• Біздің парақшалар:
  • pецензиялар (барлығы: 408)

  • Айкона

    Барлық рецензиялар: 134

    "Арыстан патша" көбіміздің балалығымызбен тығыз байланысты болғандықтан балалардан гөрі үлкендер көп күткен сияқты. Себебі, сүйікті мультфильміз енді қалай болады, сол эмоцияны сыйлай ала ма деген үміт көбірек болған сияқты.

    Disney түсіріп жүрген соңғы формат ұнайды, прям қасыңда жүргендей әсер береді. Мүмкін, мен IMAXпен қарағандықтан солай көріне ма, бірақ сондай әдемі. Бір уақыт осы әдеміліктің ішінде жүргендейсің.

    Сценарий өзімізге таныс болғандықтан қатты бір әсер күтпедім. Ескі нұсқасында жылаған адамдар сондай эмоция күткен сияқты, алай да олай болмады. Мен аздап сценарий өзгеретін шығар деп күткем, бірақ өзгермеген.

    Маған ұнамаған нәрсе музыка болды, мүмкін оригиналдағы әндерді қалдыру керек пе еді, бірақ Ресей әншілері орындаған әндер қатты әсер етпеді.

    Жалпы алғанда, фильм әдемі және сіздің балалағыңызды естелігін еске салады. Бұрынғы бөлімін қарамаған адамға фильм жақсы әсер етіп, балаларға ұнайтыны анық. Картинканың әдемілігі үшін қайта-қайта көрер ем.

     

  • Айкона

    Барлық рецензиялар: 134

    Трейлерін қараған кезде аздап сенімсіздік болған, бірақ фильм сондай көңілді шыққан. Питердің жасына сай жастықтың желі есіп тұр + жаз болғандықтан фильм көңілді әрі қызықты болды. Таңдалған музыкаларда позитивке толы.

    Иллюзия қатты ұнады, прям ерекше бере алған. Былай қарасаң фильмнің өзі біздің санамымызбен ойнау ғой, ал мында иллюзияның мүмкіндігінің қандай екенін ашып көрсете алды, сендіре алды.

    Жалпы алғанда Марвел өз мақсатына қол жеткізген, фильм қызықты әрі ерекше. Маған ұнады, әрі Питер Паркерден нағыз жастық шақтың энергиясы ұрып тұр.

  • Ернар Бекенов

    Барлық рецензиялар: 117

    "Өрмекші-адам: Үйден алыста" - сюжет тұрғысынан да, визуал эффектілер тұрғысынан да үлкен аттракцион. Бірінші бөлімде көрсетпеген небір трюктер мен эффектілерді көрсетті. Сюжеті фокус/сиқыр тақырыбына арналады, ол аздай фильмнің өзін үлкен фокус/сиқыр етіп ұсынған. Сондай бір каламбур ("Ералаштың" музыкасы: пю-пю-пю-пюююю). Осылайша көрермен санасымен ойнау.

    Десек те "Кек алушылардың" финалымен тікелей байланысты болуы, Марвел киноғаламына, әсіресе Темір адамға сілтемелер мен құрмет нышандары барлық кемшілігін жуып-шайып тұр.

    Мистерио образындағы Джейк Джилленхол тамаша. Тек кейіпкерінің образы сценаристер тарапынан аздап жете жасалмағандай әсер етті. Болашақта оралып жатса оған көбірек мүмкіндік ашыла жатар.

    Сюжет пен кейбір деталдарды түсіндіру тұрғысында ашылмай қалған бір-екі сұрақ бар. Дегенмен МКҒ фанаттарының көңілінен шығатыны анық. Әзіл, махаббат, Өрмекшінің мотивациясы мен ішкі күйзелісі, әрекеттеріне сендіруі - бәрі өз орнында.

  • Айкона

    Барлық рецензиялар: 134

    Фильм бұрынғы бөлімдері сияқты ерекше емес, ұзақ диалогтар көп. Ортасында жалығып кеттім. А так бір рет көруге ғана жарайды

  • Джек Шепард

    Барлық рецензиялар: 3

    2010 жылы шыққан, Крис Сандерс пен Дин ДеБлуаның "DreamWorks Animation" студиясы түсірген, толықметражды анимациялық фильмі. Басты рөлдерді дыбыстағандар: танымал "лузер" Джей Барушель мен иықтас "батыр" Джерард Батлер.

    Суреттемесі: Мультфильм, бір-бірінің ата жаулары, айдаһарлар мен викингтердің ортақ тіл табысып, достасуына жол ашқан Иккинг балақай туралы. Мультфильм өз тайпасының қатігез болса да, өмірге бейімделген дәстүрлерін қабылдай алмай, қан төгуге қаншалықты қарсы тұрғанына қарамастан, елден ерек болғандығы үшін өзін айыптаумен болатын нәзік эмоциялы оқиғаны арқау еткен.

    Иккингтің әлемі Кетік айдаһарды кездестіргенде астаң-кестеңі шығады. Осыған дейін айдаһарларды жауыз әрі қанішер деп келген Иккингтің қанаты сынған түнгі фурия, әлжуаз Кетікті көргенде, өзінің ерек тағдырын түсінеді. Тайпа көсемінің жолы еш болмайтын, сырықтай ұлы Иккингтің тағдыры Кетікпен және айдаһарлар әлемімен астасып кетеді.

    Көп жылдар бойы викингтер айдаһарларды өлтіріп, қырып, оларға тотальді аулау ұйымдастырып келген еді, сол сияқты көп жылдар бойы айдаһарлар викингтердің барлық азығын үздіксіз тонаумен болады. Бірақ, айдаһарлар өз қалауларынан тыс тонауға мүжбүр болғанына көзін жеткізген Иккинг жағдайды өзгерту керек екендігін ұғады. Бірақ, викингтер және олардың көсемі, Иккингтің әкесі өзінің ұлының сөзіне сенгісі келмейді.

    Түнгі фуря Кетіктің жол көрсетуімен айдаһарлар ұясына аттанған викингтердің әскері Иккингтің сөзінің растығына өз көздерін жеткізіп, айдаһарлармен иық тірестіріп, ортақ зұлымды жеңуге атсалысады. Әрине, соғыс құрбандықсыз болмайды, ал бұл жолы құрбандыққа Иккингтің сол аяғы шалынған екен. Сонымен, ағаш аяқ Иккинг пен түнгі фуря Кетік және викингтер мен айдаһарлар татуы жарасқан ортақ болашаққа жол тартады.

    Фильм балалармен қатар, ересектерге де ұнайды. Отбасылық сеанс ұйымдастыру үшін таптырмас картина деп бағалауға болады. Визуалды эффекттер мен анимацияның орындалу сапасы, сондай-ақ фильмнің сценарийлік кейбір жетістіктері жасына қарамай, барлық көрерменге қызық. Әрине, бұл - голливудтық клишелер мен сценарийлік ортақ оқиғалардың табы байқалғанымен, ерекше нәзіктікке құралған эмоционалды фильм.

    Қызықты деректер:

    - Фильм киноматографиялық өнер мен ғылым академиясының "Оскар" сыйлығына ұсынылған;

    - Фильм жарты жылдық айналымда жарты миллиардтық табыс тапқан;

    - Фильм британдық балалар жазушысы Крессида Коулдың кітаптар сериясы негізінде жасалған;

    - Фильмді барлық дерлік сыншылар визуалдық эффекттері мен персонаждардың арасындағы байланысы үшін тартымды деп бағалаған.

  • Ернар Бекенов

    Барлық рецензиялар: 117

    • Біз
    • 2019
    • Рейтинг: 7,5
    • Дауыс саны: 2

    Комедианттардың салмақты киноға келіп, "әу" дегенін бақылаудың өзі қызық. Біздің жағдайда - ол Нұртас Адамбай және оның "Таразы" мен "Лифтісі". Ашығын айту керек, бір көргеннен кейін екінші айналып оралғың келмейтін фильмдер. Ешқандай астары да жоқ, жеткізетін ойы да тайыз, баяндалуы түзу сызықпен жүретін бір реттік жұмыстар.

    Джордан Пилді біздің Адамбаймен салыстыру орынды ма, білмедім. Бірақ Голливуд мысалында комедиядан салмақты киноға өткен адамдардың бірі осы Пил.

    Оның осы бағыттағы алғашқы жұмысы - "Аулақ" онша тарта қоймады. Картинаның бір қалыпты сюжетінің астарында әлеуметтік, қоғамдық түйткіл мен астарлы мағынасы жатқанына аса мән бермеппін.

    Бірақ "Біз" алдыңғысына қарағанда анағұрлым ұғынықты, көркемдік тұрғыдан да алда тұр ма деймін. Бұл жерде өз-өзіне ирония (фильм жағдайында - қара нәсілділердің өзіне), сатирамен шымшу, аздап комедия, драма мен триллер бар. Осылардың бәрі сәтті үйлесіп, орынды қолданылған.

    "Оскар" алғың келсе қара нәсілділердің құқығына қатысты мәселе көтеру жеткілікті болып кетті ғой қазір. Джордан Пил тіпті осы құбылысты да әжуа қылғандай болады. Бір қуантқаны - қаралардың қазіргі қоғамдағы орнын өзгелер секілді дөрекі әрі тура мысалмен емес, астармен, аллюзиямен жеткізеді.

    Фильмнің әмбебаптығын атап өту қажет. Яғни астарына үңілмей, таза треш қойылым көруге келген адам үшін хоррор элементтері бар триллер болып шыққан.

    Сөзсіз, биыл көргендерімнің ішінде үздіктер қатарында.

  • Ақділда Байшуақов

    Барлық рецензиялар: 1

    Бұл филімнің қазақша дыбыстамасын қалай көруге болады?

  • Айкона

    Барлық рецензиялар: 134

    Бара жатқан кезде қандай фильм болар екен? Моңғолия түсірген фильмдер біздің фильмдермен салыстыруға бола ма? деген сияқты көп оймен бардым. Бірден айту керек фильм мен күткеннен де күшті болып шықты. Сонымен фильм несімен ұнады:

    1. Актерлық құрам. Пресс-показда фильмнің продюссері айтқандай, фильмнің сценариі жазылған кезде бірден Санжар Мәдиев және моңғол актерлары түсіріледі деп бірден соларды елестетіп отырып жазылған. Расымен, олар қателеспеген сияқты. Санжарды көбі мойындамайды, бірақ, оның актерлығы керемет. Бұл фильмде ол өзін жақсы қырынан аша түскен. Адам сатушы бола тұра, оның сымбаттылығын, мейірімін, ақылдығын, тіпті төбелесу мәнерін ұнатып отырасың.

    Ал Жандостың орнына басында Еркебұлан Дайыров қарастырылыпты. Бірақ, Жандосты Санжар ұсынғандықтан, Жандостың киноларын қарап шыққан американдық режиссер бірден Жандосты ұнатқан. Фильмдегі Жандос өзінің қатыгез, жауыз, нағыз мафия әлемінде жүрген адам екеніне сендіре алды. Оның қозғалысы, сөйлеу мәнері, тіпті киіну стилі ұнады, расымен оны бір сәтте жеккөріп кетуге болады.

    Моңғолияның актриса қызы әдемі, нәзік. Оның бар мақсаты сол болғасын, ол бірден қыз бірден көзге түседі.

    Жандос пен Санжардың тандемі әдемі шыққан. Әсіресе екеуінің жеке төбелесі адамды бей-жай қалдырмайды.

    2. Сценарий. Бір фильмдердің сценариіне ұқсаттым, бірақ өз ерекшеліктері бар. Біздің комедиядан жалыққан ортамызға жаңа леп болатынына сенімдімін. Атыс-шабысты жақсы көретіндер үшін фильм өте жақсы шыққан. Төбелес кезінде қандай тәсілдер қолдануға болатынын көруге, байқауға болады. Фильм адамды жалықтырмайды.

    3. Түсіру сапасы. Сапа бірден көзге түседі. Картина сізге фильмдегі атмосфераны береді. Бір сәт Моңғолияның қақ ортасында алтын іздеушілерді қинаушылар мен отырсаңыз, бір сәтте пойыздың ішіндегі төбелестің ортасында отырып алып тамашалап отырғандай боласыз.

    Фильмді қарап шығуға кеңес беремін.

  • Ернар Бекенов

    Барлық рецензиялар: 117

    Марвелдің комиксін ашып көрген шығарсыңдар? Ол жақта қырылыс ауқымы кең, соғыста қаһармандардың бәрі жүреді. Студия осындай полотноға татитын көріністердің бірін экранға көшіруге талпыныпты.

    Әлбетте сондай эпик көрініс үшін алдымен алғышарттар жасап алады: қаһармандардың бірігуіне мотивация іздейді, оқиғалардың байланысын қиыстырады, зұлым кейіпкерлерін күшейтеді, конфликт құрастырады.

    Марвелдің үлкен минусы да сол болған сияқты - ауқымды қыламын деп - ұсақ, бірақ маңызды деталдарын ескермеген, оңтайландырамын деп керек жерлерін қиып тастаған, суретін әдемі қыламын деп мазмұнын пысықтамаған. Айналып келгенде, фильмнің жүректі қаттырақ соқтырып, денеңді тітіркендіретін масштабы болғанына қарамастан, үлпілдеген көлемін ғана сезесің. Ішіне үңілсең - бос деп айту ұят шығар, бірақ бір байқалмай қалған, ұмыт болған, жете түсіндірілмеген бөлшектер жүреді.

    Қалай түсіндірсем екен. Мысалы үй жинадың делік. Бірақ тап-тұйнақтай қылуға еріндің де, кейбір шаң-қоқысты диванның астына сыпыра салдың, қуыстарға қол тығуға ерініп ондай жерлерді тазаламадың, көз түспейтін қараңғы бұрыштың шаңын сүрткен жоқсың. Сырт көзге үйдің жиналғаны байқалады, бірақ мұқият тексерсең әр жерден ұсақ-түйек олқылықтар шығады. "Ақтық шайқас" (қазақша субтитрдегі атауы осылай екен) та сондай әсер етті.

    Менде бір ғана үміт бар. Марвел болашақ киножобаларында осылардың бәрін біртіндеп түсіндіріп, "разбор полета" жасайды. Егер осы күйінде қалса DC-дің "Әділет лигасына" ұқсап кетейін деп тұр.

    Әлбетте, фанаттардың көпшілігі менімен келіспес. Және менің осы пікірімді жоққа шығаратын орынды пікірлер болады деп үміттенемін. Өзім де ізденіс үстіндемін: түрлі теорияларды қарастырып жатырмын, видеошолу мен видеоанализдер көріп жатырмын.

    Әлде менің күткенім тым көп пе, білмедім. Қысқасы, картина - кино тарихындағы ең ауқымды болғанына қарамастан - берген әсері орташа болды.

  • Айкона

    Барлық рецензиялар: 134

    Тим Бертон адамды таңқалдыра алады, ғажайыпқа сендіре алады. Әдемі ертегіге бала емес сізді де сендіреді. Егер заманауи ертегі қандай болуы керек деген сұрақ туындаса "Дамбо" фильмін қиналмай айтуға болады. Дисней мен Тим Бертонның тандемі күшті шыққан.

    Фильм адамгершілікке, адамды мықтылыққа, бауырмалдыққа үйретеді. Ана мен баланың, бала мен әкенің, жұмыстастар арасындағы сыйластықты анық көрсете білген.

    "Болашақ" қоры қазақ тіліне аударғандықтан фильм қазақ тілінде таза сөйлей алған. Дубляж фильм эмоциясын жақсы бере алған. Актерлардың сөйлеу мәнерін және олардың дауыс ырғағын жақсы келтіре алған. Миллиді дыбыстаған қызға рахмет айтқым келеді, кішкентай бола тұра дауысы сондай салмақты.

    Дамбо, көп сыншылардың сынынан өтпей жатса да, маған қатты ұнады. Себебі, фильм өз аудиториясына тура бағытталған және көп нәрсеге ой сала алады. Фильмнен шыққан кейінгі балалардың эмоциясынан-ақ көруге болады. Дамбоның анасына деген махаббатын айтумен болды. Демек, балаға анасын сыйлауды үйрете алады деуге келеді.

    Фильмнің әдемілігі сонша өзің сол жерде тұрғандай әсерде боласың. Өмірі циркқа барып көрмесем де циркта отырғандай әсер алдым. Фильмде махаббат, жылылық, достық, кешірім, ақымақтық бар.

  • Айкона

    Барлық рецензиялар: 134

    Қырғыз режиссеры Руслан Акун түсірген «Анамды іздеймін» фильмінің екінші бөлімі біздің кинотаетрлардан бастап көрсетіле бастады. Фильмге өзімізге жақсы таныс Тәуекел Мүсілім,  Азамат Уланов пен Майкл Мапонго түсті. Олардың қатарын Эмиль Эсеналиев пен Адель Кадиева толықтырды.

    Азаматты асырап алған Данияр өз қалыңдығы Алияны жолықтырады. Отау құрғысы келген жас әкенің жолында қалыңдықтың ағасы атты біраз  «қиындықтар» пайда болады. Осы қиындықтарды өткеру жолында әке мен балаға біраз тер төгуге тура келеді…

    «Анамды іздеймін 2« фильмі алғашқы бөлімі сияқты қызықты сәттерге толы болған. Фильм өте жақсы түсірілген, режиссер өз мақсаты жеткен. Комедия болса да фильмнің өз айтар ойы бар. Әлемдегі ана мен бала махаббатынан кейінгі бауыр махаббатының да күшінің қаншалықты мықты екенін жеткізген. Аздап ақымақ болса да Мұрат өз қарындасы күйеуге шыққысы келген күйеу жігітті барынша сынап алады. Мұратқа қарасаң ақымақ, біреуге масыл болған жігіт деп ойлайсың, бірақ оның өзінің мақсаты бар. Мұратты сомдаған Эмиль Эсеналиевтың актерлық ойынына қол соқпауға амал жоқ. Ол өзіне берілген тапсырманы күшті орындаған, бір сәтте онымен ұрсысықың келсе бір сәтте оны құшақтап алғың келеді. Әсіресе көзін аударып төңкерген кезде күлуден басқа амалың қалмайды.

    Кино комедия стиліне сай жарқын, әдемі кадрларға толы. Отбасыңмен бірге отырып тырқылдап күліп, бір сәт әдемі Антальяны аралап кеткендей күй кешесің. (Антальяға баруды армандатып қояды). Тәуекел осы фильмде жақсы ашыла түскенін алғашқы бөлімнен байқағам, қазір тіпті рөлге еніп кеткенін көріп қуанып қаласың. Азамат Уланов біраз екінші планға түсіп оның орнын Эмиль жайлап алған.

    Киноға берер бағам 8/10. Қайталап көруден жалықтырмайтын, айтар ойы бар және ол мақсатына жеткен әдемі комедия.

    P.S. спойлер фильмде Бурак Озчивит түспеген

  • Ернар Бекенов

    Барлық рецензиялар: 117

    • Айка
    • 2018
    • Рейтинг: 7,333
    • Дауыс саны: 3

    Көріп келген адамдар арасында "секірген" камераның, операторлық жұмыстың көркемдік киноға тән емес стилін негатив деп қабылдағандар болды. Не дейін, "Саулдың ұлын" көрмегенсіңдер ғой. Онда да дәл сондай баяндау тәсілі, дәл сол - кейіпкерге желке тұсынан ілесіп отыратын ракурс пайдаланылды. Дегенмен бұл стиль "Саулдың ұлына" "Оскар" алуға кедергі болған жоқ :)

    Дворцевой өзін документалиспін дейді. Меніңше, бұл сегіз қырлы режиссердің бір қыры ғана. Оның ештеңеге ұқсамайтын "Тюльпаны" тамаша шыққан. "Айка" да бірегей. Режиссер көрерменге "қатысу эффектісін" ешқандай қосымша гаджет-құрылғысыз бере алды деп ойлаймын.

    Көтерген тақырыбы да өзекті. Бір қызығы сол - осы өзекті мәселе туралы біле тұра бұған дейін ешбір режиссер осы тақырыпты қозғамаған. Меніңше Дворцевой әлі де талай қаузауға жететін қоры бар проблеманың бетін ашып берді. Бұл туралы әлі де көп нәрсе айтуға болады.

    Меніңше, 2018 жылғы Ресей мен Қазақстан киносындағы ең мықты картиналарының бірі.

  • Ернар Бекенов

    Барлық рецензиялар: 117

    Кэрол Денверстің хикаясы Марвелдің киноғаламына орта жолдан кіргізілгені анық байқалды. Дербес фильм, бәрінің приквелі деп қарағанның өзінде бұл кейіпкердің аздап бөтендеу әлем екені сезіліп тұрады. Енді бұл Кек алушылар қатарында қалай көрінер екен деген сұрақ туындайды.

    Фильмде Marvel-дің басқа оқиғаларына сілтемелер жетеді, оның үстіне Ник Фьюри мен Фил Колсон секілді ортақ персонаждар бар. Ол аз десең - "Галактика сақшыларындағы" Ронан-айыптаушы мен оның жендеті Корат-із кесуші де көрсетіледі. Бұның бәрі бірігіп, "Темір адамға" дейін болған оқиғаны майлы бояумен суреттеп беруге тырысады.

    Фильмді нашар дей алмаймын: экшн, юмор, сюжеттің құрылымы - бәрі өз орнында. Бәрі Marvel стилінде. Дегенмен бір шикілікті сезесің.

    Меніңше, басты олқылық - айтылған оқиғаның Марвел кинематографиялық ғаламының (бұдан былай - МКҒ) жалпы құрылымына еш әсер етпейтіндігінде жатыр ма деймін. Осыған дейін шыққан қаһармандардың дербес картиналары белгілі бір деңгейде жалпы концепцияға үлес қосу бағытында бір жаңалық алып келетін немесе ортақ сюжетті өрбітетін еді. Бұл жолы ондай байқай алмадым. Бұны МКҒ-ға бонус ретінде қарастырсақ дұрысырақ болар.

    Фильмнің 8 наурыз - әйелдер күніне орай шығуында себеп бар ма білмедім. Бірақ басты персонаж әйелдер құқығын ту қылып ұстайтындар қатарынан болып шықты. Феминистік ниет Денверстің тіпті сәби шағындағы көріністерден-ақ байқалады. Естуімше, актриса Бри Ларсонның өзі өмірде феминизмді ерекше ықыласпен жақтаушылардың бірі екен.

    МКҒ фанаттары үшін жағымды сәттер күтіп тұр. Атап айтқанда:

    - Ник Фьюри көзінен қалай айырылғанын білеміз (шын мәнінде өте күлкілі жағдай);

    - Қ.А.Л.Қ.А.Н. ұйымын құрудың алғышарттары;

    - Кэрол Денверс, яғни Капитан Марвел осы күнге дейін неге көрінбеді, неліктен Жерге қауіп төнгенде Кек алушыларға көмектеспеді. Бірақ фильмдегі аргументация да кереметтей салмақты дей алмас едім.

    - Скрулдар деген кімдер, Жер бетінде олар не істеп жүр.

    Ұмыт қалған фактілер де бар шығар, есімде қалғаны осы.

    Кейбір кемшіліктеріне қарамастан, бұл картина франшиза фанаттарының назарынан тыс қалмауы керек деп есептеймін. Тіпті жаңа ештеңе алмаған күннің өзінде, бөлек оқиға ретінде қарап, жай көңіл көтеріп қайтуға тұрады.

    6,5/10