• Біздің парақшалар:
  • pецензиялар (барлығы: 410)

  • Айкона

    Барлық рецензиялар: 135

    Киноны жылайтын, "өмір неткен әділетсіз" деген тізімдер жиынтығына қосып қойыңыз. Жылайтын кино екен деп көрмей қалмаңыз, керісінше өмірде бәрі мүмкін екеніне көз жеткізу үшін көріңіз. Жалпы әйел мен еркектің махаббаты, аналық махаббат пен адамгершіліктің ең жоғарғы сатысын көрсете алған жақсы туынды.

    Елсіз аралда қалай бақытты болуға болады? Бұл кино осы сұрақтың жауабын береді. Иа, бақытты болуға болады. Ол үшін сен ауыр тағдырдан кейін тыныштыққа тап болып, ол жерге сүйіктіңмен барып бақытты отбасы болсаң елсіз аралда екі адам болып бақытты ғұмыр кешуге болатынын көрсетеді. Ессіз ғашық болған жан балалы болғысы келеді, алайда, өмір қатал...

    Екі баласынан айырылып қалған ананың қайықпен ағып келген жетім баланы өзінің баласындай аялап өсіргісі келетін аналық махаббатын тек көру керек шығар. Әйелін сүйген еркектің әйелінің бақыты үшін қылмысқа көз жұма қарағанын қалай кешіргеніңді білмей қаласың...

    Кино өте әдемі жерде, керемет табиғи дыбыстар ортасында жақсы түсірілген. Табиғаттың әсемдігін, екі жастың бақытын режиссер де актерларда жақсы бере алған. Киноға таңдалған актерлар құрамының мықтылығын, олардың рөлді алып шығу қатты ұнады.

  • Айкона

    Барлық рецензиялар: 135

    Кино, нағыз қазіргі заманда болып жатқан әлеуметтік тақырыпты қозғайды. Бізге күнделікті байқамайтын нәрсені жақсы көтерген.

    Отбасылық қасиеттен дым қалмаған кез. Еркек өз отбасынан безіп, отбасының алдындағы міндетін ұмытқан. Әйел, ана екенін, жар екенін ұмытқан. Инстаграм сияқты әлеуметтік желінің құлы, сән әлеміне табынушы. Ол да күйеуіне ерегесіп сырттан бақыт іздеген бейшара. Жалғыз ұл, ешкім оның жағдайын, ешкім оның жай күйін түсінбейді. Тасжүрек ана мен әкенің ортасында қалған іздеуі жоқ бала. Ол ешкімге салмақ салмай өзімен өзі кеткісі келеді...

    Шынымен, махаббат болмаса өмір сұрғылт нәрсе. Нәпсі, қу ақша мен заман ағымына түсіп махаббаттары мен бір-біріне деген сенім мен сыйластықтан айырылған дүбара қоғам.

    Адамға ой саларлық кино, қарап шығуға кеңес берем. Бір уақыт "біз қайда барамыз?" деген сұраққа толғана білу керек.

  • Ернар Бекенов

    Барлық рецензиялар: 118

    Фильм алғашқы минуттан соңғы титрға дейін махаббатсыздықтың қандай болатынын паш етіп, көрерменге дабыл сигналын қағумен болады. "Тасжүрек" деп қазақшалау фильмнің мәнін аша алмағандай болды. Фильм махаббаттың жоқтығы, махаббатсыздық туралы. Бұл тұрғыда тұпнұсқа атауы дәл қойылған.

    Синопсисінде жазылғандай, картина ажырасып жатқан жұп туралы. Әрқайсысының өз жеке өмірі бар, сондықтан ортақ ұл - екі жақтың да жаңа бақытына кедергі келтірмекші. Сол себепті баланы өсіру жауапкершілігін ері әйеліне, ал әйел еріне жүктегісі келеді. Шешімі жоқ даудың арасында ұл зардап шегеді. Ол екі жаққа да керек емесін сезеді. Сезеді де... із-түссіз жоғалып кетеді.

    Фильм атмосферасы жаумай үстіңнен төніп тұрғып алған қара бұлт секілді - ішкі әлеміңді түнертіп, жақсылыққа, жағымды оқиғаларға үміт артпай-ақ қоюды бірден ескерткендей болады көрерменге. Бұған музыкалық әрлеуді қосыңыз. Бүкіл денең жамандықтың боларын сезіп, арқаңды тітіркендіріп жібереді.

    Немқұрайлық, махаббатсыздық барлық жерде: бір-бірін жек көріп кеткен ерлі-зайыптылар, немқұрайлық танытқан тергеуші, долы ана/ене, басты кейіпкерлердің эгоистік кейіптегі жаңа ашыналары. Персонаждардың түрінен жылылық іздеп кетеді екенсің тіпті. Алайда персонаждарда бір ғана махаббат бар - смартфонға, өзіміз қолмен құрып жалған алған әлемге сүйсіну. Әрине бұл да фейк махаббат. Оны экран алдындағы кез келген адам анық түсінеді деп ойлаймын. Виртуал - әу бастан шын емес дегенді білдіреді емес пе?!

    Звягинцев актерлер іріктеуде, персонаждардың образын жасауда аса шебер. Әр деталь, әр қимыл образдардың ашыла түсуіне, көрерменмен жақын танысуына сеп болады. Финалда сен әр кейіпкердің мінезін өз жақыныңдай біліп шығасың.

    Әлбетте әлеуметтік драма ретінде картинаның барысы параллельдер мен аллегориялардан тұрады. Оған бөлек материал арнау керек шығар. Бүкіл көріністің түйіні ретінде Украинадағы қақтығыстың репортажын фон ретінде пайдалануы аздап күтпеген, бірақ өте әсерлі жайт болды. 

    Фильм техникалық тұрғыдан да өте жақсы жасалғанын айта кету керек. Операторлық жұмыс, түстің қолданылуы картинаға ерекшелік беріп, көрерменге эстетикалық ләззат сыйлайды.

    Звягинцевтің мен екінші фильмін көріп отырмын және екінші рет жан дүниені қопарып, көпшілігіміздің жанды жерімізге дәл тигізгенін көріп отырмын. 

  • Ақбота Мұсабекқызы

    Барлық рецензиялар: 1

    • Ninety one
    • 2017
    • Рейтинг: 6,4
    • Дауыс саны: 5

    Күткенді, ойлағанды бере алмады. Ninety One фильмінен жігіттердің шынайы ойынын ғана көруге болады. Ерболат Беделханның кинодағы дебюті екенін ескерсек, бәріне көз жұма қарауға болар еді. Бірақ... бірақ, Асқар Ұзабаев фильмдегі қателіктерді, сюжеттер мен оқиға желілерін қалай байқамай қалды. Тіпті кешірімсіз.

    Фильмде топтағы жігіттердің барынша шынайы ойнағандары, өз-өздерін сомдауларын жақсы түсінгендерін көруге болады. Жалпы, кино ретінде барлық қиындықтарды, жамандықтарды жеңіп, түн артынан күн шығатынын білуге, мотивация алуға болады. Соған УРА деймін.

    Ал мен не күттім:

    - Топтағы жігіттер қалай танысып, табысты;

    - Ninety one жігіттерін Ерболат қалай тапты? Немесе жігіттер Ерболатты қалай тапты?

    - Топ қалай құрылды?

    - Топтағы барлық жігіттердің ата-аналарының реакциясы қалай болды?

    - Жақындарының, ұстаздарының, достарының көзқарасы қалай болды?

    - Күрестегі жолдың негізгі бағыттары.

    Осыларды көргім келген. Көре алмадым. Топтың Ерболатқа тапсырма өткізіп жүргенін бастап, бірден құрылып кетіп, иглздар, хейтерлер темасы бірден басталып кетті. Сәл бірдеңе жетіспей қалды осы тұста.

    Монтаж. Оһ, видео инженердің қолын кесу керек, жо-жоқ, шабу керек! Монтаж өте нашар. Тойский. 24 тамыздағы премьераға үлгеру үшін асығыс жасағаны көрініп тұр.

    Ал жігіттердің жалпы күресі ұнады. Қуандым.

    Ninety One жігіттерінің рөлдеріне - 5

    Продюсер Ерболат Беделханға - 2 (алғашқы қадамы екенін ескеріп)

    Режиссер Асқар Ұзабаевқа - 1 (оның бұл еңбегін нәщәр деп бағалар ем)

    Жалпы 8/10 деген баға қойдым.

    Сонда да бұл фильмге жұмсалған $100 мың ақталарына сенем. Сұранысқа ие фильм болатын шығар)))

  • Ернар Бекенов

    Барлық рецензиялар: 118

    Не айтуға болады? Өз жанры мен канондарын сақтай отырып жасалған туынды. DC киноғаламының бір бөлшегі бола тұра, сюжет жағынан "Әділет лигасына", яғни "Лига справедливости" жобасына байланып қалғанына қарамастан, Диана ханшайымның өз әлемі кеңінен ашылған.

    Қазір DC киноғаламында Бэтменнің рөлі екінші планға ығысуы да осы Ғажап әйелдің кесірінен болып жатыр. Әділет Лигасында басты суперқаһарман осы Диана болады деп айтылуда. Хуле, соңғы уақытта халі мүшкіл Уорнер Бразерске 800 млн доллар табыс алып берді, соңғы жылдардың ішінде алғаш рет сыншылардың мақтауына ұшырады. Уорнер Бразердің осы жетістікті пайдаланып, Ғажап әйелдің бүкіл сөлін сорып, әбден дымы қалмағанша пайдалануға тырысатыны белгілі нәрсе.

    Дегенмен фильм кемшіліксіз де емес, үйлеспей қалған, фильмнің атмосферасына сәйкеспей кеткен тұстары бар. Галь Гадоттың да ойынына сын айтуға болады. Бірақ, франшизаның осыған дейінгі туындыларымен салыстырғанда көш ілгері. Сол үшін 7/10 беріп отырмын.

  • Айкона

    Барлық рецензиялар: 135

    "Валериан және мың ғаламшар шаһары" фильмін қазақ және орыс тілінде қарап шықтым. Басқы идея бойынша, екі тілдегі аударманы салыстыру болған. Сонымен "қандай айырмашылық бар?" деген сұрақ туындауы заңды. Менің жауабым қысқаша: "Ешқандай айырмашылық жоқ". Себебі, қазақ тіліндегі фильмге екі інімді алып бардым. Екеуіне барлық сөздер түсінікті, әрі күлетін жерінде бірге күліп, атыс-шабыс жерінде бірге атысып алды. Соған қарағанда аудармада фильмдегі эмоцияны жақсы бере алған.Аударма сөздерінде ешқандай кірме сөздер мен аудармада кететін анайы қатілектер байқалмады. Аударма мен дыбысталуы актерлардың ойыны мен эмоциясына сай. Маған Валерианды дыбыстаған дауыс ұнады, құлаққа жағымды.Сонымен, Люк Бессон "Бесінші элемент" фильмінен кейін қызыл-жасылды түске толы ғарыш тақырыбына ерекше фильмды ұсынды. Фильмның идеясы бойынша, болашақта ғаламшардағы барлық тірі ағзалар бір ортада тепе-теңдікте өмір сүреді. Адамдардың қателігі мен қатыгездігің арқасында Нави халқы жойылып кетеді. Агент Валериан мен Лорелин осы халықтың ерекше мұрасын сақтап қалуда өз көмектерін көрсетеді. Фильм, "Жұлдызды соғыстар" мен "Аватар" фильмінің көрермендеріне жақсы сыйлық болмақ.

    Алайда, фильм тым ұзақ, кейбір сәттерде жалығып кетесің. Дегенмен, Риананың өнер көрсететін жерін қайталап көре бергің келеді. Жалпы киноның ерекшелігі мен әдемілігі үшін 8/10, қазақша аудармаға 10/10. 

    #Валериан #ВалерианЖәнеМыңҒаламшарШаһары #ДэйнДеХаан #Риана

  • Том Хэнкс

    Барлық рецензиялар: 2

    "Маймылдар планетасының" үшіншісі екі сағат жиырма минутқа маймылдар әлеміне сүңгітіп, адам екендігіңе әбден ұялдыратын фильм екен. Драма да, ашу да, сұлулық та, маймылдар тобының актерлік ойыны да, адамзат тарихына сілтеулер де, моральдар күресін де сөзсіз құр мимикамен бейнелеу де жоғары деңгейде. Вуди Харельсонды жауыз етіп елестете алмағаным болмаса, шатыры иық тұрмақ белуардан қаңғып кеткен принципшіл антиподтың мотивтері адам көндірерліктей анық, алдыңғы бөліміндегі Кобаның харизмасына тати қоймағанымен, оның орнына екінші рөлдегі маймылдардың болмысын эпизодтарда ашып көрсетуі Кобаны жоқтатпады.

    Кем тұстары: кей жылаңқы тұстары сериалдарша созыңқырап жіберген, бірақ бұл соғыс жайлы фильм ғой, туыс-жақындардың өлуі мен соған қатысты қайғырулар - заңдылық. Фильм алдыңғы екеуіндегі моральды қатаң ұстанады - 

    1) Бұтақбастар барлық жерде бар.

    2) Бұтақбастардың бұтақбастығын әділетсіздік оятады. Онымен қоймай, бұған тағы екі уәж қосады: 

    3) Егер тап сондай зорлықты басыңнан кешірсең, ол бұтақбас - сен болуың мүмкін. ... және ақырғы түйіні: 

    4) Болмауың да мүмкін, егер сен маймылдардың алғашқы пайғамбары болсаң, қасыңда Моррис деген жан аяр кеңесшің болса, ал өз есімің Цезарь болса. 

    Осылайша, фильмнің эстетикасы да, айтар пәтуасы да қышыған жерден дәл келіп, трилогияны лайықты мақамда түйген сияқты. Бірақ, күтпеген жерден пайда болатын жаңа кейіпкерлер "жалғасы болса екен" деген үмітке де орын қалдырып тұр. 

    PS. "Кәкәй маймылға" сүйсінбеу мүмкін емес. 

    #warfortheplanetoftheapes #warfortheplanet

  • Ернар Бекенов

    Барлық рецензиялар: 118

    Marvel мен Sony Pictures компанияларының Өрмекші-адам кейіпкерін бірлесіп пайдалану туралы шешімі екі жаққа да пайдасын тигізді деп ойлаймын. Біріншіден, фанаттардың арманы орындалды - Өрмекші адам Кек алушылар құрамында. Екіншіден, Sony Pictures-ті құлдыраудан құтқарды: Өрмекшінің толық құқығына ие болып тұрған кезінде бұл суперқаһарманды, жұмсартып айтқанда - "ұшпаққа ұшыра қоймағаны" анық. Мысалы, Питер Паркер туралы соңғы картина "Жаңа Өрмекші-адам: Кернеген қуат" көпшіліктің көңілінен шыға қоймады, сондықтан да жоспарланып қойылған "Жаңа Өрмекші-адам 3", "Жаңа Өрмекші-адам 4" жобалары жабылып қалды, ал Эндрю Гарфилд өз кейіпкерімен қош айтысты.

    Sony Pictures Өрмекші-адамның болашағына қатысты тығырыққа тірелген еді: ол туралы тағы фильм түсірсе - бұрынғылардан озып кетпейтіні анық, ал оны мүлдем пайдаланбай, "сандыққа салып қоюға" тағы болмайды - фанаттар кешірмейді, қайтсе де Өрмекші-адам Америка мәдениетінің бір бөлігі.

    Бұл ребутта Питер Паркер анағұрлым өмірге жақындатылған деуге болады. Оның видеоблог жүргізуі, видеосында артқы фонда өзге суперқаһармандардың көрініс табуы - оны мейілінше біз өмір сүріп жатқан шынайы әлеммен ықпалдастыра түскендей. Питердің өзі де әлі балалығынан айырыла қоймаған, 15 жасар мектеп оқушысы. Оның мектептегі өміріне көп көңіл бөлінген. Естеріңізде болса, осыған дейінгі нұсқаларда Питердің мектептегі өміріне аз уақыт берілген еді, авторлар одан тезірек суперқаһарман жасауға асықты. 

    Жаңғыртылған Өрмекшінің тағы бір ерекшелігі бар: алғашқы трилогияда, "Жаңа Өрмекші-адам" дилогиясында болмаған мүлдем жаңа кейіпкерлер. Бұнда Мэри Джейн де, Гвен Стейси де, Жасыл Гоблин де жоқ. Мэй жеңге ғана бар, бірақ анағұрлым жас, анағұрлым әдемі :)

    Басты зұлымды Майкл Китон ойнайды. Оның кейіпкері - Құзғын деп аталады. Кек алушылардың жолында қандай антогонистер кездескенін ескерсек, Құзғынды зұлым деп те атау қиын. Жаман іспен айналысса да, әлі адамилықтан ажырай қоймаған, тіпті жақсылыққа бет бұратынына үміт тудыра алатын кейіпкер.

    Майкл Китон - Құзғын. Ешқандай байланыс байқамадыңыз ба? Еске түсіріңіз: Майкл Китон - Бердмэн :)

    Фильмді жасаушылар Майкл Китонды осы рөлге шақырғанда оның "Бердмэн" ("Құс-адам") фильмінде ойнағанын шынымен ескерді ме, әлде жай ғана сәйкестік пе - оны айту қиын. Ал Бердман өз кезегінде Бэтменге жасалған ишара екенін көзі қарақты көрермен жақсы біледі және кезінде Бэтменді Майкл Китон ойнап кеткенінен де хабардар шығарсыздар.

    Жалпы бұл картинада ишара мен сілтемелер жетерлік. Атауының өзі неге тұрады - "Үйге оралу" немесе "Қайта оралу". Сюжети мағынасы - "Капитан Америка: Азамат соғысы" фильмінде көрсетілген оқиғаларға қатысқаннан кейін Питер Паркер өз үйіне, қалыпты тұрмыс-тіршілігіне қайта оралады. Атауы негізі осыны меңгезегендей болады. Алайда, 1990 жылдардан бері Өрмекші-адамды кинода пайдалану құқығы Sony Pictures студиясына тиесілі болғаны белгілі. 2015 жылы ғана Marvel компаниясына, өзінің бастапқы студиясына қайтып оралды. Сондықтан "Үйге оралу" атауы екі мағына беріп, осы жағдайды да нұсқап тұр.

    Бұдан бөлек, фильмде Дэдпулға, Тоби Магуайр ойнайтын Өрмекші-адамға жасалған сілтемелерді байқадым. Ал "Жұлдызды соғыстардың" (Star Wars) жарнамасына мүлдем таңғалуға болмайды, өйткені, "Стар Уарс" франшизасының қазіргі иесі The Walt Disney компаниясының құрамына Marvel Entertainment те кіреді. 

    Marvel өнімдерін әзілсіз елестету қиын. Бұл жолы да авторлар франшизаның жалпы атмосферасының бұзылмауына ерекше көңіл бөлген, орынды әзіл мен шиеленіскен сәттер сәтті үйлесім табады.

    Сонымен, жаңартылған "Өрмекші-адам" сәтті шықты дей аламыз ба? Толық сеніммен - "Иә"!

    P.S. Өкінішіме орай қазақша дубляжын көре алмадым.

  • Айкона

    Барлық рецензиялар: 135

    Бүгіннен бастап кинотеатрларда "Көліктер" мультфильмінің үшінші бөлімі шығады. Өзімізге, кішкентай балаларға жақсы таныс Найзағай Маккуин арамызға қайта оралды. Болашақ Қоры бұл жолы да демеушілік жасап,  біздің сүйікті мультфильмімізді қазақ тіліне аударды. Орыс тілінде мың рет "недеп жатыр?" деген сұрақтардан құтылудың амалы баланы қазақ тіліндегі мультфильмге апару. Баланың өзіне түсінікті болғандықтан мультфильм оған өте қызықты болары анық. Кеше біз жабық көрсетілімнен шыққан кезде кішкентай балалардың "Зымыра, зымыра" деп әндетіп бара жатқанын байқадым.

    Трейлерден байқағанымыздай, Найзағай Маккуин жарыста бірінші рет жеңіліс тапты. Ол өзінің жеңіске деген сенімін жоғалтып, өзінің күшін қайта қалпына келтіру үшін жұмыс жасайды. Себебі, өмірдің заңы бойынша, қоғам мен адам жаңарады. Біздің орнымызға жастар келеді. Маккуинніңде ойында жаңа арман пайда болады.

    Сонымен, "Көліктер3 мультфильмінде қандай өзгерістер бар? "Көліктер" ең алғаш 2006 жылы шықты, байқанымыздай Маккуинді жақсы көргендер қазір үлкен болып кетті. 11 жыл аз уақыт емес екені мәлім. Әрі қазіргі көліктердіңде сырт бейнесі өзгеріп, электромобильдер заманы келе жатыр. Әрі қазіргі жарыстар бұрынғыдай емес, керемет стадиондарда өтеді, сондықтанда мультфильмнің ішінен сондай керемет стадиондарды, заманауи техниканы байқауға болады. Сол себепті, "көліктер" мульттоптамасын жасаушылар бізге жаңа кейіпкерді ұсынды. Ол жас, әрі заманауи, әдемі және ол қыз бейнесіндегі көлік. Оның есімі - Крус Рамирес. Енді гендерлік саясатты мультиктен іздемеген күннің өзінде, замандағы өзгеріс ескерусіз қалмаған. Әрі мультфильмнің соңында, Маккуиннің киімі, бренді өзгерді. Демек, көліктер әлемінде жаңа бренд пайда болды.

    "Көліктер 3" бізге үш нәрсені анық түсіндіреді: 1. Әр нәрсе өз уақытымын. Жас кезіңде сен үшін бар мүмкіндік алда, уақытыңды құр өткізбей уақытында қалағаныңды істеп қал. 2. Сенің орныңа әлі де мықты жастар келеді. Ол өмірдің заңы,ол үшін уайым жеудің қажеті жоқ. Қайта сол өмірге өзіңнің жаңа арманыңды жаса. Шындықты қабылдау керек және одан қорқудың қажеті жоқ. 3. Тыңбай еңбек ет! Барлық арманға қол жеткізу үшін еңбектен, ізден, өткеніңді ұмытпа. Үлкендердің ақылы ешқашан ешкімге артық етпейді. Осыны жадыңда ұста.

    P.S. Менің ойым үлкендердің пайымдауы болып кетсе керек, дегенмен, балалардың сүйікті мультфильмі өз орнында жақсы сақталған. Бұрынғыдай көңілді, позитивті әрі жақсылық жасауға итермелейді.

  • Данияр Тажимбет

    Барлық рецензиялар: 3

    • Мумия
    • 2017
    • Рейтинг: 6,5
    • Дауыс саны: 4

    «Мумия» фильмі жаңа құбыжықтар әлеміне жол ашты, дәлірек сәтсәз ашты.

     

    «Мумия» өзінің ажалсыз таза мумия екенін кезекті рет дәлелдемекші болып, біздің кинотеатрларымызға жаңа леппен, жаңа киноәлем нұсқасында шығып отыр. Күні кеше-ақ жабық көрсетілімге барып, кинодан алған әсерім екі түрлі боп қалды. Бір жағынан фильмнің қорқынышты атмосферасы жақсы әсер қалдырса, екінші жағынан фильм сценариінің әлсіздігі мен актер Том Круздың ойыны басқа рөлдерінен еш өзгеріссіз болғаны жағымыз әсер қалдырды.

    Алдыңғы «Мумиялардың» оқиғалары 20-ғасырдың бірінші жартысында өрбісе, ал жаңа фильмнің сюжеті біздің уақытымызда өтеді. Фильмнің басты кейіпкері ретінде әскери жалдамашы Ник Мортан болады. Оны еш қартаймайтын актер Том Круз ойнайды.

    Сюжет бойынша Ник көне египеттік табытты табуға және оны Лондонға жеткізуге көмектеседі. Ол бұл табытта жәй ғана шіріген мумия ғана емес, мыңдаған жылдан бері өзінің бостандығын күткен қарғыс атқан құбыжықтың бар екенін сезеді.

     

    Круз жаңа картинадағы жалғыз жұлдыз емес. Оған серік ретінде негізгі кейіпкерлердің бірін сомдайтын Рассел Кроу қосылған. Оның тап кімді ойнайтынын айтпай-ақ қояйын, бірақ ол готикалық әдебиеттің ең танымал кейіпкерін сомдайды. Фильмде ол мистикалық құбылыстарды зерттейтін және оларды залалсыздандыратын ұйымды басқарады.

    Бұл мумия бұрыңғы мумиялардан басқаша десек орынды. Алдыңғы 3 бөлім жарқын комедиялық шытырман оқиғаларымен есте қалатын болса, ал жаңа бөлім комедияға мүлдем ұқсамайды. Ол зұлмат мистикалық хоррор фильмге сай келеді. Антогонист мүлде басқа адам.

    Фильмдегі «мумия» деген атаудың өзі екінші орынға ығысып кеткен. Кино өндірушілер акцентті фильмнің өзіне емес, оның басқа іргелес фильмдермен байланыстыруға, соған жол ашуға қойған. Соның кесірінен жалпы сюжеттің өзектілігі жоғалған. Бұдан кейін бұл киноәлемнің тағдыры бір жағынан қызықтырса, бір жағынан қорқыныш ұялатады.

    Қорытындылай келгенде, менің ойыма тек бір ғана басты сұрақ туындайды: Енді әрі қарай жаңа киноәлем қай бағытта дамымақ?

     

    Жалпы қойған бағам: 6/10 бэтаранг

  • Айкона

    Барлық рецензиялар: 135

    Жоғарыда жазылған пікірден ер адам мен әйел адамның бір нәрсені екі түрлі қабылдайтынын байқауға болады. Білмеймін, маған кино өте жақын көрінді. Мен бірінші кітабын оқыдым. Кітапта бір оқиға қайта-қайта сипатталып жатқандай әсерде болдым. Басында шатасып кеттім, киносы бар екенін білгесін киносын қарайын деп шештім. Режиссердың шеберлігі шығар, андай қиын оқылатын кітаптан жақсы кино түсіріп шығу деген. Эмили Блант рөлге сәтті таңдалған, кітапты оқып отырған кезде сондай қыз елестеді маған.

    Мен де басты кейіпкерле сияқты күнделікті көретін адамдарым жайлы көп ойлаймын, ол сияқты мен де біраз үйдің тұрғындарын бақылаймын. Просто мен үшін қызық. Сол себепті де кино мен үшін жақын болған шығар. Жалпы миыңыздың ізденгенін қалайтын болсаңыз киноны көруге кеңес берер ем.

    Рас, адамдар бір көрген адам туралы небір түрлі ой ойлайды. Киноның да мақсаты адамдар жайлы толық білмей жатып сол адамға қатысты ойыңды айтып, шешім шығаруға асықпаған жөн. Тіпті, адамның өзі кейбір жағдайда өзі жайлы толық ақпарат білмеуі мүмкін.

  • Айкона

    Барлық рецензиялар: 135

    "Чудо-женщина" киносын именно кинотеатрдан көруге кеңес берер ем. Себебі, спецэффектілер кинотеатрдан көрген кезде жақсы байқалады. Галь Гадот пен амазонкалардың әдемілігі адамды бірден баурап алады. Амазонкалардың төбелесі мен олардың тұрып жатқанын аралын суретшілер жақсы бере алған. расымен, жер бетіндегі жұмаққа ұқсайды. Киноның желісі бір қалыпты, адамға түсінікті.

    Галь Гадот, әдемілікпен бірге әйелдің қылықтығын, қайсарлығын, батылдығын, аңқаулығын, эмоциясын жақсы бере алған. Адамды сендіре алады.

    "Крис Пайн түскен фильмдердің барлығында міндетті түрде мотоцикл болуы керек пе?" деген ой келді. Алдында Стартекте түскен кезде де өзінің мотоциклды жақсы айдайтынын көрсетіп еді, мында да өзінің шеберлігін бір паш еткен. Ол жақсы актер, сымбатты. Бірақ, мен "Чем, дальше в лес" фильміндегі "керемет ханзаданың" рөлінде ғана елестетіп тұрам. Сонан соң, оның мойыны қысқа сияқты әсер қалдырады маған. Жалпы, ойыны нашар емес, жақсы.

    Кинода динамика да, махаббат та, достықта бар. Барлық комикстерге тән әзілде жақсы қолданылған. Кино әдемі, әрі қызық. Кеткен ақша мен уақытқа өкінуге болмайды. Қайта көруге қарсы емеспін. Көріңіздер!

     

     

  • Ернар Бекенов

    Барлық рецензиялар: 118

    "Галактика сақшылары" Марвел кинохронологиясының бір бөлшегі екеніне қарамастан, Джеймс Ганның арқасында ол дербес әлем ретінде өрбіп жатыр. Бұл ерекше айшықталған стилімен, орынды қолданылатын саундлистімен және балаға да түсінікті көңілді атмосферасымен айқындалады.

    "Галактика сақшылары" Марвел шығарған фильмдердің фонында - шалғайдағы беймарал ауылға ойда-жоқта келіп қалған цирк секілді: түрлі-түсті, жарқ-жұрқ, у-шу, сауық-сайран мен ән-думан. Не болғанын аңғарып та үлгермейсің, ал цирк думандатып көз ұшында кетіп бара жатады. Олар қалдырып кеткен әдемі оқиғалардың әсерімен арттарынан қимастықпен ұзақ қарап тұрасың.

    Джеймс Ганның фетиші - 1980 жылдар: неон, музыка және сол кезеңнің өмір салты. Бұл махаббатын режиссер мүлдем жасырмайды, тіпті фильмнің басты фишкасы ретінде қолданады. Осы арқылы картинаға ерекше стиль береді, жастары мен көзқарасы сан түрлі көрермендерін бір арнаға тоғыстырады. Тіпті сол заманға деген қызығушылығыңды оятып жібереді екен.

    Стиль демекші, сексенінші жылдардың белгілері бұл жолы біріншісінен де басымырақ па дедім: ғарышты осыншама неон түстермен бояуға болатынын білмеппін. Тіпті неон түстерді көп қолдану жүректі айнытатындай көрінетін. Алайда, бұл фильмнен кейін ойым мүлдем өзгерді. Тіпті сол жылдардың әуендерінде көп кездесетін электрони дыбыстар да сәтімен қолданылған. Мысалы, атыс қаруларынан шыққан дыбыстар осындай электростайл сүйемелдеуге ие болыпты.

    "Галактика сақшылары" не дегенде, әлбетте, бірінші кезекте бірден ересек ұрпақ тыңдаған музыка келеді құлағымызға. Осы жолы да сол замандардың шлягерлері шырқалады. Елітіп тыңдайсың. Ескі-құсқы пластинкалар мен аудиокассеталарды қайтадан іздеп тапқың келіп кетеді.

    Бірінші фильмде біз кейіпкерлермен танысу кезеңінде болдық. Олардың мінез-құлқы мен ішкі толғаныстарын таныдық. Алғашқы бөлімдегі оқиғалар да бізді олармен жақынырақ танысу үшін құрылды.

    Ал бұл жолы біз кейіпкерлердің әрі қарайғы дамуын көреміз. Осы күнгі істері мен тірліктеріне не себеп болғанын және олардың осындай тағдырына не итермелегенін білеміз. Олар тұлға ретінде де осы жолы көп ашылды деуге болады. Әлбетте, бұл өз кезегінде Сақшылардың бұрынғыдан да жақындаса түсуіне, бір-біріне қамқор болып, бауырмалдық танытуына алып келеді. Қарайсың да, елжіреп сала бересің.

    Бірінші картинада зұлым саналған кейбір персонаждардың жаңа бетбұрысы да байқалды. Оларды да халық жақсы көріп кетті деп ойлаймын. Сильвестр Сталлоненің эпизоды оның келешекте Марвел әлемінің бір бөлшегіне айналатынына ишара білдіргендей болды.

    Бөпе Грут туралы мәңгі айта беруге болатын шығар. Ата-ана статусындағы кез келген көрермен Груттан өз баласын көре алды деп ойлаймын. Өзім әйтеуір тоғыз айлық ұлымның қылықтарын көргендей болдым. Бұл кейіпкер сонысымен де қызық, сонысымен де бәріне ұнайды. Фильмнің тартымдылығын 100 пайызбен өлшесек, 60-70 пайызын осы сүйкімді персонаждың қылықтары алып кететін шығар.

    "Галактика сақшылары 2" - "Болашақ" қауымдастығы қазақша дубляждаған 19-шы фильм. Сапасы жаман емес. Біріншісін көрген адам ретінде - осы жолғы дубляждың деңгейі бұрынғыдан еш кем түспейтінін сеніммен айта аламын.

    Екі ескертуім бар: Фильм 16+. Сондықтан залда кішкентай балалардың отырғанын кеше өзім аса құптай қоймадым. Фильм де өзінің жас рейтингін толықтай ақтайды: бейәдеп сөздер мен ересек әзілдер бар. Ата-аналарды осы фактіге назар аударуды сұраймын.

    Сосын, Марвелдің өнімдерін көріп жүрген адамдар жақсы біледі - фильм біткен соң, ақырғы титрлар кезінде қосымша мини-эпизодтар немесе көріністер болады. Бұл жолы оның саны бесеу. Сондықтан фильм біте сала сыртқа шығуға асықпаңыз, бес көріністі көріп болған соң тұруға кеңес беремін. Кешегі көрсетілімде бұл жағдайдан ешкімнің хабары болмаған секілді, залда өзім ғана қалыппын :)