы бар…

Қазақстан фильмдерін көрсететін Youtube-арналар

Өткен аптада шетелдік фильмдерді заңды түрде көрсететін Youtube-арналар туралы айтып едік. Енді қазақстандық фильмдер туралы әңгімелегіміз келеді. Әдетте Youtube арқылы таралатын отандық картиналарды соны түсірген компанияның ресми аккаунтынан көре аламыз.

Жақында пайда болған тамаша жаңалық – Ш. Айманов атындағы «Қазақфильм» киностудиясы «Алтын қорға» кіретін, қазақ киносының классикасы саналатын біраз фильмді тегін таралымға шығарды. Оны осы киностудияның аккаунтындағы бөлек плейлисттен тамашалауға болады.

Енді қазіргі заманның киносы туралы. Біздің кино өндірісінде қалыптасқан құбылыстардың бірі – кинокомпания немесе режиссер өз өнімін прокат мерзімі аяқталған соң бірнеше айдан кейін Youtube хостингіне шығарады.

Жанна Исабаева Zhanna Issabayeva – тәуелсіз режиссер, сценарийші, продюсер Жанна Исабаеваның арнасы. Отандық кинематографшы бүкіл жұмысын осы жерге салды. Көпшілік оны «Ойпырмай» комедиясынан кейін тани бастады. Бірақ автордың басты жанры – әлеуметтік драма.

OMNIARS – бұл тәуелсіз кинокомпанияның арнасы. Компанияны құрушы – режиссер, актер, сценарийші және продюсер Ермек Шахмет. Талдықорғаннан шыққан кинематографшы 2009 жылы «Анаша» деген псевдодеректі картинасымен белгілі болған еді. Бұл режиссердің қолынан «Кредитомания», «Бекзат», «Selfie с мертвецами» секілді фильмдер шықты.

KANAIDAR PRODUCTION – режиссер Қанағат Мұстафин мен продюсер Айдархан Әділбаевтың компаниясы. Бұл продюсерлік орталық «Рывок», «16 қыз» және басқа да ромкомдар шығарды.

Shine Production – Баян Алагөзованың продюсерлік орталығы. Компания музыкалық жобалармен ғана емес, кино және телефильмдер жасаумен айналысатыны белгілі. Соңғы жылдары шыққан бірнеше туындысын осы арнадан табуға болады. Қысқа видеолар мен клиптердің арасында адасып кетпесеңіз болды 🙂

Koyanbayev Live – Продюсер, шоумен, актер Нұрлан Қоянбаевтың арнасы. Соңғы жылдары «Қазақша бизнес» сериясымен бірнеше фильм шығарып танылды. Арнадан оның продюсерлік етуімен жасалған фильмдерді табуға болады.

bissembin film – режиссер Асқар Бисембиннің арнасы. Бұнда оның барлық картинасы бар деп айта алмаймыз, бірақ бірнешеуі табылады. Одан бөлек біраз қысқаметраж картиналар да бар.

Nurtas Adambay – әмбебап кинематографшы Нұртас Адамбайдың арнасы. Аккаунтын тұрақты түрде жаңартатын сирек адамдардың бірі. Сол үшін бір респект жолдауға болады. Прокатта болып кеткен фильмдерінің барлығын таба аласыз.

Каникулы off-line 2 – Astana Film Fund компаниясының аккаунты. Арна атауы жарнамаланып жатқан өнімге байланысты өзгеріп тұрады. Бұнда Ақан Сатаевтың «Бизнесмены», «Районы», сондай-ақ «Каникулы OFF-LINE» картиналары жүктелген. Ал режиссердің бұрынырақтағы фильмдерін көрем десеңіз – SATAIFILM арнасы да бар.

Асель Садвакасова TV – продюсер Әсел Садуақасованың арнасында фильмдер көп емес, бірақ болашақта жаңа өнімдермен толыға түседі деген үміт бар. Әселдің продюсерлік етуімен жасалған соңғы екі картинаны осы жерден көріңіз. Ал оның актриса және продюсер ретіндегі басқа жұмыстарын 1kino.kz арнасынан көруге болады.

Corich group – актриса және продюсер Құралай Анарбекованың компаниясы. Арнада фильмдер аз, бірақ бұл да тұрақты жаңарып отыратын арна. Сол себепті әлі де фильмдер салынады деп ойлаймыз.

B8 PRODUCTION – бастапқыда «Женатики», «Городские легенды» секілді телевизиялық юмор жобалармен айналысқан компания соңғы жылдары кино өндірісіне де қатысып жүр. «Гудбай, мой бай», «Аташка на хайпе» солардың өнімі.

Назардан тыс қалған тағы қандай Youtube-арнаны білесіздер? Комментке жазыңыз, біз осы материалға қосамыз.

Онлайн: «Пусанға апаратын пойыз» және «Мен сені сүйемін»

Коронавирусқа қатысты қазіргі ахуалға орайластырған тәрізді, 2016 жылдың хиты – «Пусанға апарар пойыз» зомби-фильмі жарияланыпты. Сонымен қатар отандық режиссерлер түсірген екі картинаны тамашалауға болады.

Пусанға апаратын пойыз / Поезд в Пусан / Busanhaeng [16+]

2016 жылдың атышулы картинасы Канн кинофестивалінен кейін танымал болған еді. Оңтүстік Корея режиссері, мультипликаторы Ён Сан-хо түсірген үрейлі фильм зомби-апокалипсис туралы.

Су-ан есімді кішкентай қыз Сеулде әкесімен тұрады. Қыздың анасы Пусанда тұрады. Әкесі екеуі сол қалаға жолға шыққан кезде күтпеген оқиға басталып, беймәлім вирустың кесірінен адамдар ақылынан адаса бастайды. Пусанға аман жетудің жалғыз жолы – пойыз.

Айтпақшы бұл картинаның приквелі – 2016 жылы шыққан «Сеул» бекеті» мультфильмі.

Ана / Мамочка / Mommy [16+]

Канада кинематографшысы Ксавье Доланның 2014 жылғы драмасы. Картина Канн кинофестиваліне қатысып, әділқазылар сыйлығын алды. Сонымен қатар шет тіліндегі үздік фильм ретінде «Сезар» иегері болды.

Диана есімді жесір жасөспірім ұлын интернаттан шығарып алып, жаңа өмір бастамақ болады. Бірақ екеуі де өз бетінше өмір сүріп үйреніп қалған, бір-бірімен үйлесе алмайды. Көп кешікпей Кайла есімді көрші келіп, ұлды үйден оқыта бастағанда ахуал сәл түзеле бастағандай болады…

Көп аталы / Многодедный [14+]

Бұрынғы әнші, қазіргі кинематографшы Жеңісхан Момышев режиссер, сценарийші және продюсер болған комедия. Басты рөлде –  Тұрар Давильбеков, бұл актер кезінде «Кайрат-чемпион. Девственник №1» фильмі арқылы танылған еді.

Ерке өскен, жауапсыз жас жігіт қарттар үйіне тап болады. Ол әкесінің тағайындаумен бастық болып келеді. Оған қарияларды ғимараттан шығарып жіберуге тапсырма беріледі. Бірақ ол қарттармен жақын танысқан сайын өз әкесінің әрекеттеріне басқаша қарай бастайды.

Мен сені сүйемін / Я тебя люблю [16+]

Ернар Нұрғалиевтің 2019 жылғы мелодрамасы. Басты рөлдерде – Жандос Айбасов пен Сара Амангелді.

Сара есімді жас әнші анасының қатаң бақылауымен өмір сүреді. Бірде ережесіз жекпе-жекші Бекпен танысады. Олардың арасында сезім оты тұтанады. Алайда қыздың анасы екеуінің бірге болғанын қаламай, оларды бөлу үшін бәріне барады.

 

Youtube желісінде шетелдік фильмдерді тегін ұсынатын арналар

Қазақстанда коронавирусқа қатысты жарияланған төтенше жағдайға байланысты көпшілік жиналатын орындардың жұмысы тоқтатылғаны белгілі. Оның ішіне кинотеатрлар да кіреді.

Үйде отырып кино көру – уақытша оқшаулануға мәжбүр бұқараның негізгі ермектерінің біріне айналады. Осыған орай Youtube желісінен тегін әрі заңды түрде шетелдік кино өнімдерін ұсынатын арналар туралы айтпақпыз.

Алдымен фильмдерді еркін таралымға шығаратын арналар туралы айтып өтейік. Көбінесе бұлар – Ресей кинодистрибьюторлары мен прокат компанияларының Youtube арналары. Сонымен қатар телеарналар мен киностудиялардың ресми аккаунттары. Прокат мерзімі аяқталған кейбір кинотуындылар солардың ресурстары арқылы тегін таратылады.

VideoLand – ресейлік ірі видео-лейбл, контент агрегаторы және DVD мен BLU Ray дисктердің дистрибьюторы. Компания VOD, PAY TV, Free TV құқықтарды басқарумен айналысады. Каталогында көркем, деректі және мультипликациялық фильмдер, блокбастер мен арт-хаус, кеңестік кино өнімдері бар.

VideoLand ресейлік CD Land Group компаниялар тобының құрамына кіреді. Осы топтың құрамында тағы бір Youtube жоба бар. Ол CD Land Video деп аталады. Бұл жерде де түрлі жанрдағы фильмдер жарияланады. CD Land Group құрамына, сондай-ақ, балалар контентін жариялайтын Детский Клуб арнасы да кіреді. Бұнда мультфильмдер мен балаларға арналған көркем фильмдер жарияланады.

Filmster – лицензиялық релиздерді таратумен айналысатын ресейлік арна. Олар өндіруші студиялардан құқық сатып алып, Youtube желісіне таратады. Соңғы жылдардың хиттары мен прокаттан тыс қалған фильмдерді көруге болады.

RWV Films – фестивалдік және тәуелсіз кино туындыларын таратумен айналысатын Russian World Vision компаниясының ресми аккаунты. Бұл арнада фестивалдерге қатысатын картиналардың, түрлі хит және блокбастер фильмдердің релиздері бар. Аптасына үш реттен жаңарып отырады.

Epic Media – Ресейдің ірі продюсерлік компаниясы. Компания көпсериялы фильмдердің өндірісімен және дистрибуциясымен айналысады. Оның қорында түрлі жанрдағы 50 шақты жоба бар. Өзінің Youtube арнасына өзі өндірген сериалдар мен көп бөлімді фильмдерін шығарады.

All Media Company – Ресей мен ТМД территориясында түрлі платформаларға арналған контенттің дистрибьюторы. Атап айтқанда – кинотеатр прокатына, ТВ, Интернетке, DVD, BluRay және мобилдік құрылғыларға арналған туындылар.

All Media шетелдің The Weinstein Company, Red Granite, Wild Bunch, Studio Canal, QED International, Entertainment One секілді компанияларымен әріптестік орнатқан. Солардың контентінен құралған қорда жеті жүзден астам фильм бар.

RVISION – лицензиялық видеоконтент тарататын арна. Иегер компания туралы ақпарат көп емес. Түсінгеніміз – ақпараттық технология саласында және контент иегерлеріне сервис көрсететін компания. RVISION – кино көруге арналған жалғыз арна емес. Осы аккаунттың «Арналар» (Каналы) бөліміне өтсеңіз, осы компанияның тақырыптық арналар тізімін көре аласыздар: драмалар, Совет фильмдері, мелодрамалар, әлемдік кино, т.б.

Cinematic – әлемдік киноны онлайн тарататын компанияның арнасы. Коллекция жиі жаңарады дей алмаймыз, бірақ арасында тым тәуір және танымал фильмдер бар.

Домашний – отбасы болып көруге болатын кинохиттарды көрсететін арна. Оның серіктес арнасы – Ashtray арнасына да кіре кетіңіз. Бұнда түрлі жанрдағы жаңа фильмдер шығады.

Central Partnership – Ресейдің ірі кинодистрибьюторы және кино мен тележобалар өндіруші. Ол өзі түсірген фильмдерден бөлек, Голливудтың Paramount Pictures, Lionsgate және Summit Entertainment компанияларының туындыларын эксклюзив таратады. Youtube арнасына шетелдік хиттар салып тұрады.

Фильмдерді киностудиялардың ресми аккаунттарынан да табуға болады. Youtube-та Киноконцерн «Мосфильм»Дирекция КиноКинокомпания «СТВ» секілді арналар бар.