• Біздің парақшалар:
  • Ернар Бекенов «Галактика сақшылары» фильміне жазған рецензиясы

    • — 1 тамыз 2014
    • Баға: 7/10

    Марвелдің кезекті комикс экранизациясы 2014 жылдың жазғы блокбастерлер үздігінде көш бастауға әбден лайықты.

    Сюжеттің өрбуі бас қатырар шытырмансыз, бәрі ап-анық. Әзілдер өте көп, бірақ бұл фильмнің жалпы мазмұнына ешбір зиянын тигізбейді. Керісінше, әлгі біртүрлі кейіпкерлердің шынайы, адами бола түсуіне үлес қоса түседі.

    Бәрінен бұрын таңғалдырғаны - Роккет есімді жанат болды. Оның неге екі аяқпен жүріп, адамша сөйлейтініне де сылтау айтылып, себебі айқындалды. Харизмасы мен орынды әзілдері "Фильмнің басты комигі" атағына бірінші лайықты екеніне дәлел бола алады.

    Біртүрлі кейіпкерлер хит-парадын адамға ұқсас тірі ағаш жалғастырады. Ол тек үш сөз айта алады: "Менің атым Грут". Оны дыбыстаған - Вин Дизель. Енді мына қызықты қараңыз: Вин Дизель Грутты әлемнің жеті тілінде дыбыстапты, соның ішінде орыс тілі де бар. Олардың қатарында қазақ тілі болмағаны өкінтті, әйтпесе оның "Менің атым Грут" деген дауысын есту өте қызық болар еді.

    Бұлардан бөлек, түрі адам демесеңіз - тері түстері мен көз қарашықтары сан алуан саналы тіршілік иелерін көресіз. Егер бұлардың бәрі "Неліктен бұлай?" деген сұрақ туғызбаса, фильм сізге де ұнауы тиіс.

    Қазақша дубляждалу сапасы жаман емес. Әсіресе әзілдердің аудармасына көбірек көңіл бөлінген тәрізді. Залдың оң реакциясын сәт сайынғы қыран-топан күлкіден байқауға болады. Осыған дейін аударылған фильмдер арқылы үйреншікті бола бастаған таныс дауыстарды естімедік. Үнемі қайталана бермей, жаңа дауыстардың болғаны жақсы да ғой. Қазақтың кейбір сөз тіркестері мен мақалдарын сәтті енгізіп жібергендері ұнады.

    Ешбір артық ойсыз, тек интертайнмент мақсатта киноға бара қалсаңыз - "Галактика сақшылары" (мүмкіндік болса - қазақшасына) 2 сағат уақытыңыздың қызықты өтуіне себепші болады деп ойлаймын.

Пікірлер