• Біздің парақшалар:
  • pецензиялар (барлығы: 413)

  • Айкона

    Барлық рецензиялар: 137

    Тонаудың әр түрлі болатынын білесіз бе? Мысалы, "Қазақша тонау", "Италяндық тонау" енді міне "Америкалықтарша тонау". Бірақ, барлық тонаудың мақсаты бір- байлық.

    Қызық, әр киноны қарап отырып, әр елдің тонауға өзінше дайындалатынын байқайсың. Сол алмақтың да бағасы бар екенін ұмытып кететіні жаман... Бірақ, ұрлыққа ешкімнің жақсылықтан бармайтынын білесің...

    Мені ылғи мынандай сұрақ мазалайды: "түрмеден шыққасын адамдардың өмірі қандай болады?", "бұрынғыдай еркін бола ала ма?" дегендей. Себебі, түрмеден шыққан адамдардың 70% қайтадан түрмеге түседі екен.... Себебі оларға біреулер бірнәрсеге "міндетті" сияқты боп тұрады...

    Түрмеден шыққан Джеймс түрмеден соң өз өмірін енді өз арнасына түсіріп жаңа өмір бастайды. Бірақ, оның өмірін түрмеден шыққан ағасы Френки қайта бұзбақшы. Ол өз достарымен банк тонамақ жоспарын құрады. Жоспар керемет, тек бірлігі жоқ команданың қосымша жоспарының жоқтығы істің аяғын басқалай аяқтауға мәжбүрлейді.

    Кино жігіттер тақырыбын жақсы көтерген. Бауырлық, достық, сенім жақсы көрсетілген. Сотталғандардың бәрі бірдей емес екенін көрсететін бір фактор анық көрсетілген. Ол - ұрылардың басқа ауыр қылмыс жасаушылармен бірге есептелінетіні. Ұрлық жасап жатқан кезде адам "ой, мен ешкімді өлтіріп жатқаным ғой, бұл аналармен салыстырғанда ештеме емес қой" деп ойлайды. Ал, тек ұрыларға ғана арналған түрменің жоқ екенін ескермейді....

    Киноны көруге екі себеп бар:

    1. Эдриан Броуди.

    Эдриан Броудиге өзінің актерлық өнерінің барлық қырын көрсетуге көп мүмкіндік берген. Тіпті бауырына айтқан монолог Эдрианның өзі жазған деседі. Бауырына айтқан монологы қатты ұнады маған. Екі бауырдың бір-бірін көрмей кетуге себебі бола тұрса да бауырмашылдықтары ұнады.Эдриан Броуди өзін әр түрлі рөльде сынап көруге дайын актер екенін білеміз. "Пианист" киносынан кейін оны жақсы көріп кеткем. Бірақ, дәл осындай сүмелектің рөлін ол бірінші рет сомдап тұр. Оны көріп отырған кезде ісіне қарап жәй ғана ұрып тастағың кеп кетеді, ол сүмелектерді тура бере білген. Тіпті олардың қозғалысы, ондай адамдардың ішкі стреженьннің жоқтығында айқын берген.

    2. Алим Заиров.

    Осы фильмге композитор ретінде алғаш рет Қазақстандық жігіттің музыкалары таңдалынып алынды. Ол фильмнен шыққан кейін өзінің әлеуметтік желісінде премьераның жақсы өткеніне қуанышты екенін білдірді. Ол үшін мен де қуаныштымын.

    16 дан асқан жігіттердің атыс-шабысты ғана емес арасында бауырмалдығы бар осы бір фильм ұнайды деген сенімдемін.

    Берер бағам 5/10.

  • Ернар Бекенов

    Барлық рецензиялар: 119

    Тим Бертонның "Үлкен көздерін" көрдім. Сонда бір қызық диалог бар:- Менің картиналарымды миллиондар ұнатады!- Бірақ бұл факт оның өнер екенін білдірмейді.

    Соңғы сөйлем Қайрат Нұртастың әндерін, Еркін Рақышевтің фильмдерін үлкен өнерге теңейтіндерге жауап ретінде айтылуы керек сияқты. Иә, оларды миллиондар тыңдайды/көреді. Бірақ көп көрілу деңгейіне қарап оны өнерге жатқыза беруге болмайды.

    Ал "Үлкен көздерге" келсек. Маған режиссердің өз фильмінің тематикасына сай стиль қолданғаны ұнайды. Мысалы, "Уолтер Миттидің жұмбақ өмірін" алып қарайық. Онда бәрі фотография төңірегінде өрбиді. Сәйкесінше, фильмнен неше түрлі фотографиялық жұмысқа тән әдемі кадрлар көреміз. Бұнда да сол: кинотуынды бейнелеу өнері жайында. Ал фильм түрлі-түсті бояуларға толы. Бір реңді зат кездестірмейсіз, бәрінің өз түсі бар.

    Эми Адамс пен Кристоф Вальцтың ойындары керемет енді. Адамсты мен Дэвид О. Расселлдің "Жауынгер" фильмінен бері көріп жүрмін. Рөлдері қаншалықты саналуан болса, өзі де соншалықты жан-жақтылығымен тәнті етіп жүр. Вальц туралы бірдеңе айтудың өзі артық, ол өзін әлдеқашан дәлелдеген адам.

    Біреуіне шын көңілмен аяныш сезімін білдіріп, екіншісін жек көріп кетесің. Сөйте тұра, Вальц кейіпкерінің кейбір қылықтарына кәдімгідей күлесің.

    Тим Бертонның картинасы өмірде болған оқиғаға негізделген. Бұл факт оның тартымдылығын арттыра түседі.

  • Айкона

    Барлық рецензиялар: 137

    Кейде киноға барған кезде киноның ендігі сәтінде не болатыны маған белгілі боп тұратын сияқты көрінеді...

    Бірақ, "Ерсі оқиғалар" киносы сізді жүйрік ойыңыздың алға шабуына кедергі келтірері анық. Себебі, сіз голливуд киноларындағыдай "қазір, анау у ішті бітті өледі" деген сияқты бір жүйелік ой ойлауыңыз мүмкін. Бірақ, осы бір кино сізді күтпеген оқиғасымен, күтпеген сюжеттер мен сіз күтпеген өмірдегі бар оқиғалармен сізді таңқалдырады.

    Иә, мойындаймын кино сіз барып көңіл көтеріп қайтатын кино емес. Ойланып, шынымен өмірде болған оқиғаның шынайы түрде қалай өрбігеніне боямасыз көз жеткізіп қайтасыз.

    Кино әр түрлі адамдардың бір сәттік өмірлерінен құралған, өмірде шығарға жол жоқ деп тірелген жердің өзінен сәл басқаша ойласаңыз болды сізге басқа мың жол шығатынын көрсетеді.

    Мысалы: 

    Мына қыз әкесін өлтірген адаммен бетпе-бет келеді. Қалай ойлайсыз, ол қалай әрекет етті? Кейде адамдарға Алла өзі көмектесетінінің куәсі боласыз. Бастысы адал ниет, жамандық жасамауға деген ниетіңіз. 

    Өміріңізде сізді ренжіткен барлық адамдарды бір самолетқа сыйдыра алар ма едіңіз? Мейлі сіз кінәлі болсаңызда. Айтпақшы, бұл әрекетті қайталамауға кеңес берем. Енді сіз есіңізден алжаспаған шығарсыз. Маған кейде осындай ойлар келетін енді адамдарған ренжіген кезде )))))). Айтпақшы, оларды жарып жібермейді. 

    Ал мына моментті суреттеп жеткізу қиын, бірақ сондай оңбағандар өмірде расымен бар ғой. Оқиға шынымен ерсі болса да шын өмірде көп болған бұл. Кейде түкке тұрғысыз "жолда жолымды қиып кетті" деп ашуланатын кездеріңізде осы моментті есіңізге аларсыздар. Осы жерді ашуланшақ жігіттер көрсе деген ой келді. 

    Ал, мына қыздың күйін күніне қанша қыз көріп жүр екен? Қанша қыз ақымақ боп, өз өмірін қиып жіберді екен. Мына қыздың маған ақылдығы ұнады. Иә, сіздің ойыңызға "мен былай кек алам" деген ой сол сәтте келмес еді. Тіпті менің ойыма келмес еді, болшақта есіме жаттап алуым керек деп шештім (әрине, бұндайдан аулақ қылсын дегенмен де).

    Неге әр оқиға тоқталып отыр деп ойлайсыз? Себебі әр оқиғаның өз айтары бар, сізге ой салады. Мен екінші рет қайта барып көргім келер еді.

    7/10

  • Әсия Бағдәулетқызы

    Барлық рецензиялар: 9

    • Нұх
    • 2014
    • Рейтинг: 7,5
    • Дауыс саны: 2

    «Тағдыр бізге ондай уәде берген жоқ» деп Танакөз (Толқынқызы) айтпақшы, Аронофски де «Нойды» қандай да бір діни кітаптармен сәйкестендіріп түсірем деп уәде бермеген болатын. Сондықтан оның режиссерлік құқы мен таңдауына құрметпен қараймын, өйткені ол ең алдымен адамның жанына үңілді. Ал пайғамбар туралы, оның Қазығұртқа келіп табан тіреуі туралы өзіміздің жігіттер де түсіре жатар)).

    Мен көрген «Ной» құтқарушы пайғамбар туралы фильм емес. Арлы адам туралы. Жаратқанның таңдауы өзіне түссе де тәуір адам «мен осыған лайықпын ба?» деп ойланады. Оның немерелерін өлтірем дегені – ешқандай да қатыгездік емес. «Мен лайық емеспін, біз лайық емеспіз» деген кішіпейіл күмән ғана. Жаңа өмірді бастау үшін адамзат баласы күнәдан пәк болу керек емес пе? Ол айтады: «Біздің қайсысымыз күнәдан пәкпіз? Сим – қалауының құлы, Хам қызғаншақ, Иафет біздің көңілімізді табу үшін бәріне дайын, сен олар үшін бәріне дайынсың...».

    Бұл «Ной» – Топан судан аман қалған пайғамбар отбасының... бақытты емес, қасіреті туралы. Миллиондаған адамдардың жалынышты үнін естіп отырып, қыңқ дей алмасаң, сол да бақыт болып па? Басқалардың көз жасының құнымен келген өмірден Муфасаил шалдың құшақ жая қарсы алған өлімі артығырақ көрінеді.

    Бұл мүмкін, Ной туралы фильм емес. Әр адам үшін маңызды, тағдыр мен таңдау туралы фильм. Құдай адамға он сегіз мың ғаламды берді. Әр пендесіне қайталанбайтын тағдыр берді. Сонымен бірге таңдау берді. «Құдай салды, мен көндім», «Жазмыштан озмыш жоқ» дейміз. Рас. Бірақ бәрін үтір-нүктесіне дейін жазып қойса, қиыс басуға болмайтын өмірдің мәні қайсы? Әр сәт, әр мезет – таңдау, сенің ниетің, жүрегің, ақыл-таразың, иманыңның өлшеуі де сол кішкентай таңдаулар. Өмір – сол таңдаулардың тізбегі.

    Сосын, қалай болғанда да бұл адам баласына деген үмітпен түсірілген кино. Нойға Құдай үлкен жауапкершілік артты. Тым үлкен. Бірақ әділетті Құдай тек көтере алатын жүк береді дейді ғой. Хамның қуылмай, өз бетімен кетіп қалуы, Нойдың жан азабы, Сим мен Иланың сүйіспеншілігі – адамзат бастауы мейірім, ар мен ұят, сүйіспеншілік шығар деген үміт оятады. Және, сөзсіз, есі дұрыс адам бұл кинодан діни қалып емес, өзін іздеп шығады.

    Шындығында фильм маған бастан-аяқ ұнады дей алмаймын. Компьютерлік әсерлері, костюмдері, суретшінің жұмысы, кейбір қақтығыстар... көңілден шықпаған тұстар көп. Бірақ біреулер әлсіздік деп бағалаған тарихтан ауытқушылығы – дәл осы фильмнің артықшылығы сияқты. Өйткені бүкіл тартыс, психологиялық диллема сол «ауытқулардан» (бір отбасының ішіндегі шиеленістерден) өрбіп тұрған жоқ па? Мұнда Нойдан кейінгі кілт образ – Хам. Ол туралы әкесі айтады ғой: «Тым қызыққұмар» дейді. Ила пайда болатын сәттен бастап ағасына бәсекелес болатын ініден қауіптің боларын сезесіз. Түрлі жолдарда құбылып, адасып барып, ол түбінде әкесін таңдайды. Адамның құны осындай таңдаулармен өлшенсе керек. Ал қазіргі адамның түсінігімен әкесінің тәнін көріп қалу да күнә болып па? (Айтпақшы, фильмнің идеясы да сол Нойдың мас болуынан туған шығар. Неге мас болады? Өйткені жаны азапты. Неге Хамды қуды? Мүмкін, өзі кеткен шығар?).

    Аронофскидің «Реквием по мечте», «Черный лебедь» сияқты фильмдері мен үшін «Нойдан» қымбат, бірақ мұны да бір көруге болады екен)

  • Әсия Бағдәулетқызы

    Барлық рецензиялар: 9

    Ридли Скотт өзінің, Кристиан Бейлдің және Моисейдің беделін пайдаланып, өзімді алдап кеткендей әсерде жүрмін. Бірден айтайын, мұндай тақырыпты алдым екен деп, режиссер қасиетті кітаптың ешбірін көшіруге тиісті емес. Бірақ сондай күрделі тұлғаға деген авторлық көзқарастың болуы шарт. Ридли Скот Мұса пайғамбардың аса таяғын алып, орнына қылыш беріпті. Ал жақсы, ол қолбасшы, батыр, еврейлерді соғыс өнеріне үйретуші екен. Бірақ не үшін күресіп жүр?

    1. Езгідегі ұлтына жаны ашып, құтқару үшін. Осы ракурстан қарайын десең, Моисейдің еврейге емешегі езіліп тұрғаны шамалы, тіпті Құран мен Інжілдегі сияқты, еврей мен египеттік текетіресінде қандасына болыспайды. Оның үстіне кинода еврейлер өте аз көрсетіледі. Онда да көбінде қорлық көруші емес, өсекші, сатқын, тасаланып жиналыс өткізетін қарақшы топ қана. Яғни, көрерменнің еврейлерге жаны ашымайды. Египеттіктерді де жетістіріп жек көре алмайсың, себебі ақымақ Рамзестен өзге мысырлықтардың оңбағандығын байқай қоймайсыз. Ал патша үшін халық жауап бермейді ғой? Яғни, Мұса ұлт үшін күреспеді дейік.

    2. Тегінде, Жаратушы тіл қатқанда, ол ең алдымен Құдайдың алдында басын иетін, сосын барып «Менің қолымнан бұл келер ме екен?» деп күдіктенетін. Сосын Харун пайғамбарды көмекшілікке сұрайтын. Ал мына Моисейге ондай ой кіріп-шықпайды. Скотт бойынша бұл өзіне сенімді адам. Сенімді болатыны сонша, Құдайымен ұрсысады да жатады. Көп сөздерінен ол Құдайға емес, Құдай бұған мұқтаж сияқты әсер қалады. Яғни, ол дін үшін күреспеді дейік.

    3. Кез келген ортанқол сценарист біледі, бас кейіпкердің ұлы мақсаты, өзіндік ұстанымы, күресуге тұрарлық принципі болуы керек. Құдайшыл болмаса, ұлтшыл болмаса, Моисейдің бойында "әйтеуір бір сәуле" болу керек. Мысалы, әділет дейік. Фильмде Мұса «Құдаймен» сөзге келгенде: «Көп адам қасірет шегіп жатыр, мынауыңды тоқтат!» дейді. Бірақ өзі, пайғамбар болып тұрып, батыр болып тұрып, жазықсыз жапа шеккен бірде-бір қарапайым египеттікті құтқармайды, қол ұшын созбайды. Ол әділет үшін де күреспеген екен. Яғни бұл Мұсада кейіпкерге керек ең маңызды нәрсе – әрекетке жетелейтін ішкі мотив жетіспейді. Пайғамбарлықты былай қойып, даналық, адамгерлішік, көркем мінезін көрмедік (Суаттың басындағы қылығы, мысалы). Тілінің мүкістігі жоқ Мұса - іші бос қаудырлақ сияқты... 

    Моисейді сөйткенде, Құдайды сазарып-көгерген қатыгез, сабырсыз баланың бейнесінде бергені мен үшін тіпті жұмбақ. Сөздері Тораға негізделген-ау: еврейге ғана тиесілі, әсіре еврейсүйгіш "бір түрлі" Құдай, әйтеуір. Сосын америкос актерлердің өзін ұстау манерасы жүйкеге тиеді. Рамзесі де, көріпкел әйелі де, қай-қайсысы арзан-құрзан боевиктен шыға алмай қалған. Тілдегі жаргон сияқты, кей адамдардың кей қылықтары тексіздігін білдіріп қояды ғой. Мұнда да көп актерлер «бөтен қой» болып, тарихи фильмге жараспай тұр. Жалғыз Кристиан Бейлдің сүйкімі киноны құтқара алған жоқ.

    Сценарий нашар, рас. Бірақ сценарийді түзейтін де, күзейтін де, өзіне керекті материал шығарғанша сценаристің мойнынан түспей қоятын да – режиссер. Кино сценаристің емес, режиссердің позициясын жеткізу үшін түсіріледі. Ол тұрғыдан алғанда, бұл тіпті көруге тұрмайтын кино. (Бірақ енді қазір кинотеатрда басқа кино да жоқ жөнді) Ридли Скот жылдан жылға жұтаңдап барады. Спец-эффекті тым жақсы дей алмас ем, египеттіктерге жіберген нәубеттерді, олардың күймелерінің құлауын жақсы көрсеткен. Бірақ судың екі жарылғаны мысалы, мен күткендей емес. Әрине, грим, киім-кешек, декорация – керемет. Басқа жетістік көре алмадық.

  • Әсия Бағдәулетқызы

    Барлық рецензиялар: 9

    Бір фильмдер болады, адамның санасында төңкеріс жасайды. Бір фильмдер болады, ешқандай жаңалығы жоқ, сен онсыз да білетін дүниені айтып береді. Бірақ тигізіп айтатыны соншалық, жүрегің бір түрлі езіліп қалады. Соғыстағы қарапайым немістер туралы «Воровка книг» осының екіншісіне жатады.

    1. Адам деген сондай нәзік жаратылыс. Бургомистрдің әйелі кітапхананы көрсетеді. «Баламның жақсы көретін дүниесінің бәрі қаз-қалпында» дейді. Бірақ өзі жоқ. АДАМ дүниеден көшіп кеткен соң да қайдағы бір шкаф, орындық орнында қалады, түкке тұрмайтын сағат сартылдап тұра береді екен. Сонысына қарамай адам деген сондай көнбіс жаратылыс. Баласынан айырылған, анасынан айырылған, ары тапталған кісі де түк болмағандай өмір сүре береді. Қасірет емей, немене?

    2. Сезім туралы айтқаның да, айтпағаның да емес, оның болғаны маңызды. Лизельге өгей шешесі «Мен сені...» дейді де, «Кейін айтам» деп кетіп қалады ғой. Ақсары шашты бала да үзіліп бара жатып сол сөзді айта алмай кетеді. Білесіз бе, кейбір сезімдер туралы айту міндетті емес. Өйткені «Махаббатты бар болса да, жоқ болса да – жасыра алмайсың».

    3. Кей адамдар сезімді білдіру әлсіздік деп ойлайды. Джефри Раштың өлім келгенде жаны қауырсындай ұшып шығатын ізгілікті Гансына тек қана қызығуға болады. Адам болу таланты да тумыстан берілетін болса керек. Эмили Уотсонның Розасы - кірпі сияқты, сырты ғана тікенек. Тек өлерінің алдында «Неге осы жұртты көбірек жылытпадым екен» деп ойлайды ғой... Сол үшін, жақындарымызды жақсы көріп, жылытып жүрейік. 

    4. Қанша өлімді көрсетсе де, фильм мейірімге тұнып тұр. Оны мейірімді қылатын – балалар. Немістің баласы негір болғысы келіп, үсті-басына күйе жағып алады. Олар еврейді де не үшін жек көру керек екенін білмейді. Коммунистерді де не үшін жаратпау керектігінен хабары жоқ. "ең адал жүрек соларда". Банально, бірақ солай ғой.

    "Аналардың бәрі балаларын жақсы көреді. Тіпті Гитлердікі де». «Гитлердің анасы да ұрса ма екен?» - «Әрине. Гер, канцлер! Тамағыңызды шашпай жеңіз!». Біреуге ертегі сияқты, біреуге сентиментальді көрінер, бірақ бұл фильм небір айуандықтар болатын соғыс кезінде де адамгершілікті сақтап қалғандар туралы. Антигерой жоқ деуге болады, Лизель жаңа әке-шешесіне де тез үйренеді, досты да оңай табады...

    Розаны да кешіресің, өйткені оның шынайы бейнесі мейірім ғой, жас фашисті де кешіресің, өйткені ол бала ғой. Зұлымдық – барлық жерде болу керек еді, бірақ кейіпкерлер онымен бетпе-бет келмейтін де сияқты, әне-міне келетін солдаттар да фашизмнің елесі ғана. Және бір ұнамағаны – баяғыша еврейлерді соншалықты аяулы жаратылыс қылып қоюы; үйлер мен киімдер, тұрмыс-тіршілік – бәрі соншалықты әдемі, шынайылықтан гөрі эстетика басым түскен секілді.

  • Әсия Бағдәулетқызы

    Барлық рецензиялар: 9

    Эмирдің сабақтары

    Көптен күткен «Асланның сабақтарын» («Уроки гармонии») қайбір күні барып көрдік. Содан отырып талқыладық. Эмирден басталып, Мағауинмен аяқталған әңгіме түнгі 3-ке дейін жалғасты-ау деймін. Кейде кино туралы «бір көруге болады» дегеннен асып ештеңе айта алмайсың. Ал «Сабақтар» туралы... таусылмайтын, түгесілмейтін сияқты. Мүмкін, Ақберендерді сынайтын ағалар Эмирді де «жалған күрделілікке ұрынады» деп сыбайтын шығар, бірақ бұл баланың киносында "шындық" деген алапат күш бар.

    Фильмдегі алғашқы оқиға – Аслан қойды бауыздайды. «Піссіміллә» деп айтпадың ғой» дейді апасы. Мұнда үн жоқ. Ол неге қойды өзі сойды? Өйткені әкесі жоқ. Ағасы да жоқ. Міне, осы жалғыз бала медкомиссиядан өткенде Болат деген баламен қатар келеді. Және мұның күші көптеу болып шығады. Алғаш рет Болаттың эгосын біз осы кезде байқаймыз. «Мен тағы көрейін» дейді ол дәрігерге. Бір қарағанда күлкілі, қарапайым ғана көрініс сияқты. Баланың «бақталастығында» тұрған не бар? Бірақ бір сөз, бір көзқарас, бір мінез тағдырларды шешіп жатады. Эмир бізге осыны ескертті. 

    Сөйткен Асланды Болат бүкіл балалардың алдында қорлайды. Ол жауап бермейді. Мүмкін, қорықты. Мүмкін, бұл жай ғана оның табиғатында жоқ. Өмірде нендей конфликт болса да ол сол мезетте шешілуі керек. Эмир бізге соны үйретті. 

    Аслан аластатылды. «Ешкім оның қолынан алмайтын болсын». Мектепке келеді. Көретіні әлсіздің қорлануы. Бірақ шын мәнінде кім күшті, оны уақыт көрсетеді. Бәрі бетперде. Күштінікі де бетперде. Әлсіздікі де бетперде. Біз осы кішкентай балалардың үлкен текетіресін көріп, шиыршық атып отырғанда... оқиға өрби береді. «Мейірімді болыңдар» дейді «грев» жинайтын жігіт. Аслан қайта-қайта жуына береді, бұл тәнін емес, жанын тазалағысы келетін жанталасқа көбірек ұқсайды. Ол теледидардан деректі фильм көреді. Тарақандар «осындай да осындай ауруларды таратушы» екен. Бұл тарақандарды ұстап алып, электр үстеліне қойып соттайды. «Тамақты неге ұрлайсың?». Былай қарасаң, онда тұрған не бар? Балалардың бәрі жыбырлаған жәндіктерді қинағанды жақсы көреді. Бірақ осыны Эмир баяндағанда - жаның түршіге қорқасың.

    Біз баласының не істеп, не қойып жатқанына мән бермейтін халықпыз ғой. Олардың өмірі ертең басталатын сияқты. Сөйтсек, олар өмір сүріп жатыр екен. Және кейде тартыстары ересектердікінен бетер қатыгез екен. Балаңызға көңіл бөліп қойыңызшы. Асланның жүрегінде махаббат та болатын. Ол сыныптағы ең сұлу, қол жетпейтін қызға ғашық болды. Хиджап киетін қыз бен мұғалімнің арасында да қақтығыс. Сыныпқа Мирсаин деген жігіт келеді. Комплекс жоқ, жүрегі ашық, әділ де әділетті. Біртіндеп оны да жүйе «сындыруға» тырысады. Мұғалімдер де ылғи Мирсаинға қарсы. Тарақандарды соттап жүрген бала енді адамдарды да соттауға бекінеді.

    «...Или право имею?» дейтін Раскольников еске түседі. Зұлымдықтың көзін жою үшін қылмыс істеу әділетті ме?.. Аслан үндемейді. Ол үндемеген сайын жаның байыз таппайды. Қолын жуып жатқан екі полицей «Бұлар кінәсіз болса ше?» – «Басыңды ауыртпа, бұл біздің жұмысымыз» дейді ғой. Сөйтеді де, қолын жуып, әрі қарай кете береді. Біз де өмірде, кейде әділетсіздікті көріп тұрып, қолымызды жуып жүре береміз ғой...

    Мирсаин қиналғанда, әлденеден қашып, әлдеқайда тығылғысы келгенде «Хэппилонды» еске алады. Өйткені оның ата-анасы ажырасып жатыр. «Маған бәрібір. Есейдік қой» дейді ол өзін жұбатып. Өйткені бала болып еркелеп, біреудің қолтығына да тығыла алмайды. Ееей, біздің ғасырдың қорғансыз балалары...

    Біз ылғи біреудің ығына тығыламыз ғой. Ал жеме-жемге келгенде бәрібір, барлық қиындықтарды өзіміз еңсеруге тура келеді. Болат алып жүйенің бөлшегі (мүмкін құрбаны) ғана болатын. Бір адамды өлтіргенімен (кім өлтірсе де), екі баланы соттағанымен, жүйе қала береді. Ал Асландар ардың сотынан зардап шегеді. Мектептегі әлімжеттікті кім көрмей жүр? Бірақ осыған дейін сол жүйеге кім назар аударды? Ешкім.

    Эмир әдейі балаларды алып отыр. Егер жүйе желіктірмесе – Болат, мейірім көрсе – Аслан мен Мирсаин қандай болып өсер еді? «Асланның сабақтары» біздің суық ғасырдың құрбандарын жоқтау.«Кино деген оқиға» дейді ғой. Меніңше, кино деген қақтығыс. «Асланның сабақтары» тұнып тұрған қақтығыс.

    Эмир оқиғаны өрбітіп әкеле жатады да, шарықтау шегіне жеткенде аттап өтіп кетеді. Қалай болды, не болды – өзің тарқатып ал. Операторлық жұмысы да мағынасыз емес, музыка қолданбай-ақ жүрегіңнің қылын шерте білетіні – өз алдына жетістік. Әр бала өзін ойнап жүрген сияқты, ал олардың тілі, сөйлеу мәнері – бәрі кәдімгі өмірден алынған... Қысқасы, дүниеге суреткер келді. Тарқатып кейін жаза жатармыз.

  • Әсия Бағдәулетқызы

    Барлық рецензиялар: 9

    Өмірде бәрі біз ойлағандай бола бермейді. Бірдеңені сындырып жатып, «сосын түзеп алам» деп ойлайсың. «Ертең». Бірақ ертең - уақыттан жеңілгеніңді ғана түсінесің. («Ертең» ылғи кешігіп жетеді).

    «Ұлы Гэтсбидің» кітабын оқымаған адам бұл махаббат туралы шығарма деп ойлауы мүмкін. Бірақ бұл ең алдымен «америкалық арман» мен сол арманның, АЛДАМШЫ арманның қойнындағы «америкалық трагедия» туралы шығарма. Байлықтың соңына түсіп бақытқа жетем деген Гэтсби қателесті, бақ пен дәулет ылғи да қосақтасып жүрмейді екен. Азаматтықты қалтаның қалыңдығымен өлшейтін дәуірде таза адамның, адал адамның жеңілмеуі мүмкін емес екен. Гэтсби де ұлы арманның, ұлы махаббаттың, ұлы иллюзияның құрбаны болып елестейді. Бұл - өзін таппай жатып, жоғалтып алған адамның трагедиясы. Гэтсбидің ақылын (бәріне өз күшімен жетті ғой), батылдығын (соғыста шынымен де батыр болды ғой), толып жатқан басқа да мүмкіндіктерін жоқтау бұл. Бұл – жоқтау, бір-ақ рет берілген өмірін жалған дүниеге қор қылған адамды жоқтау. Бұл - жоқтау, болған күндерді ғана емес, болуы мүмкін күндерді (арманды) да жоқтау. Ендеше осы, жоқтан өзгеге шашылып қалған бейшара кейіпкерді неге «ұлы» дейді? Өйткені Гэтсби – ашқарақ бола тұра, мөлдір еді. Арсыздық дәуірінде арманын былғамаған еді. Оның осы мөлдір арманға, кіршіксіз махаббатқа жанкешті ұмтылысы ешкімге қажет болмай қалғаны қандай өкінішті...

    Айтпақшы, иә, бұл таза, мөлдір, идеалистік махаббат туралы да шығарма. Ылғи да осылай, махаббат адамды әлсіз қылады. Дейзи үшін дүниені төңкеріп тастай алатын Гэтсби сол бейқам қыздың алдына келгенде бейшараның күйін кешеді. Қарап отырып ойлайсың: оны Уилсонның өлтіріп кеткені қандай жақсы болған. Өйткені оның бүкіл өмірі бір ғана Дейзиге арналмап па еді. Гэтсбидің сөйткен Дейзиінің сатқындығын, өзінің ғажайып махаббатына лайық болмай шыққанын көрмей кеткені қандай жақсы болған...

    Өз басым Ди Капирионы актер ретінде сұмдық бағалаймын, бірақ бұл «Авиатор» емес, бұл «Пляж» емес. Гэтсбиді «нервный» қылудың қажеті шамалы болатын. Оны дүние-құртқа шын алданып қалғандай ұсақтатып жіберудің де қажеті жоқ еді. Өйткені Фитцжеральд жазған Гэтсби қанша бақытсыз, қанша мұңды болғанымен романтикалық образ еді ғой. Ал Кэрри Маллиган, Тоби Магуайэр, Джоэл Эдгертон сияқты басқа актерлер 100 пайыз нысанаға дөп тиген. Баз Лурман бізге «Мулен Руж» стиліндегі ертегі ұсынды. Кейбір тұстарында жалт-жұлт еткен арзан байлық жүйкеңе тие бастайды. Бірақ осы от-шашудың көлеңкесіндегі трагедия да фильмнің соңына қарай сұлбалана түседі.

    Сценаристер романнан ең қажетті сөздерді теріп алған. Музыка 20-жылдардағы музыка емес, бірақ соның өзімен режиссер мырза тақырыптың өзектілігін айтқысы келгендей елестеп кетті. Фильм кітаптың идеясын жеткізе алды ма, алмады ма, пікір таластыруға болады. Бір анығы, бұл фильмнен мағына іздеген адам табады. Қатардағы мелодраманы көретіндерге де таңғалмаймын.

  • Том Хэнкс

    Барлық рецензиялар: 2

    Автор айтарын сондай қияли пішінде жеткізген, бірақ мазмұны мүлде бөлек. Кейбір фильмдер болады, шылқыған маргарин-кремді драмалатып баттастыра берген, қызылды-жасылды жасанды эмоциялар мен химикат бояғышқа толы, кесек-кесек каллориялы торт жегендей боласың. Тойып алып, асқазаныңа тас түскендей ұйқтай алмай дөңбекшіп жатасың. Ал мынау төмен калориялы творожный пирог сияқты. Миға күш салмайд, бірақ дәмі аузыңнан біразға дейін кетпейді.

    Еш пафосы жоқ, отбасылық құндылықтарды дәріптейтін қыз болсам, Донал Глисонның кейіпкеріне де ес түссіз ғашық болар едім. Міне, менің ойымша, "дені дұрыс жігіт" деген осындай болады.

    Тим ешқандай да мачо емес, буылтық-буылтық бұлшық еті де жоқ, жымиса қатындардың лыпасы өзінен өзі сыпырылып түсе беретін бойы екі метрге жуық Бен Аффлек те емес. Ол кәдімгі тәрбиелі ағылшын баласы. Аңқылдаған. Мейірімді. Қарапайым. Адал. Міне, мен өзімнің інімнің, баламның қандай болғанын қалайтынымды түсінген сияқтымын. Тіпті өзім де осындай жігітке ұқсағым келіп кетті. Ал Рейчел Мак Адамсқа бұрыннан ғашықпын. Рейчел Мак Адамстан асқа біреуді бұл рөлде елестету қиын. Екі сүйкімді адамға қарап, адамның адам болып қалуы үшін үстіне маска киіп, жексұрындарды қырып жойып, әлемді құтқаруы қажет еместігін көрсеткендей Кертис. Ал әкесі мен Тимнің қарым қатынасы ол мүлде бөлек абзацқа тұрарлық оқиға. Дәл осы қарым қатынас көзімнен жас шығарды. Эизодтық рөлдегі семіз актерден бастап, Рориге дейін қысқа ғана өз рөлдерін әдемі алып шыққан. Фильмнен осындай әсер алмағалы көп болды. Айтпақшы, Рейчел макАдамс бұрын да осыған ұқсас рөлде ойнаған. Тіпті дәлме-дәл десе де болады. "Уақыт саяхатшысының қатыны" деген фильм естеріңізде болар. Болмаса, қарап көріңіз. Екі фильмнің арасында бір байланыс бар сияқты. Екеуі де құр мелодрамма шеңберінің сыртына шығып кеткен. Бірақ, "Дер кезінде" фильмінде бұны сезбейсіз. Барынша жеңіл. "Көрерменді қатырдым" деген месседжсіз, бұлттардың үстінде қалқып жүргендей сезімде боласыз. Бірақ, фильмнің шынайы моменттері бір аяғыңыз үнемі жерде қалуына себепкер болады.Айтарым, бұл фильмнен атып тұрып, ду қол шапалақтап "уау" деп қалпағыңды аспанға лақтыратын әсер күтпеңіз. Фильм ондай мақсат қоймайтын да сияқты.  Дәмі тілге біртіндеп сіңіп, біртіндеп ашылатын сирек фильмдер қатарында. Еш ойбайсыз, кісі өлімін ерекше айшықтап арнайы екпін қоюсыз, кәдімгі өзінше бақытты отбасылық өмір. Бір сондай жып-жылы бауырмалдығы бар фильм әйтеуір... Я бір сөзбен суретте десе, мен оны "Бауырмалдық" деп суреттер едім. Мейірім деп те атар едім, жоқ, өзіңді құрбан етіп, қаһарман болатын шексіз-шетсіз, бүкіл адамзаттың мойнына қарыз болып жазылатын, айқайлаған мейірімділік емес, қарапайым мейірімділік, отбасыңа, ата-анаңа, досыңа деген. Өзіңді аспан тозағын қайдам, жердегі ішқұсалық тозақтан құтқаратын мейірімділік. Дәл солай. Өзіңді құтқару кейде әлемді құтқару сияқты ғой. Таза субъективті бағам, 10 ұпай!

  • Ернар Бекенов

    Барлық рецензиялар: 119

    Сергей Бодров Голливудтағы ең ауқымды жобасын жасаған екен, біз оны премьераға дейін бірнеше күн бұрын көруге мүмкіндік алдық.

    Фильм осыған дейін жарық көрген "Гензель мен Гретель: Мыстан аулаушылар", "47 ронин" секілді ертегілер мен аңыз-әңгімелерде кездесетін құбыжықтармен күресу туралы фильмдерді еске түсірді.

    Актерлік құрамда ірі тұлғалардың (Джулианна Мур, Джефф Бриджес, Оливия Уильямс) болуы фильмнің сәтті шығуын құтқара алмайтын тәрізді. Бұл жерде үлкен минус - тартымдылықтың болмауы.

    Сюжет бастан-ақ немен аяқталатыны көрініп тұратын бірізді өрбуден тұрады. Вампир аулаушылар, мыстан аулаушылар, құбыжық аулаушылар туралы, оқиғасы ортағасырлық Еуропаны еске түсіретін әлемнің фонында өрбитін сан мыңдаған фильмдерден үлкен айырмашылық табу қиын.

    Фильм жасаушылар да белгілі бір философиялық түйін түйіп, көрермендеріне мораль оқуды да мақсат етпеген тәрізді. Бәрі бір демде өте шығатын, төбелесі мен қызық оқиғалары жетерлік жеңіл фильмді ұнататындарды басты аудиториясы деп таңдалғандай әсер берді.

    Бірақ жеңіл киноның бір ұтымды тұсы бар - сюжетте өлім-жітім мен қайғы деңгейіне қарамастан, орынды әзілі мен күлкілі диалогтары міндетті түрде болады. Бодровтың фильмінде ол атымен жоқ. Өзім үшін 1-2 езу тартар сәтін ғана байқаппын.

    Әдемі қойылған төбелесә бар және графикалық бейнесі сапалы жасалған демесеңіз, негізі бір реттік туынды. Попкорн жеуді ұнатсаңыз - бұл сізге арналған.

  • Айкона

    Барлық рецензиялар: 137

    Бұрын "мюзикл" деген нәрсені естігеніммен барып көрмеппін. Жалпы көп өлең айтылатын кинолар мен үшін тек  үнді фильмдерімен астасатын еді...

    "Орманға тереңдей бергенде..." комедиялық-мюзиклы бізге жақсы таныс "Золушка", "Рапунцель", "Қызыл телпек" сияқты бірнеше ертегіні біріктіріп өз ертегілерін көрсеткісі келген қойылым. Әрі біз сеніп өскен ертегілердің басқалай аяқталуы мүмкін ғой деген мен сияқтылардың ойларын қозғаса керек...

    Өз мақсатына жеткісі келген мыстан кемпір балалары жоқ наубайханашы мен жарын орманға жібереді. Орманнан қызыл жамылғы, алтын туфли, сары шаштар, сүттен аппақ сиырдың сүтін алып келіңдер дейді. Барлық ертегілер бақытты аяқталуы керек деген сіздің ұғымыңызды өзгертуі мүмкін.

    Маған ұнағаны:

    • Кинодағы түстердің қанықтығы және әр кейіпкердің бейнесінің анық берілгені.
    • Актерлық құрам. Джони Депп мен Мерил Стрип үшін мюзикл болсада баруға дайынмын.
    • Өлеңдердің оригиналда беріліп астындағы субтитрлармен аудармасы мен сөздерінің үйлесуі ұнады.
    • Жалпы мюзикл дегеннің не екенін енді түсінген сияқтымын. Кино емес театрлық қойылым көріп отырғандай күшті әсер алдым.
    • Екі ханзаданың өмірдің әділетсіздік туралы ән айтатын жерлері қатты ұнады және ең қызықты сәт осы болған сияқты.
    • Айтпақшы, Золушканың өгей шешесі қыздарының аяғына туфлиді қалай кигізіп жібергенін көрсеңіз кәдімгідей таңқаласыз.

    Киноның түсіріліміне берер бағам 9, мағынасына 5 беретін шығарм. Жақсы мюзикл, көруге кеңес берем.

  • Askat Abdikary

    Барлық рецензиялар: 3

    Осылай Бэггиснтің соңғы хикаясын да ақтадық

     

    Аталмыш фильм Толкиен шығармасының бір бөлігі болып табылғандықтан және де оның туындыларын өте ұнататын болғандықтан бұл фильмді бір жыл бойы күттім. Қуанышыма орай, күткенім бекер болмапты. Питер Джексон тағы да жарады. Аса шеберлікпен фильмді өз деңгейінде түсірді деп толыққанды айтуға болады.

     

    Алдыңғы Хоббитті тура бір жыл бұрын тамашалған едім. Кейбір кейіпкерлердің есімдері есімнен шығып кетсе керек, фильмнің басында біраз еске түсіруге тура келді. Дегенімен, бұл фильмнің шырқын мүлде бұзған жоқ. Тіпті, Толкиеннің туындыларымен мүлде таныс емес адамдар да өздерінің ыстық ықыластарын білдіріп, осыған дейін болған оқиғаларын міндетті түрде тамашалайтынын айтып жатты.

     

    Киноны кеше тамашалаған болсам да, онда болған бар оқиғалар әлі де көз алдымнан кетер емес. Фэнтези жанрына сай қоршаған орта бірден баурап, табиғаттың сұлулығын тамаша жеткізе білді десем, қателеспеспін. Оған қазіргі заманғы талаптарға сай компьюермен әрленген арнайы эффектілерді қосыңыз. Фильмнің сюжеті де мағыналы, достық пен сүйіспеншілікке үйретеді. Әсіресе, Бильбоның тапал хоббит болғанына қарамастан аса ержүрек, адалдығы көзге түседі. Ториннің де қазына деп басын жоғалта жаздағаны қазіргі заманғы байлыққұмар адамдарды бірден есіңа алғызады.

     

    Питер Джексон мен Толкиенге аталған туындылары үшін мың алғыс! Кинотеатрға баратын болсаңыз міндетті түрде көруге ұсынамын. Менің бағам - 9/10.

  • Бекзат Әділжанұлы

    Барлық рецензиялар: 1

    Кеште болса жазып жатырмын. Жалпы бұл фильмді қазақ тілінде емес, орыс тілінде ғана көріп шектелдім. Ғаламторда қазақ тіліндегі нұсқасы жоқ, ал кинотеатрға жол түспеп еді. Жалпы бұл фильмді жазда екі рет, және жақында тағы бірнеше рет көрдім. Жеті рет өлшеп, бір рет кескендей болдым. Орыс тілінде жеті рет қарап, бір қазақшаны шығардай болдым дегнім ғой.Жалпы фильм ұнады! Себебі сюжет бір қалыпты тұрмады. Күтпеген оқиғалармен есте қалдырды. Алғашқа сахна Ричард Паркер мен оның әйелі Мэри Паркердің қалай қаза тапқанын көрсетті. Кейін Питер Паркерді көрсетті. Жалпы Марк Уэбб комедия жанрына жақын болғандықтан күліп алдық. Жаңа кейіпкер Алексей Ситцевичті де байқадық. Оны Пол Джамати сомдады. Алексейді тыр жалаңаш қалдырып кеткені күлкілі болды. Стэн Ли де өзіне жақсы камео тауыпты. Жалпы маған Тоби Магуайрға қарағанда Энжрю Гарфилдтің Өрмекші-адамды ойнағаны ұнайды. Себебі ол жай ьғана құтқарушы емес, сонымен қатар романтик! Питерден романтикті шығарған әрине ол - Марк УэббЕнді композиторларға келсек. ьАлғашқы фильмнің композиторы Джеймс Хорнер дің әуендері құлаққа жағымды естілтін еді. Ал бұл фильмнің композиторы Ханс Циммердің әуендері кішкене қатты шығама, басқаша ма білмедім. Операторларға келсек, Дэн Миндел керемет оператор. Дауа жоқ! Ал алғашқы фильмнің операторы Джон Щварцманға("Жаңа Өрмекші Адам" фильмнің операторы) кішкене операторлық тәжірибе қажет. Себебі ол  кейіпкерлерді аса жақын көрсетеді. Ал Дэндн ондай қателіктер бола қоймады.

    Енді әр кейіпкерге жеке тоқталып өтсек. Питер Паркер - басты кейіпкер. Яғни - Өрмекші-адам. Бізді біраз күлкілі бөлегені рас. Бірақ оның фильмнің ортасында Гарриге неге қан бермегенін түсіне алмадым. Бірақ бұл ежелден келе жатқан комикс дәстүрі. Гвен Стейси - Біздің қаһарманымыздың ғашығы. Эмма СТоун бірінші фильмдегі ГВен Брайас Даллас ХОвардғқа қарағанда, жақсы көрініс тапқан. Оның күлгенін әйтсейш. Оның қаза тапқаны бәрінен жаманы сол болды. Бірақ "SONY" оны қайта тірілтуді ойлап жатыр дид.Макс Диллон - Аңқау, ақкөңіл "OsCorp"-тың жұмысшысы. Токқа ұрылғаннан кейін, оны аяп кеттім. Бірақ оның "добрый персонаж" ретінде де қалыптасуына да болатын еді. Бірақ СТив Дитконың комиксынен аттап өтуге болмас.Гарри Озборн - ауруға шалдыққанын білгенде ол жанын сақатп қалу үшін әбігерге түседі. Питерден Өрмекші-адамды шақыртып, қанын беуруін сұрайды. Бірақ оған келіспейді. Ал Гарри болса, Максты өз жағына бағындырып, Дональд Менкеннен  сиворотканы салдырғызады. Ол аурудан айығады және құбыжыққа айналады. Сол сәтте ол Питердің Өрмекші-адам екенін біледі де ГВенді өлтіреді.

    Мэй Паркер - Тәтеміз Мэй бұл фильмде Питердің ата-анасы жайлы шындықты білуіне үлкен септгін тигізеді.

    Дональд Мэнкен - Оскорп жұмысшысы, Гарридің көмекшісі болып келген Дональд Мэнкен сценарий бойынша қаза табу керек болған. Бірақ ол аман қалды.

    Және бұлф ильмнің жалғасы "Зұлым алтылық" фильмінің жалғасы жайлы көптеген әңгімелер айтылып жатыр.  Сценарийге көз жүгіртсек. Фильм была йбасталады. Естеріңізде болса, "Жаңа Өрмекші-адам 2" фильмінің соңында Өрмекші МҮйізтұмсыққа қарсы шығатын еді. Сол сюжетті ұстап, жалғастырады.Өрмекші-адам қоландағы қала канализациясының қақпағымен Мүйізтұмсыққа бір сілтейді. Сол кезде оның костьюмі жан-жаққа шынытап сынады.Бұл кезде Оскорп жұмысшысы Густав Фриске келіп, "Сэр, Осьминогтің шупальцасы жоғалды"- Ол қайда?- Өзімде білмеймін, сэр... Сэр, оны кім жасағаны есіңізде ме?- Отто Октавиус

    - Ол да Оскорпта жоқ.

    Фирс далаға қараса Өрмекші-адам Мүйізтұмсықты жеңіп, Осьминогпен айқасып жатыр екен.

    Фирс:

    - Сен сондай костьюммен жеңіліп тұрсыңба?

    АЛексей Ситцевич:

    - Сэр, өтінем, маған тағы бір мүмкіндік беріңізші!

    - Жарайд!

    - Рахмет, сэр!Міне дәл осылай фильм басталады! Фильмге берер бағам: 8.5