• Біздің парақшалар:
  • pецензиялар (барлығы: 413)

  • Айкона

    Барлық рецензиялар: 137

    Жоғарыда жазылған пікірден ер адам мен әйел адамның бір нәрсені екі түрлі қабылдайтынын байқауға болады. Білмеймін, маған кино өте жақын көрінді. Мен бірінші кітабын оқыдым. Кітапта бір оқиға қайта-қайта сипатталып жатқандай әсерде болдым. Басында шатасып кеттім, киносы бар екенін білгесін киносын қарайын деп шештім. Режиссердың шеберлігі шығар, андай қиын оқылатын кітаптан жақсы кино түсіріп шығу деген. Эмили Блант рөлге сәтті таңдалған, кітапты оқып отырған кезде сондай қыз елестеді маған.

    Мен де басты кейіпкерле сияқты күнделікті көретін адамдарым жайлы көп ойлаймын, ол сияқты мен де біраз үйдің тұрғындарын бақылаймын. Просто мен үшін қызық. Сол себепті де кино мен үшін жақын болған шығар. Жалпы миыңыздың ізденгенін қалайтын болсаңыз киноны көруге кеңес берер ем.

    Рас, адамдар бір көрген адам туралы небір түрлі ой ойлайды. Киноның да мақсаты адамдар жайлы толық білмей жатып сол адамға қатысты ойыңды айтып, шешім шығаруға асықпаған жөн. Тіпті, адамның өзі кейбір жағдайда өзі жайлы толық ақпарат білмеуі мүмкін.

  • Айкона

    Барлық рецензиялар: 137

    "Чудо-женщина" киносын именно кинотеатрдан көруге кеңес берер ем. Себебі, спецэффектілер кинотеатрдан көрген кезде жақсы байқалады. Галь Гадот пен амазонкалардың әдемілігі адамды бірден баурап алады. Амазонкалардың төбелесі мен олардың тұрып жатқанын аралын суретшілер жақсы бере алған. расымен, жер бетіндегі жұмаққа ұқсайды. Киноның желісі бір қалыпты, адамға түсінікті.

    Галь Гадот, әдемілікпен бірге әйелдің қылықтығын, қайсарлығын, батылдығын, аңқаулығын, эмоциясын жақсы бере алған. Адамды сендіре алады.

    "Крис Пайн түскен фильмдердің барлығында міндетті түрде мотоцикл болуы керек пе?" деген ой келді. Алдында Стартекте түскен кезде де өзінің мотоциклды жақсы айдайтынын көрсетіп еді, мында да өзінің шеберлігін бір паш еткен. Ол жақсы актер, сымбатты. Бірақ, мен "Чем, дальше в лес" фильміндегі "керемет ханзаданың" рөлінде ғана елестетіп тұрам. Сонан соң, оның мойыны қысқа сияқты әсер қалдырады маған. Жалпы, ойыны нашар емес, жақсы.

    Кинода динамика да, махаббат та, достықта бар. Барлық комикстерге тән әзілде жақсы қолданылған. Кино әдемі, әрі қызық. Кеткен ақша мен уақытқа өкінуге болмайды. Қайта көруге қарсы емеспін. Көріңіздер!

     

     

  • Ернар Бекенов

    Барлық рецензиялар: 119

    "Галактика сақшылары" Марвел кинохронологиясының бір бөлшегі екеніне қарамастан, Джеймс Ганның арқасында ол дербес әлем ретінде өрбіп жатыр. Бұл ерекше айшықталған стилімен, орынды қолданылатын саундлистімен және балаға да түсінікті көңілді атмосферасымен айқындалады.

    "Галактика сақшылары" Марвел шығарған фильмдердің фонында - шалғайдағы беймарал ауылға ойда-жоқта келіп қалған цирк секілді: түрлі-түсті, жарқ-жұрқ, у-шу, сауық-сайран мен ән-думан. Не болғанын аңғарып та үлгермейсің, ал цирк думандатып көз ұшында кетіп бара жатады. Олар қалдырып кеткен әдемі оқиғалардың әсерімен арттарынан қимастықпен ұзақ қарап тұрасың.

    Джеймс Ганның фетиші - 1980 жылдар: неон, музыка және сол кезеңнің өмір салты. Бұл махаббатын режиссер мүлдем жасырмайды, тіпті фильмнің басты фишкасы ретінде қолданады. Осы арқылы картинаға ерекше стиль береді, жастары мен көзқарасы сан түрлі көрермендерін бір арнаға тоғыстырады. Тіпті сол заманға деген қызығушылығыңды оятып жібереді екен.

    Стиль демекші, сексенінші жылдардың белгілері бұл жолы біріншісінен де басымырақ па дедім: ғарышты осыншама неон түстермен бояуға болатынын білмеппін. Тіпті неон түстерді көп қолдану жүректі айнытатындай көрінетін. Алайда, бұл фильмнен кейін ойым мүлдем өзгерді. Тіпті сол жылдардың әуендерінде көп кездесетін электрони дыбыстар да сәтімен қолданылған. Мысалы, атыс қаруларынан шыққан дыбыстар осындай электростайл сүйемелдеуге ие болыпты.

    "Галактика сақшылары" не дегенде, әлбетте, бірінші кезекте бірден ересек ұрпақ тыңдаған музыка келеді құлағымызға. Осы жолы да сол замандардың шлягерлері шырқалады. Елітіп тыңдайсың. Ескі-құсқы пластинкалар мен аудиокассеталарды қайтадан іздеп тапқың келіп кетеді.

    Бірінші фильмде біз кейіпкерлермен танысу кезеңінде болдық. Олардың мінез-құлқы мен ішкі толғаныстарын таныдық. Алғашқы бөлімдегі оқиғалар да бізді олармен жақынырақ танысу үшін құрылды.

    Ал бұл жолы біз кейіпкерлердің әрі қарайғы дамуын көреміз. Осы күнгі істері мен тірліктеріне не себеп болғанын және олардың осындай тағдырына не итермелегенін білеміз. Олар тұлға ретінде де осы жолы көп ашылды деуге болады. Әлбетте, бұл өз кезегінде Сақшылардың бұрынғыдан да жақындаса түсуіне, бір-біріне қамқор болып, бауырмалдық танытуына алып келеді. Қарайсың да, елжіреп сала бересің.

    Бірінші картинада зұлым саналған кейбір персонаждардың жаңа бетбұрысы да байқалды. Оларды да халық жақсы көріп кетті деп ойлаймын. Сильвестр Сталлоненің эпизоды оның келешекте Марвел әлемінің бір бөлшегіне айналатынына ишара білдіргендей болды.

    Бөпе Грут туралы мәңгі айта беруге болатын шығар. Ата-ана статусындағы кез келген көрермен Груттан өз баласын көре алды деп ойлаймын. Өзім әйтеуір тоғыз айлық ұлымның қылықтарын көргендей болдым. Бұл кейіпкер сонысымен де қызық, сонысымен де бәріне ұнайды. Фильмнің тартымдылығын 100 пайызбен өлшесек, 60-70 пайызын осы сүйкімді персонаждың қылықтары алып кететін шығар.

    "Галактика сақшылары 2" - "Болашақ" қауымдастығы қазақша дубляждаған 19-шы фильм. Сапасы жаман емес. Біріншісін көрген адам ретінде - осы жолғы дубляждың деңгейі бұрынғыдан еш кем түспейтінін сеніммен айта аламын.

    Екі ескертуім бар: Фильм 16+. Сондықтан залда кішкентай балалардың отырғанын кеше өзім аса құптай қоймадым. Фильм де өзінің жас рейтингін толықтай ақтайды: бейәдеп сөздер мен ересек әзілдер бар. Ата-аналарды осы фактіге назар аударуды сұраймын.

    Сосын, Марвелдің өнімдерін көріп жүрген адамдар жақсы біледі - фильм біткен соң, ақырғы титрлар кезінде қосымша мини-эпизодтар немесе көріністер болады. Бұл жолы оның саны бесеу. Сондықтан фильм біте сала сыртқа шығуға асықпаңыз, бес көріністі көріп болған соң тұруға кеңес беремін. Кешегі көрсетілімде бұл жағдайдан ешкімнің хабары болмаған секілді, залда өзім ғана қалыппын :)

  • Айкона

    Барлық рецензиялар: 137

    • Алып
    • 2016
    • Рейтинг: 6
    • Дауыс саны: 1

    Энн Хэтэуэйдің киноларын қараған қызық, өзіндік бір актерлық ерекшелігі бар. "Уау!" дегізбесе де, ішің пыспайды. Энн Хэтэуэйдің еркелігі бір түрлі жақсы әсер қалдырады.

    Кино туралы не айтуға болады? Кино орыс тілінде неге "Моя девушка - моностор" деп аударғанын білмеймін, себебі атау мен киноның желісі как то үйлеспей қалған. Киноға бара жатқан кезде аздап басқа нәрсе күтіп баруыңыз мүмкін, ал ол жерде басқа...

    Сауық-сайранмен өмірін өткізіп жүрген Глорияны аяқ асты жігіті тастап кетеді. Амалы таусылған ол ауылына қайтады. Сол жерде ол бұрынғы сыныптасы Оскармен жолығады. Қайта сауық құрып жүрген қыз аяқ асты өзінің Алып екенін біліп, өмірге деген көз қарасын өзгерте бастайды. Ол тек басқа адам ғана емес, халықты қорғаушы боп шыға келеді...

    Кино - фантастикалық комедия болғандықтан біраз жақсы көңіл сыйлары анық. Маған ұнағаны киноның аяғының біз күткендей аяқталмауы. "Ой, бәрі түсінікіті" деп отырған жеріңнен оқиғаның басқа арнаға бұрылуы қызық болды. Бұны трейлерден байқау мүмкін емес.

    Энн Хэтэуэй өзі продюссерлік еткен кино болғандықтан бар күшін салғаны көрініп тұр, дегенмен еңбек ақталған сияқты. Көріп бағасын беріңіздер!

  • Айкона

    Барлық рецензиялар: 137

    Кинотеатрдан қарай алмадым, үйде қарауға тұрарлық фильм. Жан-жағы жинақы, айтар ойы мен ісі бір жерден шыққан жақсы кино. Мағына іздеп, өмірді түсіндіруге көмектесетін ойы жоқ, жәй қарап фантазияға ерік берген жақсы туынды. Киноны көріп отырып ішің пыспайды, қарауға тұрарлық.

  • Ернар Бекенов

    Барлық рецензиялар: 119

    Бәрі Куаронның "Гравитациясымен" салыстырғыш болып кетіпті. Оқиға ортасы бір демесеңіз, сюжеттік құрылым мен моралі да, мақсаты да бөлек дүниелер ғой. Ешқашан, естисіз бе - ешқашан "Гравитациямен" салыстырмаңыз.

    Біріншіден, "Алғашқылар" дәуірі өмірде болған оқиғаны баяндайды. Әлбетте, көркем туынды болғандықтан, әсіре суреттеу мен фантазияға ерік берілген шығар. Олай болуы заңды да. Бірақ, жалпы кино өнім ретінде тәп-тәуір дүние шыққан.

    Бірақ 140 минуттық хронометражы аздап күмілжітті. Меніңше, созғыламай, біраз жерін қырқып тастаса немесе қысқа баяндау арқылы жеткізсе фильмнің құрылымына нұқсан келмес еді. Енді, фильм жасаушылар екі сағаттан асыруға бел байлаған екен, өздері біледі де. Масштаб, хуле.

    Бекмамбетовтың жаңашыл маман екенін ескерсек, әлбетте, бұл жерде де оның технологиялық жетістіктерді мейілінше пайдаланғаны айқын байқалады. Картина Голливудтың ұқсас дүниелерінен еш кем емес, тіпті бұл фильм тым голливудтанып кеткен дер едім. Бұл да дұрыс шығар: қазіргі көрерменді арнайы эффектісіз, әдемі диалогтарсыз, қуақы кейіпкерсіз қызықтыру қиын.

    Операторлық жұмыс пен атмосфералық саунд әдемі шыққан. Ғарыш тематикасын ұнататын адам ретінде мен кейбір стоп-кадрларын басып шығарып, қабырғама іліп қояр едім.

    Әрине, кез-келген орыс картинасы секілді, бұл дүние де кемшіліксіз емес. Атап айтқанда, кейіпкерлер мінезінің қарама-қайшылығын ақтап алатын нәтиже көре алмадым: Беляев - салмақты, тәртіпке үйренген сырбаз да, Леонов тентек, жігіт ағасы жасына жетсе де балалығы ойнап кететін, қуақы әрі көзсіз батыр еді. Шын өмірде олардың қандай болғанын білмеймін, бірақ кинода олардың типажы осындай. Екі тұлға мінезінің бір-біріне қарама-қайшылау болуы сюжет барысында конфликті мен үйлеспеушілікке алып келеді деп ойлап едім. Алайда, мен ойлағандай болмады. Кейіпкерлер мінезінің осы ерекшеліктері көрсетілген де, оның қандай салдарға алып келетіні аяғына жеткізілмеген бе деймін. Мүмкін, мен қате қабылдаған шығармын, алайда кейіпкерлер ашылмай қалғандай болды. Беляев рөліндегі Хабенский мүлдем тасада қалғандай.

    Біздің дубляжбен айналысатын бастамашыл топ өкілдеріміз, Голливудтан бөлек көршілес елдердің өнімдерін аударуға да назар бөле бастапты: былтыр "28 панфиловшы" қазақша дубляждалды, биыл украинның "Никита Кожемяка" мультфильмі "Айдаһарлар әміршісі" болып киноға шықты, енді міне - Бекмамбетов басқарған жоба қазақ көрермендеріне ұсынылып отыр. "Алғашқылар дәуірін" Диснейдің өнімдерінің дубляжымен салыстыруға болмайды, бірақ бір ұнаған жері - бұл жерде титрлар да қазақшаланыпты.

    Осы тұрғыда, кино аудару жолында жүргендер блокбастерлік болашағы айқын Голливуд жобаларымен шектеліп қалмай, балама өнімдерге де көңіл бөле бастағаны қуантады. Тек осы жолы - "Алғашқылар дәуірінің" жарнамасы аз болды. Өз басым, бұл фильмнің аударылғанын прокатқа 2 күн қалғанда естідім (ұят-ай).

    Дубляжға қатысты тағы бірер сөз: бас конструктор Королевті қазақша сөйлеткен Бақытжан Әлпейісовтың дауысы тамаша. Ал басты кейіпкерлердің дауыстарынан біркелкілік жетіспей тұрды. Бірде тым қатты, бірде тым баяу естіледі, бұл жерде кінә енді дыбыс инженерлерінде шығар. Жалпы, дубляждың өзінде табиғилық жетіспей тұрғандай болды, телевизиялық аударма деңгейінде қалып қойғандай әсер берді. Бірақ сөге жамандайтындай нашар да емес, әзілдер, кейбір диалогтар жақсы жеткізілген. 

    Жалпы алғанда, барлық жас ерекшеліктерінің қызығушылығын ескеріп жасалған, кино саласындағы озық технологиялар орынымен пайдаланылған, КСРО атмосферасы мейілінше шынайы берілген, блокбастерлік алғышарттары бар жақсы дүние шығыпты. 

  • Айкона

    Барлық рецензиялар: 137

    • Сплит
    • 2016
    • Рейтинг: 7,5
    • Дауыс саны: 2

    Кейінгі кезде "адамның ішінде бірнеше адам сүруі мүмкін" деген теория мені қатты қызықтырады. Осы тақырыпта біраз кино мен кітап оқып шықтым. Білмейм, менің ойымды қанағаттандыруға Джеймс МакЭвойдың актерлығының шамасы жеткен сияқты...

    "Sulpak Cinema" компанисының шақыруымен "Сплит" фильмінің тұсау кесерінде болып қайттым. Маған психологиялық триллерлер көру идеясы ұнайды, өз миымды біраз қинаған жақсы әсер етеді. Айтпақшы, +16 деген ескертуді ескеріңіз. Балаңыздың психологиясын бұзғыңыз келмесе көрсетудің қажеті жоқ.

    Кевинның миының ауытқушылығы салдарынан оның бойында 23 тұлға өмір суреді. Олар әр түрлі, әр түрлі өмір сүреді, олардың әрқайсысының өз бөлмесі, өз киімі, өз тіс щеткасы бар. Олардың пайда болуының себебі Кевиннің бала күнгі алған психологиялық ауыртпашылығы. Бала өзін қорғау үшін разный образдар ойлап тапқан және олар бір күні оны толықтай билеп алған... 23 тұлғаның бірігіп бірдей әрекет жасауына әсер еткен нәрсе - 24- тұлғаның пайда болуы...

    Маған "Сплит" фильмінен не ұнады?

    1. Кино басталған сәттен сені белгісіздік пен "енді не болады?" деген қорқыныш сезімнің ұстап отыруы. Себебі сен әр тұлғадан не күтуге болатынын түсінбейсің.

    2. Кейси атты қыздың да психологиялық алған трагедиясын бірге көрсетуі және кино соңына дейін қыздың не кешкенін түсінуге талпынуың.

    3. Үш қыздың ойыны мен қорқынышы. Мүмкін, мен де қыз болғасын осындай сәттерде мен қайтер едім деген ой мен бір адамның алдындағы үш қыздың дәрменсіздігі.

    4. Джеймс МакЭвой. Оның біраз киносын қарағам. Оның кез- келген образға жақсы енетінін білсем де, Патрисияны образы керемет шыққан. Ол сондай сабырлы, ақылды әйел образына сендіре алды.

    5. Киноның аяқталуы. Күтпегем, бірақ жалғасы болады деген ойдың маза бермеуі. Кейсидің дене жарақаттарын көрген кездегі ойларға есеп жоқ. Режиссердің не ойлағанын білмейм, бірақ, бір ойды анық жеткізді. Өмірде қиындықты көп көрген адам шыдамды келеді және ол ешқашан берілмейді. Бұл сәтті көру керек.

    Киноны көруге кеңес берем, біраз ой салары анық. Мүмкін, бір кездері есінен айырылған адамдарды басқаша қабылдауды үйреніп қалармыз...

  • Әділханов Абылай

    Барлық рецензиялар: 3

    Осы фильмнің ремейкін түсіре беруден жалықпады ма екен?

    Бір байқағаным Киң Коңтің бойы әр ремейк сайын екі еселене беретін сияқты. Бұл жолы Киң Коң баяғы өзі мініп алатын ғимаратпен бірдей, ощм НӘН* (*үлкен)

    Оқиға желісі сол баяғы. Ғылымға белгісіз, картада жоқ аралға ғылыми экспедиция келеді. Олардың құрамында:

    Әлгі қуғынбай профессор және сюжетке еш пайдасы жоқ, образдары да фильм барысында еш ашылмаған (фильмдегі нәсілдік біріңғайлықты аздап араластыру үшін қосыған деп түсіндім) екі көмекшісі (біреуі қара нәсілді, екіншісі азиат қыз)

    Вьетнамнан іздеп жүріп тауып алған, джунглиде жүріп қоятын "ізкесер"

    Әйтеуір бір фотограф қыз (Коңг жақсы көріп қалатын бір қыз болу керек қой енді, Азиатка бұл рөлге жарамаса керек, бірақ СПОЙЛЕР, Коңг бұ қызға қарамай қояды (маған солай көрінді))

    Бір топ әскерилер (жарылыста, қанды жойқын шайқаста жұлынған аяқ-қолдар мен ішек-қарындар жан-жаққа жашырап жатқан көріністерді түсіру үшін және көрермендерді "ышша, өәқ, анау құбыжық әлгіні кәдімгідей шәйнап жеп қойды, бишара-ай" дегізу үшін қосылған әйтеуір бір пенделер. Бірақ олардың образы еш ашылмағандықтан аяныш сезімін туғаза алмады)

    Осы әкерилердің басшысы (ол да қуады)

    Сосын кімдер бар еді тағы, есімде қалғандары осылар

    Сонымен, аталған топ аралға тікұшақпен келеді де, бірден аралды бомбалай бастайды. Бұл әрекеттері әрине арал королі Коңгқа ұнамайды да, бірден бұларға қарсы шығып, қыра бастайды бәрін. Өлкені өліп, қалғаны қалғанна кейін (жоқ, сіз бен мен ойлағандай азиат қыз бен қара нәсілді пацан алғашқы сценаларда өліп қалмайды, міне керемет! Міне, Американың толеранттылығы! Онымен қоймай, СПОЙЛЕР, түк пайдасы жоқ бұл екеуі фильм соңына дейін тірі қалады!)

    Оқиғаға оралсақ, бірақ, не ма, оралудың еш қажеті жоқ деп ойлаймын.

    Фильм нашар, осымен бітті!

    4 деген бағаны ең болмаса спецэффекті үшін деп қойдым.

  • Айкона

    Барлық рецензиялар: 137

    • Келу
    • 2016
    • Рейтинг: 8,167
    • Дауыс саны: 6

    Прибытие фильмін жазушы мен түсірушінің фильмнің соңына келгенде фантазиясы таусылып қалса керек... 6 балды тек Эми Адамстың шынайы ойнай алатындығы алды.Киноның бас тәп-тәуір ортасына келген кезде шатасу басталып, лағып кеткен банальный тема қосылып кетті. Басқа дүние күтіп ем...

  • Ернар Бекенов

    Барлық рецензиялар: 119

    • Логан
    • 2017
    • Рейтинг: 7,75
    • Дауыс саны: 4

    Жыланды қанша кессең де кесірткедей күші бар

    Фильмге 18+ ересек рейтинг беру кімнің идеясы екенін білмеймін, бірақ дұрыс қабылданған шешім екеніне фильм барысында көзің жетеді. "Дэдпул" да "R" рейтингімен шықты, бірақ ол мүлдем басқа жағдай және "Логандағы" жас шектеуі былапыт сөздер мен қызыл қырғын үшін емес.

    "Х-адамдар" кинотарихында алғаш рет нағыз ересек туынды жасалып отыр. Ересек дегенде дұрыс түсіну керек - бұл жерде айтылатын ойдың жасөспірімдер үшін тым салмақты болатыны, жалпы фильм атмосферасы кинокомикс ауылынан тым алыста екені меңзелсе керек.

    Атмосфера үшін бөлек респект. Егер "Логанды" көруге келсеңіз, "Х-адамдардың" бұған дейінгі серияларын ысырып тастаңыз. Әрине, сюжет бірізділігін сақтау үшін бұл киноәлемнің хронологиясынан, таймлайнынан алыстап кете алмайтынымыз анық. Алайда, "Логан" - бүкіл франшизаның биік шыңы, алынбас қамалы, жоғарыдағы жарық жұлдызы. Ысырып тастаңыз дегенім - мұнда балалар шаттықтан аспанға секіріп, ересектер бала болып кететіндей қияли экшн-қойылымдар жоқ. Тіпті Құну туралы осыған дейінгі екі бөлімнен де бөлек дүние. Құну/Логан қатысқан осыған дейінгі кинофильмдердің барлығы бұның қасында мультфильм секілді болып қалады екен. Соңғы кинокартина соншалықты шынайы, соншалықты өмірге жақындатылған.

    Фильмде Хью Джекман мен Патрик Стюарт - Құну/Джеймс Хоуллет пен Чарльз Ксавьер/Профессор Икс рөлдерінде соңғы рет ойнап отыр. Сол себептен шығар, екі актердің 2000 жылдан бері азық болған образдарымен жақсылап қоштасуға тырысқаны байқалды. Джекман орындауындағы сүйікті қаһарманымыз да іс-әрекеттері мен сөздерін ауыртпалық пен қайғыға толы, күрделі де ұзақ өмірін қорытуға алып келе береді. Көрерменімен кино тілі арқылы, өзгелерге бағыттап айтқан сөздері арқылы қоштасқандай болады.

    Жаңа мутант Х-23 болып ойнаған жас актриса Дафни Кинге түскен ауыртпалық Джекманнан да, Стюарттан да кем емес. Қаршадай қыздың шеберлігі таңғалтпай қоймайды. Бір ескерер жайт - Х-23/Лора Кинни диалогқа бара бермейтін, мүлдем дерлік сөйлемейтін тип. Ал, фильм бойы үндемей ойнау актрисадан қосымша қабілет пен талантты қажет ететіні анық қой. Сол себепті Дафни Кинді осындай салмақты жобаға табыла кеткен нағыз олжа деп есептеймін.

    Режиссер Джеймс Мэнголд бұл франшизада жаңа адам емес. Осыған дейін 2013 жылғы "Құну" фильмін түсірді. Алайда, сол кезде бірауыздан жоғары бағалауға тұрарлық дүние шыға қоймап еді. Оның себебі де енді белгілі секілді. "Құнуда" ол сценарий жұмысына араласқан жоқ. Кәдімгі жалданбалы маман деңгейінде жұмыс істеді. Ал, "Логанда" режиссер сюжет құрылымына тікелей атсалысты. Сондықтан да шығар, қойылымдық бөлігі мен сюжеттік құрылым біртұтас болып көрінеді. Бұны мен авторлық кино жанрына жатқызар едім.

    "Логан" Құну туралы трилогияның ақыры ғана емес, ескі мутанттар мен жаңа мутанттар буынын жалғайтын көпір де секілді. Фильмде көрініс табатын жеткіншектерде "Х-адамдар" сериясында бұрын болған қаһармандардағы қабілет-қасиеттерге балама бола алатындай ерекшеліктер бар. Егер, "ХХ ғасыр Фокс" франшизаны жалғастырар болса, болашақ жобалар дәл осы жаңа мутанттар төңірегінде болуы тиіс.

    Фильмнен кейін денең ауырлап, ішің өкініш пен аянышқа толып шығады. Өмірімде алғаш рет аталған кейіпкерлерді тағы да көргім келді. Бұнымен бітпесе екен деген қимас сезіммен шықтым. Бұның сыры көпшілікке үйреншікті болып кеткен кейіпкерлермен қоштасу картинасын өз деңгейінде, ешбір кемшіліксіз жасауында жатқан шығар. Өйткені жақсыдан ешқашан айырылғың келмейді.

  • Айкона

    Барлық рецензиялар: 137

    • Логан
    • 2017
    • Рейтинг: 7,75
    • Дауыс саны: 4

    Адам Росамаха жайлы көріп отырып ішінде бір күй болады. Ол - өкініш. Мықты актердің енді Логан болып киноға түспейтіні, енді Росамаха образының Хью Джекманды көре алмайтынымыз. Әрі фильмдегі Росамаханың өмірінің соңының құлдырауы өмірдегі жағдайларға ұқсап кеткені.

    Адамның өмірдегі басты мақсаты ұрпақ қалдыру. Логанның қызы бар деген ой ғана адамды жұбатады...

  • Meihua

    Барлық рецензиялар: 5

    Жалпы, жақсы фильм. Көңіл қалдырмады. Әбунасыр мен Данагүл жақсы алып шықты, ал жастарға зығырданым қайнады. Дегенмен, Әселдің сәл де болса кәсіби өскені байқалады - бетіне шамалы эмоция жүре бастапты ))

    Күйеуін бауыздап өлтіргім келген сезімді ескермесе (актерлік жағынан да, сюжеттегі орны бойынша да), кино ұнады деп айта алам.

    Салтанат Қалиеваның ролін кеңейте түсу керек еді - эпизод мықты! Сол жерінде қатты күлдім ))

    Кино көріп қайтуға мүмкіндік берген осы сайтқа үлкееееен алғыс!!

  • Ернар Бекенов

    Барлық рецензиялар: 119

    Комикс және кино, және солардың бірігуі нәтижесінде пайда болатын кинокомикс бағыты интертеймент саласынан ойып тұрып орын алады. Иә, кинокомикс көбінесе көңіл көтеруді, жеңіл-желпі көңіл-күй сыйлауды мақсат етеді. Алайда, бұл факт оған жеңіл-желпі қарауды әсте білдірмейді.

    Ағайынды Андреасяндар Ресей мен ТМД аумағында тұңғыш болып кинокомикс жасау идеясын іске асырмақ болған кезде дәл осы тұсына баса көңіл бөлмеген секілді. Жарайды, киносын әупірімдеп жасады, бірақ комикс қайда?

    Посткеңестік елдерде комикс дәстүрі қалыптаспағаны белгілі. Сондықтан, кинокомикс шығару, ол аз десеңіз оны комикссыз шығару үлкен тәуекел еді. Тіпті комиксы болған күннің өзінде бұл құбылыстардың барлығы бізге жат, тек Америкаға ғана тән дәстүр болып көрінетіні рас. Сондықтан, көрермен отандық суперқаһармандарға әлі дайын емес еді, әсіресе Marvel мен DC-дің озық үлгілерін басты бағдар етіп алу көрермендер тарапынан әрі күлкі, әрі ашу шақырды.

    Десек те, бұл тақырыпта фильм жасауға ешкім тыйым салған жоқ, режиссер не түсірем десе де өз еркі. Бәрібір, ерте ме, кеш пе, түбінде біреу бұл тақырыпқа қол салар еді. Шетелдегідей миллиардтаған пайданы, долларынан болмаса да, рублінен қалтаға басуды кім қаламайды дейсің. Нарықтың қалыпты тіршілігі ғой.

    Бұл салаға шындап кіріскен екенсің, кішкене дайындықпен келу керек еді ме деймін. Асығыстық танытпай, алдымен графикалық новеллалары мен шағын видео/анимациялық жобалар шығарса. Мейлі әуесқой деңгейде болсын, мейлі Youtube форматында болсын. Көрермендердің қызығушылығын туғызу үшін жобаға фанаттар арасынан мамандар тартылса: біреуі комикске сюжет жасасын, біреуі суретін салсын, біреуі анимациясын жасасын. Бұл жәйменен фанбазаның қалыптасуына әсер етеді, халықтың бойын біз үшін әлі таңсықтау салаға үйретеді. Аталған қадамдар жасалса, алғышарттар қалыптасса - фильм жасау қажеттілігі және оған сұраныс өз-өзінен-ақ туар еді-ау. Жарайды, менікі жай ақылгөйсу шығар. Енді фильмнің өзіне оралайық.

    Бірден байқалатын нәрсе - әлқиссаның жетіспеушілігі. Иә, қаһармандарға жекелеп тоқталады, бірақ фильмнің өзінде тұтастық жоқ. Мүмкін, сюжетін қазіргі заманнан емес, сол қаһармандар пайда болған кезеңнен бастау керек еді. Ал қазіргі фильмнің сюжетін екінші бөлім ретінде қарастыруға болады. Сонда, кейіпкерлердің әрекеттерінде белгілі бір логика болар еді, көрермендерде белгілі бір ақпараттар қоры қалыптасар еді.

    Жалпы, кино авторлары өзіне ғана тән тарих жасаудан қашқан тәрізді. Америкалық кинокомикстардың арқасында жылдар бойы қалыптасқан канондар мен клишелерді аямай қолданыпты және солардың шеңберінен шыға алмапты. Сондықтан да шығар, "Қорғаушыларды" көріп отырып, "Кек алушылармен", "Х-адамдармен" еріксіз салыстырып, солармен параллель келтіріп отырасың.

    Суперқаһармандар туралы жобалар - оқиғасы қызықты, қазіргі заманның киноертегісі. Ертегі болғандықтан да, логикаға сыймайтын және шындықпен еш жанаспайтын фантастикасымен үнсіз келісесің, анреал жерлерін ертегі болғандықтан ғана кешіресің. Бірақ әр нәрсенің шегі болады. Мысалы, "Бэтмен Суперменге қарсы" блокбастерінде екеуінің қырылысының нәтижесінде үлкен қаланың күл талқаны шықты, жалпы, қирандылар ауқымы шектен шығып кетті. "Бұларың артық енді, тым асырып жіберіпсіңдер" деген ой келеді. Бұл жолы да сол - ақылға сыймайтын нәрселер көп. Спойлер болмасын деп деталімен бөліспеймін. Бірақ, бір фактімен бөлісу керек шығар - басты зұлым жалғыз. Иә, клондар армиясы бар, бірақ көмекші де, әріптес те, жақтас та жоқ. Қанша күшті болсаң да бір өзің әлемді жаулап аласың ба? Жалпы, елуінші жылдардан бері осы жоспарыңды жалғыз өзің жоспарлап келіп, осы күнге дейін қалай қолға түспей, не әшкере болмай қаласың? Түсініксіз.

    Сосын суперқаһармандар іш пыстырып жіберді. Мысалы, "Кек алушыларда" әр кейіпкерді өз досыңдай танисың: қандай хоббиі бар, қандай әзілдер қолданады, ұнамайтын нәрселері, т.б.. Яғни, фильм барысында елеусіз ғана көріністермен детальдар қосып отырады, сен де бейсаналы түрде олар туралы досье жинақтай бересің. Ал "Қорғаушыларда" ол жоқ. Кейіпкерлердің мінез-құлқы жоқ, ішкі дүниесі ашылмаған, харизмадан жұрдай. Әлқиссаның жетіспеуі осы жерде тағы байқалады. 

    Тағы бір айта кететін нәрсе - компьютерлік графика. Ол бар. Бірақ біркелкі емес, кейбір тұсы - жаман емес, тіпті Голливудқа теңесіп қалар, бірақ көп жері - тым жасанды, тым шала. 2000 жылдардың басындағы компьютерлік ойындардың графикасын еске түсіреді. 

    Оған диалогтардың үйлесімсіздігін, кадрдағы біраз іс-әрекеттердің бекершілігін, фондағы музыканың орынды-орынсыз қолданылуы мен дыбыс ырғағының біресе қатты, біресе жай естілуін қосыңыз. Мақтауға тұрарлық жағы - саундтрек ретінде қолданылған ән (Елена Темникова ft. ST – Сумасшедший русский) шығар. 

    Бұндай жобалар қомақты қаржыны қажет ететіні анық. Бұл фильмнің бюджеті 380 млн рубль, долларға аударсақ, шамамен 6,5 млн болады. Әрине, бұндай қаржымен "Кек алушылардай" сапа шығару мүмкін емес. Сондықтан да, көп жеріне түсіністікпен қарау керек шығар. 

    "Қорғаушылардың" жалғасына ишара білдірілді, ал фильмді жасаушылар келесі жолы көрермендер айтқан/айтатын сын-пікірлерді ескереді деген аванс сеніммен - 

    5/10