2021 жылғы ақпанның сериалдары: 2 бөлік

Netflix аман болсын дейміз тағы. Кіші экранның контент тапшылығын стриминг сервистер толтырып тұр. Ақпанның екінші жартысында нашақор жасөспірімдерге арналған неміс драмасы, Супермен мен Лоистың отбасылық өміріне арналған кинокомикс, басқа да бірнеше қызық жоба шығады.

Біз Зообақ балаларымыз / Мы дети станции Зоо / 

«Біз Зообақ станциясының балаларымыз» – 1978 жылы жарияланған өмірбаян кітаптың кезекті интерпретациясы. Кітапта Кристина деген қыздың мысалымен Берлиннің нашақор жасөспірімдерінің өмірі суреттеледі. Қыз 14 жасында героинға тәуелді болып үлгереді, доза үшін өзін сатады. Кітаптың және сериалдың атауы Берлиндегі «Зообақ» вокзалына сілтейді. Бұл жер 1970-1980 жылдары нашақорлардың бас қосатын орны болды.

Басты кейіпкерлер Кристина, Стелла, Басби, Бенно, Аксель және Мичи – түрлі отбасыдан шыққан алты дос. Бос уақытын олар есірткі мен музыкаға арнайды. Олар өзін іздейді, түрлі нәрселерді басынан өткізіп тексереді. Уақыт өте келе олардың тәуелділігі күшейіп, ал жасаған қылықтары қауіпті бола түседі.

Премьерасы: 19 ақпан.

Еуропа тайпалары / Племена Европы / Tribes Of Europa

Netflix ұсынған фантастикалық драманың оқиғасы 2074 жылы өрбиді. Жаһандық апаттан кейін Еуропа антиутопиялық тайпалық микромемлекеттерге бөлініп кетеді, олар өзара қырқысып, үстемдікке қол жеткізуге тырысады. Ағалы-інілі екеу мен олардың қарындасы сиқырлы кубты тауып алғаннан кейін Еуропа тағдырын шешетін қанды қырғынға ұрынады.

Премьерасы: 19 ақпан.

Супермен және Лоис / Супермен и Лоис / Superman and Lois

The CW телеарнасының DC қаһармандарына арналған киноғаламының жаңа жобасы. Супермен рөлінде тағы да Тайлер Хэклин, актер осы кейіпкерді осыған дейін «Супергерл», «Жебе», «Флеш» сериалдарында ойнады.

Сюжетте Кларк Кент зұлымдармен күресін аяқтап, жары Лоис Лейнмен кәдімгі отбасылық өмірді көрмек болады. Балалы болған соң ата-ананың тірлігі де оңай емес екенін түсінеді. Бұл да зұлымдармен күрес секілді күшті қажет етеді екен.

Лоис Лейн рөлінде Битси Таллокты көреміз, актриса The CW арнасының DC қаһармандарына арналған сериалдарының барлығына дерлік түсті.

Премьерасы: 23 ақпан.

Джинни мен Джорджия / Джинни и Джорджия / Ginny & Georgia

Netflix драмасы 30 жастағы Джорджия деген әйел туралы. Ол өмірін жаңадан бастамақ болып екі баласымен бірге басқа қалаға көшіп келеді. 15 жасар Джинни өтпелі жастың қиындығын көріп жатыр. Жаңа жерге үйренісіп, достар табу қиын болады. Бәрінен бұрын анасымен тіл табысу үлкен сынаққа айналады: анасы өткен өмірі туралы мүлдем айтпайды, кез келген проблеманы көзге ілмейді.

Премьерасы: 24 ақпан.

Кезекті маусыммен шыққан сериалдар:

20 ақпан:
– Күллі адамзат үшін / Ради всего человечества / For All Mankind; фантастика (АҚШ): 2 маусым

22 ақпан:
– Ұмытылмаған / Незабытый / Unforgotten; драма, қылмыстық, детектив, мистика (Ұлыбритания): 4 маусым

25 ақпан:
– Қалың қар / Снегопад / Snowfall; драма (АҚШ): 4 маусым

2021 жылғы ақпанның сериалдары

Ақпанда біраз танымал франшиза өнімдері бар: Ганнибал Лектердің әлемі, Эквалайзер, тіпті Дуэйн «Жартас» Джонсонның өміріне арналған жоба бар.

Жарқырауықтар көшесі / Улица светлячков / Firefly Lane

Netflix ұсынған драма аттас кітаптың желісімен түсірілген. Екі әйелдің достығы туралы. Екеуі қырық жылдан бері айырылмас дос. Тұйық мінезді, қарапайым Кейт Маларки белсенді журналист Талли Харттың үнемі көлеңкесінде болып келді. Алайда бұл екеуінің достығына еш кедергі болған жоқ, екеуінің бір-біріне деген қарым-қатынасы талай сынақтан өткен еді.

Премьерасы: 4 ақпан

Теңестіруші / Великий уравнитель / The Equalizer

CBS арнасының боевигі 1985 жылғы аттас сериалдың жаңа нұсқасы. Басты рөлде – рэпер және актриса Куин Латифа. Оның кейіпкері – көмекке мұқтаж жандарға кез келген уақытта қол ұшын беруге әзір құпия адам. Ол епті, қолынан көп нәрсе келеді және атысып-төбелесуден алдына жан салмайды.

Премьерасы: 7 ақпан

Кларисса / Clarice

Сериалдың сюжеті Ганнибал Лектер әлемінде өрбиді. Оқиғасы 1993 жылғы «Қозылар үнсіздігі» («The Silence of the Lambs») фильмінен кейін жалғасады. ФТБ агенті Кларисса Старлинг Вашингтонға оралып, сексуалдық маньяктар мен кісі өлтірушілер ісін тергеуді жалғастырады.

Премьерасы: 11 ақпан.

Оның көздері / В ее глазах / Behind Her Eyes

Британ психологиялық триллерін Netflix ұсынады. Мини-сериал форматындағы жобаның басты кейіпкері – жалғыз басты ана. Ол бастығымен роман құрып, сондай-ақ сол еркектің әйелімен достық қарым-қатынас орнатады. Қалыптан тыс махаббат үшбұрышы көп кешікпей белгісіздік пен айтылмаған сыр туралы психологиялық хикаяға айналады.

Жас Жартас / Молодой Скала / Young Rock

Өмірбаян жанрындағы телесериал спортшы әрі актер Дуэйн «Жартас» Джонсонның балалығы мен жастық шағы туралы баяндайды. Жоба оның өмірінің балалық шағынан бастап Майами университетінде футбол ойнаған сәтіне дейінгі аралықты қамтиды.

Премьерасы: 16 ақпан.

 

 

 

Кезекті маусыммен шыққан сериалдар:

8 ақпан:
– Хэрроу / Доктор Хэрроу / Harrow; драма (АҚШ, Австралия): 3 маусым

9 ақпан:
– Қара найзағай / Черная молния / Black Lightning; фантастика, боевик (АҚШ): 4 маусым

18 ақпан:
– Жағымды машақат / Приятные хлопоты / Good Trouble; драма, мелодрама, комедия (АҚШ): 3 маусым

2020 жылғы ақпанның сериалдары – 2 бөлік

Ақпанның сериалдарына арналған материалды жалғастырамыз. Әдеттегідей алдымен премьераларға тоқталамыз.

НольНольНоль / ZeroZeroZero

Италияда түсірілген қылмыстық драма Роберто Савианоның аттас бестселлеріне негізделген. Сюжетте Оңтүстік Америкадан Еуропаға келетін кокаин контрабандасы туралы сөз болады. Басты кейіпкерлер – мафия кланының басшысы Муно, оны сатып кетуді ойлаған немересі, есірткінің жолын кесуді мақсат еткен мексикалық арнайы жасақ, жергілікті наркобарондарға қызмет ететін полицей. Қысқасы «Нарко» стиліндегі сериал болатын секілді.

Премьерасы 14 ақпанда.

Утопияның күйреуі / Крушение утопии / Utopia Falls

Оқиғасы болашақта өрбитін канадалық фантастикалық музыкалық драма. Жаңа Вавилон деп аталатын Жер колониясында жыл сайын музыкалық сайыс өтеді. Оған қатысатын 24 жасөспірім үшін бұл – тарихта із қалдыруға мүмкіндік. Қала шенеунігінің қызы Алия да осы сайысқа қатыспақшы. Ол ежелгі архивтен ұмыт болған хип-хоп мәдениеті туралы біледі.

Сериал 14 ақпаннан бастап көрсетіледі.

Hi Fi / High Fidelity

Америкалық комедияда Роб есімді музыка дүкенінің иесі туралы баяндалады. Ол музыка фанаты және поп-мәдениеттің білгірі. Жақында ғана болған сәтсіз махаббатының себебін музыканың көмегімен түсінуге тырысады. Бұрынғы романтикалық қарым-қатынастарын ой елегінен өткізіп, өзінің кемшіліктерін талдайды.

Сериал Ник Хорнбидің «Фанатик» бестселлерінің еркін бейімделген нұсқасы. Премьерасы 14 ақпанда.

Қайырымды мырзаның құсы / Птица доброго Господа / The Good Lord Bird

Оқиғасы Америкада азамат соғысы жылдары өрбиді. Канзас құлдықты жақтаушылар мен қарсы шыққандар арасындағы соғыс алаңына айналған. Онион есімді жалшы бала қыз болып киініп, аболиционист Джон Браунмен бірге одақтастар армиясына қарай қашады. Ұлды қатерге толы саяхат пен тарихи оқиғалар күтіп тұр.

Драма 17 ақпанда шығады

Торуылшылар / Охотники / Hunters

Аль Пачино ойнаған драма. Сюжеті Нью-Йоркте 1977 жылы өрбиді. Нацистердің ізіне түскен торуылшылар тобы Гитлердің идеяластары қарапайым халық арасында тұрып жатқанын, АҚШ-та Төртінші рейх орнатуды көздейтінін біледі. Олар жаңа геноцидтің алдын алу үшін нацистерді іздеуге шығады.

Премьерасы 21 ақпанда.

Бұл маған ұнамайды / Мне это не нравится / I Am Not Okay With This

Чарльз Форсманның аттас комиксіне негізделген фантастикалық комедия. Сериалда Сидни есімді жас қыз туралы айтылады. Оған жасөспірімге тән – оқудағы, ата-анамен қарым-қатынасындағы, жеке өміріндегі және жыныстық жетілудені проблемалар аз болғандай, оған бойында байқалған ерекше қабілетпен күресуге тура келеді.

27 ақпанда жарық көреді.

Сондай-ақ кезекті маусымын ұсынған сериалдар:

  • 9 ақпан: Жоғары сапалы қызмет /Кайф с доставкой / High Maintenance; АҚШ; драма, комедия – 4 маусым
  • 11 ақпан: Сплит / Развод по-английски / The Split; Ұлыбритания; драма – 2 маусым
  • 13 ақпан: Нарко: Мексика / Narcos: Mexico; Мексика; драма, қылмыстық – 2 маусым
  • 14 ақпан: Байланысшы қыздар / Телефонистки / Las chicas del cable; Испания; драма – 5 маусым
  • 17 ақпан: Жақсы қыздар / Хорошие девчонки / Good Girls; АҚШ; драма – 3 маусым
  • 17 ақпан: Бөтен / Чужестранка / Outlander; АҚШ; драма, фантастика, қызық оқиғалы – 5 маусым
  • 24 ақпан: Бірден Солға хабарласыңыз / Лучше звоните Солу / Better Call Saul; АҚШ; драма, комедия, қылмыстық – 5 маусым
  • 28 ақпан: Түрленген көміртек / Видоизмененный углерод / Altered Carbon; АҚШ; драма, фантастика, қылмыстық, триллер – 2 маусым

Соңы.

2020 жылғы ақпанның сериалдары

Ақпанда шығатын жаңа және кезекті маусымын ұсынған сериалдарға шолу.

Тысқарыдан келген хабар / Отправления извне / Dispatches from Elsewhere

Америкалық драма төрт адамның оқиғасын көрсетеді. Олар бір-бірін танымайды, бірақ оларды байланыстыратын бір нәрсе бар – кейіпкерлер өмірінде бірдеңенің жетіспейтінін сезеді, алайда нақты не екенін түсінбейді. Бір күні олар күнделікті өмірдің артында қиын басқатырғы жасырылғанын біледі. Жұмбақтарды шешу арқылы кейіпкерлер біртіндеп сиқыр әлемі мен шектеусіз мүмкіндіктер әлемін ашады.

Жаңа сериал 2 ақпаннан бастап көрсетіле бастайды.

Орталық Бағдад / Центральный Багдад / Baghdad Central

Ұлыбританияда түсірілген әскери драманың оқиғасы 2003 жылы қазанда Бағдадта болған оқиға туралы. Америка әскері Иракқа басып кіргеннен кейін, осы елдің армиясы мен полициясы таратылған еді. Осыдан кейін орнаған хаос пен қылмыс арасында бұрынғы полицей Мухсин әл-Хафаджи өзінің және сырқат қызы Мроуждың қауіпсіздігін қамтамасыз етуге тырысады. Үлкен қызы Саусан із-түссіз кетіп, соны іздеуге шығады. Хафаджи көп кешікпей бұл жоғалудың артында қауіпке толы құпия жатқанын біледі.

Премьерасы 3 ақпанда.

МакМиллиондар / МакМиллионы / McMillions

Өткен ғасырдың соңында болған ірі алаяқтық туралы баяндайтын 6 бөлімді деректі сериал. 1989-2001 жылдар аралығында «Макдоналдс» фастфуд желісі 24 миллион доллардан айырылды. Бұған кінәлі – осы компанияның қауіпсіздік қызметін басқарған бұрынғы полицей. Ол жылдар бойы «Макдоналдстағы монополия» промоакциясының жүлделі стикерлерін ұрлап, сатумен айналысқан.

Сериалдың түсіріліміне «Макдоналдс» менеджерлері, адвокаттар, «жеңімпаздар», осы іске қатысы бар алаяқтар мен ФТБ агенттері қатысты.

3 ақпаннан бастап көрсетіледі.

Тергеу / Допрос / Interrogation

Қылмыстық драма шын оқиғаны тергейді және 30 жылдан астам уақытты қамтиды. Басты кейіпкер – өз анасын өлтірді деген айыппен сотталған жігіт. Ол 20 жыл бойы өзінің кінәсіз екенін дәлелдеуге тырысты. Сериалдың әр эпизоды полиция есептері мен хаттамаларына сүйенген және осы іске қатысы бар адамдардан алынған жауап төңірегінде өрбиді. Әр серияда басты кейіпкердің өмірінің түрлі кезеңдері айтылады. Сериалдың бір ерекшелігі – соңғы эпизодтан басқаларын кез келген реттілікпен көре беруге болады.

Премьерасы: 7 ақпан

Тернистый путь / Briarpatch

Розарио Доусонның қатысуымен түсірілген детектив драма. Басты кейіпкер – Вашингтон штатында жұмыс істейтін талантты тергеуші Аллегра Дилл. Диллдің детектив болып істейтін сіңлісі өз автокөлігінде жарылып қайтыс болады. Басты кейіпкер өлтірушіні табу үшін туған жеріне қайтып келеді. Тергеу барысында Аллеграның өткен шағының құпиялары да мәлім болады.

Сериал 7 ақпанда шығады.

Кэти Кин / Katy Keene

Бұл музыкалық комедия «Арчи» баспасының комикстарына негізделіп, «Ривердейл» шоуының спин-оффы саналады.

Ривердейлден шыққан жас, талантты және амбициялы достардан құралған бір топ жас туралы. Олардың арасында жас модельер Кэти Кини мен әнші Джози МакКой бар. Олар өз арманын іске асыру үшін Нью-Йоркқа келеді. Олар бай, танымал тұлғаға айналып, Бродвейді бағындыруды армандайды. Осы мақсат үшін көп жұмыс істеуге, тәуекелге баруға дайын.

Локки мен кілт / Локки и ключ / Locke & Key

Үрейлі фэнтези Нина Локки есімді жесір туралы баяндайды. Үш баласымен ол Кілттер үйі деген иелікке келеді. Жаңа үйде отбасы бақытты өмірге оралып, қайғы мен қасіретті ұмытамыз деп үміттенеді. Бірақ иелікте басқа әлемге ашылатын порталдардың сиқырлы кілттері жасырылған болып шығады. Осы кілттерді құбыжықтар да іздеп жүр.

Сериал 8 ақпанда жарық көреді.

Сондай-ақ жаңа маусымын ұсынған сериалдар:

  • 3 ақпан: Шекспир мен Хэтэуэй / Шекспир и Хэтэуэй: Частные детективы / Shakespeare & Hathaway; Ұлыбритания; комедия, мистика; 3 маусым
  • 7 ақпан: Күнәһар / Грешница / The sinner; АҚШ; қылмыстық, триллер; 3 маусым
  • 7 ақпан: Бруклин 9-9 / Brooklyn Nine-Nine; АҚШ; комедия; 7 маусым
  • 10 ақпан: Әзіл / Шучу / Kidding; АҚШ; мелодрама, комедия; 2 маусым
  • 10 ақпан: Отан / Родина / Homeland; драма, детектив; 8 маусым

Жалғасы бар…