Киностан қалай пайда болды. 2 бөлік

Сонымен Киностанның пайда болу тарихына арналған әңгімемді жалғастырайын.

Сайттың салтанатты түрде ашылуы. Фото: kerekinfo.kz

Kinostan 1.0

Сайтты жасау Садық Шерімбек деген жас сайт жасауға тапсырылды. Ол кісі қазір Michael Sherimbek деген есіммен белгілі интернет-тұлға, жазушы-саяхатшы 🙂

Процесіне қатысты дәл қазір бірнәрсе айту қиын – өйткені есімде қалмапты. Шамамен 2-3 аптадай жасалған шығар деп ойлаймын. Соңғы штрихтарын Тимирязев-Шашкин көшелерінің қиылысындағы «QWERTY» интернет-орталығында түнімен жасап, 2011 жылы 11 маусым күні таныстырдық. Сайттың алғашқы нұсқасы Joomla жүйесінде жасалды.

Сайттың ашылуы туралы пост Керекинфода әлі сақталыпты 🙂

Осы орайда дұрыс кеңестерін беріп, контент жасау мен сайт жүргізуге қатысты ақылын аямаған – қазақ блогосферасының ақсақалы Асхат Еркімбайдың есімін де атап өту қажет.

Kinostan 2.0

Киностан осы Джумлада 2012 жылдың қарашасына дейін істепті. Сосын Жалғас Ертайдың көмегімен кәсіби мамандардың қолдауына ие болдық. Олар тұтас команда жұмыс істей алатындай портал жасап берді. Ол 2019 жылдың 31 қаңтарына дейін істеп келген нұсқа болатын.

Бұл нұсқада мәтіндік контентке (жаңалық, мақала, сұхбат, фоторепортаж, т.б.) арналған бөлігіне қоса кинобаза да жұмыс істеді. Кинобазаның жұмысы Кинопоиск, IMDb жүйесіне ұқсас еді: актерлердің, режиссерлердің, сценарийшілер мен продюсерлердің жеке парақшасы, сондай-ақ фильмдердің профайлы бар.

2012-2019 жылдар аралығында Киностанның базасына 20 мыңнан астам персонаның, 3 мыңнан астам фильмнің профайлы енгізіліпті. Бұлар негізінен – екінші нұсқа іске қосылғаннан бері прокатқа шыққан шетелдік және қазақстандық фильмдер, отандық сериалдар және аздаған шетелдік сериалдар. Персоналар да осы фильмдер мен сериалдардың өндірісіне қатысқан тұлғалар.

Осы кинобазаның арқасында кассалық табыс бойынша, қолданушылардың бағалауы бойынша рейтингтер жасауға мүмкіндік болды. Бір өкініштісі қолданушыларымыз аз болғандықтан лайықты рейтинг құра алмадық. Үздік фильмдерге арналған ТОП жасау идеямыз осылай іске аспай қалды («Кинопоиск 250» секілді).

Сайт контентінің біраз бөлігін қолданушылар да жасау алатын еді. Қолданушы ретінде фильмге рецензия жазу, блог жүргізу функциялары жұмыс істеді. Бірақ жоғарыда атап өткендей – белсенді қолданушымыз аз болды.

Екінші нұсқаның ауқымы үлкен болғанын түсінген де шығарсыздар. Димаш уақыт тапшылығына байланысты сайтты бірлесе жүргізе алмаған соң, бір команданың жұмысы бір адамға біраз жүк болды. Мен де күні бойы энтузиазммен құрылған жобамен айналысып отыра алмаймын. Осылайша Kinostan 2.0 жұмысын тоқтатты.

Кім біледі, мүмкін, болашақта бұл кинопортал жобасына қайта оралармыз. Әлде біздің ісімізді басқалар жалғастырар. Қалай болғанда да осындай қазақ тіліндегі ең ірі киносайт жүргізу идеясы әлі де маңызды және ол, мейлі, менің қатысуыммен, немесе қатысуымсыз әрі дамып жатса – мен тек қуанамын.

Киностан қалай пайда болды

Сайттың тарихына арнап бірнеше пост жазу керек деп шештім. Мүмкін біреуге қызық шығар.

Сайттың идеясы 2011 жылы BlogCamp – қазақ блогшыларының алғашқы құрылтайы кезінде келді. Дәлірегі – сол шараға дайындалып жүрген кезде. Ол кезде wordpress желісінде блог ашу қазақ блогшылары арасында тренд болатын. Димаш Зиядин сол жүйеден блог ашып, көрген фильмдеріне рецензия жазып жүр екен. Ал менде сол кезде Қазақстан киносына арналған әуесқой сайтым болды – ucoz сервисінде жасалған. Қайбір дені дұрыс сайт дейсің, базардан отандық фильмдер жазылған дискілер сатып алып, сондағы видеоконтентті салып қоятынмын. Ол кезде қарақшылық, авторлық құқық деген түсінік арымды мазаламайтын.

Димаш екеуміз блог-құрылтайға дайындалып жүрген кезде таныстық. Бір күні кино туралы жазып жүрген посттарымызды талқылап отырып, екеуміз бір сайт құрсақ қалай деген идея келе қалды. Оның үстіне алда болатын BlogCamp кезінде стартаптар конкурсы өтетін еді. Жеңімпазға жобаны дамытуға аздап қаржылай көмек берілмек. Болашақ сайтымызды сол конкурсқа ұсынамыз деп шештік.

BlogCamp дайындығы. Димашпен осы күні таныстық 🙂 Фото: newreporter.org

Киностан жобасы туралы алғашқы презентация BlogCamp-2011 аясындағы сайттар байқауында көрсетілді. Өкінішке қарай конкурстан ештеңе ұтпадық. Домен, хостинг секілді шығындарды осы байқаудан ұтқан тиын есебінен жабамыз деп үміттеніп едік. Енді өз қалтамыздан шығарамыз деп шештік.

BlogCamp наурыз айында өтті. Ал біз сайтты әне жасатамыз, міне жасатамыз деп жүріп жазға дейін созып алдық. Айтпақшы сайтты «Киностан» деп атауды ұсынған – қазақ блогосферасындағы, жалпы қазақша интернет әлеміндегі белгілі тұлға Аршат Оразов.

Ал келесі постта сайтты кім жасағанын айтып беремін. Ол адамды қазір бәрі таниды 😉